បន្ទាយមានជ័យៈ រដ្ឋបាលខេត្តបន្ទាយមានជ័យនៅថ្ងៃទី ៣០ ខែ កក្កដា ឆ្នាំ ២០២១ នេះបានបង្ហាញអត្តសញ្ញាណ អ្នកវិជ្ជមានកូវីដ ១៩ រហូតដល់ ២៧៦ នាក់បន្ថែមទៀត តាមរយៈការធ្វើតេស្តរហ័ស (Rapid Test) និងអ្នកជាសះស្បើយចំនួន ២០៨ នាក់។
សេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យចេញនៅថ្ងៃទី ៣០ ខែកក្កដានេះ បានឱ្យដឹងថា ករណីឆ្លងដែលទើបរកឃើញថ្មីបន្ថែមទៀតចំនួន ២៧៦ នាក់នេះ គឺជាករណីឆ្លងក្នុងព្រឹត្តិការណ៍សហគមន៍ ២០ កុម្ភៈ និងពលករវិលត្រឡប់មកពីប្រទេសថៃ ដែលស្ថិតក្រោមការគ្រប់គ្រងរបស់ខេត្ត។
រដ្ឋបាលខេត្តបានអំពាវនាវដល់ប្រជាពលរដ្ឋដែលបានប៉ះពាល់ដោយផ្ទាល់ ឬប្រយោលជាមួយបុគ្គលដែលវិជ្ជមានកូវីដ ១៩ ទាំង ២៧៦ នាក់ខាងលើ សូមរួសរាន់ ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ ឬប៉ះពាល់ជាមួយអ្នកដទៃជាដាច់ខាត។
លើសពីនេះ ក្នុងករណីមានការប្រែប្រួលសុខភាពខុសប្រក្រតី ដូចជាការឡើងកំដៅលើសពី ៣៧ អង្សាសេ កណ្តាស់ ហៀរសំបោរ ឈឺបំពង់ក មានកំហាក ថប់ដង្ហើម។ល។ សូមប្រញាប់ទាក់ទងទៅក្រុមឆ្លើយតបបន្ទាន់នៃមន្ទីរសុខាភិបាលនៃរដ្ឋបាលខេត្ត ឬមន្ទីរពេទ្យខេត្ត ក្រុង ស្រុក ឬមណ្ឌលសុខភាពឃុំ សង្កាត់ និងអាជ្ញាធរមូលដ្ឋានតាមរយៈទូរស័ព្ទលេខ ០១២ ៧២៤ ០៤២ និងលេខ ០១២ ៩៤៨ ៧៧៩៕