.jpg)
រូបថតបង្ហាញពីឈុតរៀបការរបស់មន្ត្រីឧទ្យានុរក្ស ដែលដាក់បង្ហាញក្នុងទិវាឧទ្យានុរក្សពិភពលោក។ រូប ក្រសួងបរិស្ថាន
ភ្នំពេញៈ ក្នុងទិវាឧទ្យានុរក្សពិភពលោក នៅថ្ងៃទី ៣១ កក្កដា ក្រសួងបរិស្ថានបានបង្ហាញពីកិច្ចខិតខំប្រឹងប្រែងរបស់មន្ដ្រីឧទ្យានុរក្សក្នុងការថែរក្សាធនធានធម្មជាតិ តាមរយៈការបញ្ចេញសាររូបភាពបទយកការណ៍ពីជីវិតឧទ្យានុរក្ស និងការប្តូររូបប្រូហ្វាលហ្វេសប៊ុកជាដើម ខណៈ ៨ ឆ្នាំចុងក្រោយនេះមានមន្ត្រីឧទ្យានុរក្ស ២ រូបបានស្លាប់ ដោយសារតែក្រុមជនល្មើសបាញ់ និងជាច្រើននាក់ទៀត រងរបួសអំឡុងបំពេញបេសកកម្ម។
លោក នេត្រ ភក្ត្រា អ្នកនាំពាក្យក្រសួងបរិស្ថានប្រាប់ភ្នំពេញប៉ុស្ដិ៍ នៅថ្ងៃទី ២៨ ខែកក្កដាថា ទិវាឧទ្យានុរក្សពិភពលោកត្រូវប្រារព្ធធ្វើឡើងនៅថ្ងៃទី ៣១ ខែកក្កដា ដើម្បីរំឭកដល់មន្ត្រីឧទ្យានុរក្ស ដែលត្រូវបានសម្លាប់ ឬរងរបួសក្នុងបេសកកម្មនៃកាតព្វកិច្ចការពារបរិស្ថាន អភិរក្សធនធានធម្មជាតិ និងដើម្បីអបអរសាទរការងារមន្ត្រីឧទ្យានុរក្សដែលបានលះបង់កម្លាំងកាយកម្លាំងចិត្តបំពេញការងារ ដើម្បីការពារបេតិកភណ្ឌធម្មជាតិ និងវប្បធម៌របស់ពិភពលោក។
លោកបានថ្លែងថា៖ «ក្នុងរយៈពេល ៨ ឆ្នាំចុងក្រោយនេះមានមន្ត្រីឧទ្យានុរក្សចំនួន ២ រូបបានទទួលរងគ្រោះថ្នាក់ដល់ជីវិត ដោយសារតែក្រុមជនល្មើសបានបាញ់សម្លាប់ និងជាច្រើននាក់ទៀតរងរបួសក្នុងអំឡុងបំពេញបេសកកម្ម ដើម្បីបុព្វហេតុបរិស្ថាន និងធនធានធម្មជាតិ»។
ប្រទេសកម្ពុជាបានប្រារព្ធទិវាឧទ្យានុរក្សប្រចាំឆ្នាំលើកដំបូងនៅឆ្នាំ ២០១៧ ដោយមានការចូលរួមពីស្ថាប័នពាក់ព័ន្ធអង្គការជាតិ និងអន្តរជាតិ ព្រះសង្ឃពុទ្ធសាសនា និស្សិត សហគមន៍មូលដ្ឋានសាធារណជនទូទៅ និងវិស័យឯកជន។
គោលបំណងផ្សេងទៀតនៃការប្រារព្ធពិធីនេះ គឺដើម្បីលើកកម្ពស់ការយល់ដឹងជាសាធារណៈអំពីតួនាទីរបស់ឧទ្យានុរក្សនៅកម្ពុជា និងជំរុញឱ្យសាធារណជន ចូលរួមជាមួយឧទ្យានុរក្សក្នុងការការពារ គ្រប់គ្រង អភិរក្សធនធានធម្មជាតិ និងបរិស្ថានប្រកបដោយនិរន្តរភាព។
លោកថ្លែងថា៖ «ទិវាឧទ្យានុរក្សពិភពលោកដែលត្រូវបានប្រារព្ធឡើងនៅថ្ងៃទី ៣១ ខែកក្កដា ក្រសួងនឹងធ្វើសកម្មភាពតាម online តាមរយៈការបញ្ចេញសាររូបភាព និងបទយកការណ៍ពីជីវិតឧទ្យានុរក្ស និងការប្តូររូបប្រូហ្វាលហ្វេសប៊ុកជាដើម ដើម្បីចូលរួមអបអរសាទរ។ ក្រសួងបរិស្ថានក៏បានចេញបណ្ណសរសើរលើកទឹកចិត្តដល់មន្ត្រីឆ្នើមផងដែរ»។
បើតាមលោក នេត្រ ភក្ត្រា ទិវាឧទ្យានុរក្សពិភពលោក ប្រារព្ធឡើងក្នុងគោលបំណងទី ១ ផ្តល់គុណតម្លៃ និងលើកទឹកចិត្តដល់មន្ត្រីឧទ្យានុរក្ស ដែលបានតស៊ូលះបង់ និងបូជាជីវិតដើម្បីបុព្វហេតុបរិស្ថាន និងធនធានធម្មជាតិ។ ទី ២ លើកកម្ពស់ការយល់ដឹងរបស់សាធារណជនអំពីតួនាទីរបស់មន្ត្រីឧទ្យានុរក្សនៅកម្ពុជាអំពីការតស៊ូលះបង់របស់មន្ត្រីឧទ្យានុរក្សក្នុងការថែរក្សា ការពារ និងអភិរក្សធនធានធម្មជាតិ និងបរិស្ថានប្រកបដោយសេចក្តីអង់អាចក្លាហាន។ ទី ៣ ជំរុញ និងលើកទឹកចិត្តសាធារណជនចូលរួមជាមួយនឹងមន្ត្រីឧទ្យានុរក្ស ដើម្បីការពារ និងគ្រប់គ្រងធនធានធម្មជាតិ និងបរិស្ថានប្រកបដោយនិរន្តរភាព។
លោកបន្តថា ក្រសួងបរិស្ថានបានលើកទឹកចិត្តស្ត្រីឱ្យចូលរួមក្នុងការការពារ និងអភិរក្សធនធានធម្មជាតិរបស់កម្ពុជា។
បច្ចុប្បន្ននេះ មានមន្ត្រីឧទ្យានុរក្សស្ត្រីចំនួន ៤២ នាក់ស្ថិតក្នុងចំណោមមន្ត្រីឧទ្យានុរក្សសរុប ១ ២០០ នាក់ដែលក្រសួងបរិស្ថានបានដាក់ពង្រាយនៅតាមតំបន់ការពារធម្មជាតិ និងរបៀងអភិរក្សជីវចម្រុះទាំង ៧៥ ទីតាំង មានទំហំប្រមាណ ៧,៣ លាន ស្ថិតក្នុងភូមិសាស្ត្រខេត្តចំនួន ២១។
កញ្ញា វាំង ម៉ូនីកា ជាមន្ដ្រីឧទ្យានុរក្សស្ដ្រីម្នាក់នៅមន្ទីរបរិស្ថានខេត្តរតនគិរី បានលើកឡើងថា កត្តាដែលជំរុញនាងឱ្យចូលរួមបម្រើការងារជាមន្ដ្រីឧទ្យានុរក្ស គឺដោយសារក្ដីស្រឡាញ់ចំពោះបរិស្ថាន និងមានបំណងចង់ការពារធនធានធម្មជាតិ និងការអភិរក្សជីវចម្រុះជាពិសេសគឺនាងចង់លើកកម្ពស់វិស័យអេកូទេសចរណ៍ធម្មជាតិឱ្យប្រជាពលរដ្ឋ និងអន្តរជាតិបានស្គាល់តម្លៃ និងធនធានធម្មជាតិនៅកម្ពុជា។
កញ្ញាបានថ្លែងថា៖ «បញ្ហាប្រឈមដែលខ្ញុំពិបាកក្នុងការបំពេញការងារ ជាមន្ដ្រីឧទ្យានុរក្ស គឺដោយសារតែមន្ត្រីឧទ្យានុរក្សរបស់យើងមានចំនួនតិច ផ្ទៃដីតំបន់ការពារមានចំនួនធំ ហើយប្រជាពលរដ្ឋ ពួកគាត់ពុំទាន់បានយល់ច្បាស់អំពីច្បាប់ និងការការពារអភិរក្សក្នុងដែនការពាររបស់មន្ត្រីយើង»។
ម៉ូនីកា បានអំពាវនាវដល់ប្រជាពលរដ្ឋទាំងអស់ឱ្យចូលរួមថែរក្សាការពារធនធានធម្មជាតិ និងស្វែងយល់ពីកិច្ចការពារ និងអភិរក្សធនធានធម្មជាតិរបស់មន្ត្រីឧទ្យានុរក្សឱ្យបានច្រើនដើម្បីឱ្យពួកគាត់ងាយស្រួលក្នុងការថែរក្សា និងអភិរក្ស តំបន់ការពារធម្មជាតិរបស់កម្ពុជា។ ជាពិសេសស្នើឱ្យពលរដ្ឋយល់ដឹងពីទុក្ខលំបាករបស់មន្ត្រីឧទ្យានុរក្សទាំងអស់ដែលខិតខំពុះពារមិនថាយប់ ឬថ្ងៃចំណាយទាំងពេលវេលាទាំងកម្លាំងកាយ និងកម្លាំងចិត្តដើម្បីការពារធនធានធម្មជាតិរបស់កម្ពុជាឱ្យគង់វង្ស។
សកម្មជនការពារព្រៃឈើលោក គ្រើង តុលា បានលើកឡើងថា មន្ដ្រីឧទ្យានុរក្ស មន្ដ្រីមូលដ្ឋាន និងសហគមន៍បានខិតខំប្រឹងប្រែងក្នុងការបំពេញការងារ ប៉ុន្ដែពួកគេនៅមិនទាន់មានសិទ្ធិអំណាចពេញលេញក្នុងការអនុវត្ដភារកិច្ចលើការបង្ក្រាបបទល្មើសធនធានធម្មជាតិនៅឡើយ។
លោកថ្លែងថា៖ «ខ្ញុំស្នើឱ្យក្រសួងផ្ដល់អំណាចពេញលេញ ដល់មន្ដ្រីឧទ្យានុរក្ស មន្ដ្រីនៅមូលដ្ឋាន និងសហគមន៍ ដើម្បីអាចឱ្យពួកគេមានសិទ្ធិក្នុងការធ្វើការងារអភិរក្សធនធានធម្មជាតិ ព្រៃឈើរបស់យើង»។
តាមរបាយការណ៍របស់ក្រសួងបរិស្ថានក្នុងរយៈពេល ៦ ខែ ឆ្នាំ ២០២១ មន្ត្រីឧទ្យានុរក្សបានចុះល្បាតនៅក្នុងតំបន់ការពារធម្មជាតិ និងរបៀងអភិរក្សជីវចម្រុះ សរុបបានចំនួន ១៤ ៤២២ លើកក្នុងនោះបានបង្ក្រាបបទល្មើសធនធានធម្មជាតិបានចំនួន ៤ ២៣៨ ករណីរឹបអូសរណារយន្តបានចំនួន ២ ៤៦២ គ្រឿង ដកហូតរថយន្តចំនួន ១៨២ គ្រឿង គោយន្តចំនួន ៣០៨ គ្រឿង ម៉ូតូចំនួន ៣៣៦ គ្រឿង ត្រាក់ទ័រចំនួន ២៤ គ្រឿង ឈើចំនួន ១ ២៦០ ម៉ែត្រគុប៕
