ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លើកឡើងពីសារៈសំខាន់នៃការបណ្តុះបណ្តាលកសិករ ស្តីពីវិធានការចម្រុះគ្រប់គ្រងដី និងសារធាតុចិញ្ចឹមក្នុងផលិតកម្មដំណាំបន្លែសុវត្ថិភាព ខណៈកសិករជាង ៣០០ នាក់ ទទួលបានវគ្គបណ្តុះបណ្តាលនេះ។
លោក វេង សាខុន បានសរសេរនៅលើទំព័រហ្វេសប៊ុករបស់លោកនៅថ្ងៃទី ២៩ កក្កដាថា អំពីមូលដ្ឋានគ្រឹះនៃដំណាំកសិកម្មគឺដី។
លោកលើកឡើងថា ការប្រើប្រាស់ដី ការលើកកម្ពស់គុណភាពដី និងការគ្រប់គ្រងដី ដោយឈរលើគោលការណ៍ ផលិតភាព ចីរភាព និងនិរន្តរភាព គឺជាកិច្ចការចាំបាច់បំផុតក្នុងការចូលរួមអភិវឌ្ឍផលិតកម្មដំណាំកសិកម្ម ធានាបាននូវស្ថិរភាពផលិតភាពផលិតកម្ម គុណភាព និងសុវត្ថិភាពកសិផល បង្កើនទិន្នផល និងប្រាក់ចំណូលរបស់ប្រជាកសិករ។
លោកបានបញ្ជាក់ថា៖ «នាយកដ្ឋានគ្រប់គ្រងធនធានដីកសិកម្មនៃអគ្គនាយកដ្ឋានកសិកម្មក៏បានរៀបចំឯកសារ សម្រាប់ធ្វើការបណ្តុះបណ្តាលស្តីពីវិធានការចម្រុះគ្រប់គ្រងដី និងសារធាតុចិញ្ចឹមរបស់ដីក្នុងផលិតកម្មដំណាំ បន្លែសុវត្ថិភាពនេះដល់ប្រជាកសិករ នៅតាមបណ្តាខេត្តគោលដៅចំនួន ០៨»។
លោកបន្តថា ខេត្តទាំងនោះរួមមាន ខេត្តកណ្តាល ព្រៃវែង កំពង់ចាម ត្បូងឃ្មុំ ក្រចេះ កំពង់ឆ្នាំង បាត់ដំបង និងសៀមរាប ក្រោមកិច្ចសហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តគោលដៅទាំងនោះ។
នាយកដ្ឋានគ្រប់គ្រងធនធានដីកសិកម្មនៃអគ្គនាយកដ្ឋានកសិកម្មបានឲ្យដឹងថា បន្ទាប់ពីបើកវគ្គបណ្តុះបណ្តាលជាបន្តបន្ទាប់ អគ្គនាយកដ្ឋាន បានទទួលសិក្ខាកាម ដែលជាប្រជាកសិករចូលរួមចំនួន ៣៣១ នាក់ក្នុងនោះស្ត្រី ១៤៩ នាក់មកពីសហគមន៍កសិកម្មចំនួន ០៩ នៃខេត្តគោលដៅ៕