សៀមរាបៈ អាជ្ញាធរជាតិអប្សរា និងគ្រឹះស្ថានអង្គរ បានប្រកាសបិទការចូលទស្សនាប្រាសាទនានា និងផ្អាកការលក់សំបុត្រចូលទស្សនានៅក្នុងរមណីយដ្ឋានអង្គររយៈពេល ១៤ ថ្ងៃ ដើម្បីចូលរួមទប់ស្កាត់ការឆ្លងរាលដាលជំងឺកូវីដបំប្លែងថ្មី។
សេចក្តីជូនដំណឹងរួមរបស់ស្ថាប័នទាំង ២ នេះបានឱ្យដឹងថា អនុលោមតាមសេចក្ដីសម្រេច រាជរដ្ឋាភិបាល ស្តីពីការបិទខ្ទប់ភូមិសាស្ត្រខេត្តចំនួន ៨ ជាប់ព្រំដែនថៃ ដើម្បីទប់ស្កាត់ការឆ្លងរាលដាលក្នុងសហគមន៍នៃមេរោគកូវីដ ១៩ ប្រភេទបំប្លែងថ្មីដែលតា (Delta) អាជ្ញាធរជាតិអប្សរា និងគ្រឹះស្ថានអង្គរ នឹងបិទការចូលទស្សនាប្រាសាទនានា និងផ្អាកការលក់សំបុត្រចូលទស្សនា ក្នុងរមណីយដ្ឋានអង្គរ គិតចាប់ពីថ្ងៃទី ៣០ ខែកក្កដា ឆ្នាំ ២០២១ រហូតដល់ថ្ងៃទី ១២ ខែ សីហា ឆ្នាំ២០២១។
សេចក្តីជូនដំណឹងរួមនេះបានសង្កត់ធ្ងន់ថា៖ «សេចក្តីដូចបានជម្រាបជូនខាងលើសូមក្រសួង ស្ថាប័នជាតិ អន្តរជាតិ អាជ្ញាធរដែនដី មន្ទីរ-អង្គភាព សមាគមទីភ្នាក់ងារទេសចរណ៍ សហគមមគ្គុទ្ទេសក៍ទេសចរណ៍ សមាគមដឹកជញ្ជូនភ្ញៀវក្រុមហ៊ុនទេសចរណ៍ ភ្ញៀវទេសចរជាតិអន្តរជាតិ សាធារណជនមេត្តាជ្រាបជាព័ត៌មាន»។
កាលថ្ងៃទី ២៨ ខែ កក្កដា ឆ្នាំ ២០២១ រដ្ឋាភិបាលបានសម្រេចបិទខ្ទប់ភូមិសាស្ត្រខេត្តកោះកុង ខេត្តពោធិ៍សាត់ ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ ខេត្តព្រះវិហារ និងខេត្តសៀមរាប ខណៈមេរោគកូវីដ ១៩ ប្រភេទបំប្លែងថ្មីដែលតា (Delta) បាននិងកំពុងឆ្លងចូលកម្ពុជា តាមរយៈពលករ ដែលព្យាយាមឆ្លងចូលប្រទេសតាមបណ្តាខេត្តជាប់ព្រំដែនទាំងនេះ៕