សៀមរាបៈ រដ្ឋបាលខេត្តសៀមរាបបានសម្រេចបន្តបិទផ្សារពោធិ៍បន្ទាយជ័យ ផ្សារដំដែក ផ្សារកំពង់ក្តី ដែលជាទីតាំងឆ្លងរាលដាលជំងឺកូវីដ ១៩ រយៈពេល ២ សប្តាហ៍បន្តទៀត រហូតដល់ថ្ងៃទី ៩ ខែសីហា ខណៈដែលខេត្តទេសចរណ៍មួយនេះបានប្រកាសនៅថ្ងៃនេះ ពីការរកឃើញអ្នកវិជ្ជមានកូវីដ ១៩ ចំនួន ៩៨ នាក់បន្ថែមទៀត។
សេចក្តីសម្រេចរដ្ឋបាលខេត្តសៀមរាប ចុះថ្ងៃទី ៣០ ខែកក្កដា បញ្ជាក់ថា៖ «ត្រូវបន្តបិទផ្សារ [ទាំង ៣] សម្រាប់រយៈពេល ២ សប្តាហ៍បន្តទៀត ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ ១៩ នៅក្នុងភូមិសាស្ត្រទីតាំងដែលត្រូវបិទ និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត រហូតមានការចេញសេចក្តីសម្រេចជាថ្មី»។
រដ្ឋបាលខេត្តសៀមរាបប្រកាសនៅថ្ងៃនេះថា បានរកឃើញអ្នកវិជ្ជមានជំងឺកូវីដ ១៩ ចំនួន ៩៨ នាក់ ជាសះស្បើយចំនួន ២៣ នាក់ និងស្លាប់ចំនួន ១ នាក់។
រដ្ឋបាលខេត្តសៀមរាបកាលពីថ្ងៃទី ២៩ ខែកក្កដា បានសម្រេចកំណត់តំបន់ក្រហម ក្នុងឃុំកំពង់ឃ្លាំង ស្រុកសូទ្រនិគម និងតំបន់លឿងទុំ ក្នុងឃុំកៀនសង្កែ និងឃុំដានរុន ស្រុកសូទ្រនិគម និងសង្កាត់ស្លក្រាម សង្កាត់ស្វាយដង្គំ សង្កាត់គោកចក និងសង្កាត់សាលាកំរើក ក្រុងសៀមរាប ដើម្បីទប់ស្កាត់ការឆ្លងរាលដាល ជំងឺកូវីដ ១៩៕