ក្រចេះ: អង្គភាពប្រឆាំងអំពើពុករលួយ (ACU) បាននិងកំពុងចុះស៊ើបអង្កេតទៅលើមន្ត្រីម្នាក់ ដែលមានតួនាទីជាប្រធានការិយាល័យរដ្ឋបាលនៃមន្ទីរសុខាភិបាលខេត្តក្រចេះពាក់ព័ន្ធនឹងការចោទប្រកាន់ពីបទទារប្រាក់ពីមន្ត្រីស្ម័គ្រចិត្ត និងមន្ត្រីជាប់កិច្ចសន្យាចាប់ពី ១០ ០០០ ដុល្លារទៅ ១៣ ០០០ ដុល្លារជាថ្នូរនឹងការបញ្ជូនឈ្មោះទៅក្រសួងសុខាភិបាល ដើម្បីបានក្របខ័ណ្ឌរដ្ឋ។
លោក ប៉ែន លីណាត អភិបាលរងខេត្តក្រចេះបានប្រាប់ភ្នំពេញប៉ុស្តិ៍នៅថ្ងៃទី ២៨ កក្កដាថា ក្រុមស៊ើបអង្គេតនៃអង្គភាព ACU គឺពិតជាបានចុះមកស្រាវជ្រាវពីករណីពុករលួយក្នុងវិស័យសុខាភិបាលនេះពិតមែន។ ប៉ុន្តែលោកសុំមិនធ្វើអត្ថាធិប្បាយលម្អិតនោះទេ ដោយគ្រាន់តែបញ្ជាក់ថា ករណីដែលឈានឱ្យមានការចុះស៊ើបអង្កេតនេះ ដោយសារតែថ្មីៗនេះមានមន្ត្រីជាប់កិច្ចសន្យា និងអ្នកស្ម័គ្រចិត្តក្នុងវិស័យនេះមួយចំនួនបានបង្ហោះសារត្អូញត្អែរពីការជំរិតទារប្រាក់ ដើម្បីទទួលបានក្របខ័ណ្ឌរដ្ឋក្នុងវិស័យសុខាភិបាល។
លោកបានបញ្ជាក់ថា៖ «ខ្ញុំមិនដឹងថា ការចុះស៊ើបអង្កេតនេះធ្វើនីតិវិធីដល់ណានោះទេ។ គ្រាន់តែខ្ញុំដឹងថា ក្រុមការងាររបស់អង្គភាព ACU ចុះមកធ្វើការនៅខេត្តក្រចេះ។ (តើពិតជាមានការទារលុយពី ១ ម៉ឺន ទៅជាង ១ ម៉ឺនដុល្លារបែបនេះមែនទេ?) អាហ្នឹងខ្ញុំ មិនអាចដឹងទេ ព្រោះខ្ញុំមិនមែនអ្នកស្រាវជ្រាវ គ្រាន់តែធ្លាប់ឃើញមានការត្អូញត្អែរពីមន្ត្រីសុខាភិបាលយើងតាមបណ្តាញហ្វេសប៊ុក»។
មន្ត្រីដែលអង្គភាព ACU ចុះស៊ើបអង្កេតពីបទល្មើសពុករលួយនេះ គឺមានឈ្មោះ ទី ប៊ុឡេង ហៅថា ពេទ្យទូច មានតួនាទីជាប្រធានការិយាល័យរដ្ឋបាល មន្ទីរសុខាភិបាលខេត្តក្រចេះ។ មន្ត្រីរូបនេះត្រូវបានចោទប្រកាន់ដោយសង្ស័យមានជាប់ពាក់ព័ន្ធនឹងការទារប្រាក់ពីមន្ត្រីស្ម័គ្រចិត្ត និងមន្ត្រីជាប់កិច្ចសន្យា ចំនួន ១២៩ នាក់ ដោយក្នុងម្នាក់ៗចាប់ពី ១០ ០០០ ដុល្លារទៅ ១៣ ០០០ ដុល្លារជាថ្នូរនឹងការបំពេញបែបបទប្រវត្តិរូបផ្លោះឡើងដោយមិនឆ្លងកាត់ការជ្រើសរើសត្រួតពិនិត្យពីប្រធាន អូឌីត ក្រុង និង ស្រុក ដើម្បីបញ្ជូនឈ្មោះទៅក្រសួងសុខាភិបាលឱ្យជាប់ក្របខ័ណ្ឌរដ្ឋ។
ភ្នំពេញប៉ុស្តិ៍មិនអាចសុំការអត្ថាធិប្បាយពីលោក ឱម យ៉ិនទៀង ប្រធានអង្គភាព ACU ដើម្បីសុំការបញ្ជាក់ពីករណីនេះបានទេ នៅថ្ងៃទី ២៩ ខែកក្កដា ដោយទូរស័ព្ទរបស់លោកពុំមានអ្នកទទួល។ ចំណែកលោក នួន បូផល អនុប្រធានអង្គភាព ACU បានប្រាប់ភ្នំពេញប៉ុស្តិ៍យ៉ាងខ្លីកាលពីថ្ងៃទី ២៨ កក្កដាថា លោក មិនច្បាស់ថា ក្រុមការងារចុះទៅស្រាវជ្រាវពីករណីនេះឬយ៉ាងណានោះទេ ព្រោះតាមច្បាប់ អ្នកចុះស្រាវជ្រាវពីករណីអំពើពុករលួយណាមួយ ដែលកើតមានឡើង គឺត្រូវរក្សាជាការសម្ងាត់ រហូតដល់នីតិវិធីចប់ ទើបអាចធ្វើការបញ្ចេញព័ត៌មានបាន។
លោកបញ្ជាក់ថា៖ «ខ្ញុំមិនដឹងច្បាស់ទេ ព្រោះការស៊ើបអង្កេតរបស់មន្ត្រីនគរបាលយុត្តិធម៌ អ្នកណាទទួលបានការចាត់តាំងស៊ើបអង្កេតករណីណា គឺដឹងតែករណីហ្នឹង ព្រោះបើមានពាក្យបណ្តឹង និងការសង្ស័យករណីណា គឺឯកឧត្តមទេសរដ្ឋមន្ត្រី គាត់អ្នកចាត់តាំងផ្ទាល់ទៅមន្ត្រីនគរបាលយុត្តិធម៌ណាទទួលស៊ើប គឺដឹងតែអ្នកហ្នឹង ហើយបើដឹងក៏ច្បាប់ហាមមិនឱ្យនិយាយក្នុងអំឡុងពេលស៊ើបអង្កេតដែរ»។
លោក ឈ្នាង សុវត្ថា ប្រធានមន្ទីរសុខាភិបាលខេត្តក្រចេះបានបដិសេធធ្វើការអត្ថាធិប្បាយ ដោយគ្រាន់តែបញ្ជាក់ថា ទុកឱ្យក្រុមស៊ើបអង្កេតនៃ ACU ជាអ្នកធ្វើការលើករណីនេះ។ លោកបញ្ជាក់ថា៖ «ការងារនេះ គេ (ACU ) កំពុងធ្វើការហើយខ្ញុំ អត់អាចឆ្លើយបានទេ ស្អីក៏ដោយ។ ខ្ញុំ សុំប៉ុណ្ណឹង»។
ភ្នំពេញប៉ុស្តិ៍មិនអាចសុំការឆ្លើយតបពីលោក ទី ប៊ុនឡេង ជុំវិញការចោទប្រកាន់នេះបានទេ ដោយមិនអាចស្វែងរកប្រភព ដើម្បីទំនាក់ទំនងបានពីថ្ងៃទី ២៩ កក្កដា។
ការផ្ទុះនៃការប្រព្រឹត្តអំពើពុករលួយក្នុងវិស័យសុខាភិបាលនេះ គឺបន្ទាប់ពីលោកនាយករដ្ឋមន្ត្រី ហ៊ុន សែន បានលើកទឹកចិត្តឱ្យមន្ត្រីស្ម័គ្រចិត្ត និងមន្ត្រីជាប់កិច្ចសន្យា បម្រើការងារប្រឆាំងជំងឺកូវីដ ១៩ ទូទាំងប្រទេសចំនួន ៣ ០០០ នាក់ឱ្យអាចចូលក្របខ័ណ្ឌរដ្ឋពេញសិទ្ធិ ដោយពុំមានការបង់ប្រាក់ឡើយ។ ជាមួយនឹងការប្រកាសនេះ ខេត្តក្រចេះ ត្រូវបានរដ្ឋាភិបាលតម្រូវឱ្យចូលក្របខ័ណ្ឌក្រសួងសុខាភិបាលចំនួន ១២៩ នាក់។
លោក ធីម ហ៊ន មន្ត្រីសម្របសម្រួល អង្គការអាដហុកប្រចាំខេត្តក្រចេះបានលើកឡើងថា លោកមិនទាន់ទទួលបានព័ត៌មានច្បាស់លាស់ពីការប្រព្រឹត្តអំពើពុករលួយក្នុងវិស័យសុខាភិបាលនេះទេ។ ប៉ុន្តែកន្លងទៅ លោកធ្លាប់ទទួលបានព័ត៌មានក្រៅផ្លូវការថា មានការជំរិតទារប្រាក់ដែលត្រូវបានចុះផ្សាយពីបណ្តាញសង្គមបែបនេះមែន។ លោកជឿជាក់ថា ការចុះមកស៊ើបអង្កេតរបស់អង្គភាព ACU នឹងអាចស្វែងរកការពិតឃើញចំពោះអំពើពុករលួយ ដែលកើតចេញពីមន្ត្រីសាធារណៈរបស់រដ្ឋនេះ។
លោករំពឹងថា៖ «នេះជាករណីថ្មីមួយ ដែលកើតឡើងនៅក្នុងខេត្តនេះ យើងឃើញថា អ្នកដែលជួបបញ្ហានេះ គាត់ជាអ្នកប្តឹងឬយ៉ាងណាទេ គ្រាន់តែតាមច្បាប់ ទាំងអ្នកសូក និងអ្នកស៊ី គឺសុទ្ធតែមានទោស។ គ្រាន់តែមានរឿងនេះ អង្គភាព ACU គាត់ធ្វើការស្រាវជ្រាវ នេះគឺជាចំណាត់ការមួយដែលល្អប្រសើរ ដើម្បីរកខុសត្រូវ ឬរកយុត្តិធម៌ កុំឱ្យមានអំពើពុករលួយបន្តកើតឡើងបន្ថែមនៅក្នុងអង្គភាពរដ្ឋអ៊ីចឹង»៕