ភ្នំពេញ៖ បន្ទាប់ពីរដ្ឋាភិបាលបានដាក់ចេញនូវសារាចរណែនាំ បិទខ្ចប់បណ្តាខេត្ត ដើម្បីទប់ស្កាត់ការរីករាលដាលមេរោគកូវីដ ១៩ បំប្លែងថ្មីដែលតា (Delta) ចូលក្នុងសហគមន៍ ខេត្តមួយចំនួនបានដាក់ចេញនូវវិធានការបិទខ្ទប់តំបន់ភូមិសាស្ត្រ និងវិធានការទប់ស្កាត់រីរុសនេះជាបន្តបន្ទាប់។
រដ្ឋបាលខេត្តពោធិ៍សាត់បានសម្រេចបិទខ្ទប់ខេត្តពោធិ៍សាត់រយៈពេល ១៤ ថ្ងៃ ចាប់ពីថ្ងៃទី ២៩ ខែកក្កដា ដល់ថ្ងៃទី ១២ ខែសីហា ដើម្បីទប់ស្កាត់ការឆ្លងរាលដាលនៃមេរោគកូវីដ ១៩ ប្រភេទដែលតា (Delta) ក្នុងសហគមន៍។
រដ្ឋបាលខេត្តត្បូងឃ្មុំបានដាក់ចេញនូវវិធានការរដ្ឋបាលរយៈពេល ១៤ ថ្ងៃ ចាប់ពីថ្ងៃទី ២៩ ខែកក្កដា ដល់ថ្ងៃទី ១២ ខែសីហា ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩។
សេចក្តីសម្រេចរបស់រដ្ឋបាលខេត្តត្បូងឃ្មុំ កាលពីថ្ងៃទី ២៩ ខែកក្កដា បញ្ជាក់ថា ការចាកចេញពីលំនៅឋានចាប់ពីម៉ោង ៩ យប់ ដល់ម៉ោង ៣ ទៀបភ្លឺត្រូវបានរឹតត្បិត។
សកម្មភាពមុខរបរ ឬអាជីវកម្ម ក្លឹបកម្សាន្តត្រូវបានផ្អាកជាបណ្តោះអាសន្ន។
រាល់ការជួបជុំ ឬការប្រមូលផ្តុំមនុស្សជាលក្ខណៈឯកជនលើសពី ១០ នាក់ ត្រូវមានការអនុញ្ញាតពីអាជ្ញាធរ។
សេចក្តីសម្រេចដដែលបញ្ជាក់ថា រាល់ការជួបជុំ ឬការប្រមូលផ្តុំមនុស្ស ដើម្បីសេពគ្រឿងស្រវឹងគ្រប់ប្រភេទត្រូវបានហាមឃាត់។
គ្រប់ភោជនីយដ្ឋាន និងអាហារដ្ឋាន ត្រូវបានអនុញ្ញាតឱ្យប្រកបអាជីវកម្មត្រឹមជាលក្ខណៈវេចខ្ចប់។
រាល់សកម្មភាពនៃការជួបជុំ ឬការប្រមូលផ្តុំមនុស្ស ឬសកម្មភាពការងារមុខរបរ និងអាជីវកម្មដែលត្រូវបានអនុញ្ញាតត្រូវអនុវត្តវិធានការសុវត្ថិភាពផែ្នកសុខាភិបាលឱ្យបានម៉ឺងម៉ាត់។
រដ្ឋបាលខេត្តកំពត បានចេញសេចក្តីណែនាំពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩។
សេចក្តីសម្រេចរដ្ឋបាលខេត្តកំពត បញ្ជាក់កាលពីថ្ងៃទី ២៩ ខែកក្កដាថា រដ្ឋបាលខេត្តនេះ ហាមឃាត់ការធ្វើសកម្មភាពមុខរបរ និងអាជីវកម្មក្លិបកម្សាន្ត។
រាល់ការជួបជុំ ឬការប្រមូលផ្តុំមនុស្សជាលក្ខណៈឯកជនដែលមានមនុស្សចូលរួមលើសពី ១០ នាក់ ត្រូវមានការអនុញ្ញាតពីអាជ្ញាធរលើកលែងករណីចាំបាច់។
រដ្ឋបាលខេត្តកំពតបញ្ជាក់ថា រដ្ឋបាលខេត្តនេះដាក់ការហាមឃាត់រាល់ការជួបជុំ ឬការប្រមូលផ្តុំមនុស្ស ដើម្បីសេពគ្រឿងស្រវឹង។
ភោជនីយដ្ឋាន អាហារដ្ឋាន អនុញ្ញាតឱ្យប្រកបអាជីវកម្មត្រឹមជាលក្ខណៈវេចខ្ចប់ប៉ុណ្ណោះ។
រដ្ឋបាលខេត្តនេះ ក៏បានដាក់ចេញបម្រាមគោចរពីម៉ោង ៩ យប់ ដល់ម៉ោង ៣ ទៀបភ្លឺ សម្រាប់ភូមិសាស្ត្រខេត្តទាំងមូល និងទីប្រជុំជននានា។
រាល់សកម្មភាពនៃការជួបជុំ ឬការប្រមូលផ្តុំមនុស្ស សកម្មភាពការងារមុខរបរ និងអាជីវកម្មដែលត្រូវបានអនុញ្ញាតត្រូវអនុវត្តវិធានការសុវត្ថិភាពផ្នែកសុខាភិបាលឱ្យបានម៉ឺងម៉ាត់។
រដ្ឋបាលខេត្តកោះកុង បានដាក់ចេញវិធានការជាបណ្តោះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ ១៩ នៅក្នុងភូមិសាស្រ្តក្រុងខេមរភូមិន្ទ ស្រុកមណ្ឌលសីមា និងស្រុកស្រែអំបិលរយៈពេល ២ សប្តាហ៍។
រដ្ឋបាលខេត្តកោះកុង បញ្ជាក់ក្នុងសេចក្តីសម្រេចចុះថ្ងៃទី ២៩ ខែកក្កដាថា រដ្ឋបាលខេត្តនេះ បានដាក់ការផ្អាកជាបណ្តោះអាសន្ននូវការធ្វើចរាចរណ៍ក្នុងភូមិសាស្រ្តក្រុងខេមរភូមិន្ទ ស្រុកមណ្ឌលសីមា និងស្រុកស្រែអំបិល ចាប់ពីថ្ងៃទី ៣០ ខែកក្កដា ដល់ថ្ងៃទី ១៣ ខែ សីហា ឆ្នាំ ២០២១ ចាប់ពីម៉ោង ៩ យប់ ដល់ម៉ោង ៣ ទៀបភ្លឺ លើកលែងតែចំពោះករណីចាំបាច់។
រដ្ឋបាលខេត្តនេះ បានអនុញ្ញាតឱ្យទីតាំងលក់ម្ហូបអាហារ អាចប្រកបអាជីវកម្មលក់ដូរជាលក្ខណៈវេចខ្ចប់ប៉ុណ្ណោះ។
អាជ្ញាធរខេត្តនេះ ក៏បានផ្អាកជាបណ្តោះអាសន្ននូវការប្រមូលផ្ដុំ ការជួបជុំគ្នាទទួលទានអាហារភេសជ្ជៈ ទទួលទានគ្រឿងស្រវឹង និងការជួបជុំផ្សេងៗលើកលែងតែករណីចាំបាច់។
ចំណែករដ្ឋបាលខេត្តបន្ទាយមានជ័យ ក៏បានដាក់ចេញវិធានការទប់ស្កាត់មេរោគកូវីដ ១៩ ដែលតានេះផងដែរ។
សេចក្តីសម្រេចរដ្ឋបាលខេត្តបន្ទាយមានជ័យ ចុះថ្ងៃទី ២៩ ខែកក្កដា បញ្ជាក់ថា រដ្ឋបាលខេត្តនេះ បានដាក់ការហាមឃាត់ការធ្វើសកម្មភាពមុខរបរ និងអាជីវកម្មក្លិបកម្សាន្ត ហើយរាល់ការជួបជុំ ឬការប្រមូលផ្តុំមនុស្សជាលក្ខណៈឯកជនដែលលើសពី ១០ នាក់ ត្រូវមានការអនុវញ្ញាតពីអាជ្ញាធរលើកលែងករណីចាំបាច់។
សេចក្តីសម្រេចរដ្ឋបាលខេត្តនេះ បញ្ជាក់ថា ការជួបជុំ ឬការប្រមូលផ្តុំមនុស្សដើម្បីសេពគ្រឿងស្រវឹងត្រូវបានហាមឃាត់។
កន្លែងលក់ម្ហូបអាហារ អនុញ្ញាតបានត្រឹមតែលក្ខណៈវេចខ្ចប់លើកលែងតែកន្លែងដែលអាចធានាបាននូវវិធានសុវត្ថិភាពសុខាភិបាល៕