.jpg)
រដ្ឋបាលខេត្តព្រះវិហារសម្រេចបន្តបិទខ្ទប់ផ្សារកំពង់ប្រណាក ជាបណ្តោះអាសន្ន ស្ថិតនៅក្នុងភូមិកណ្តាល សង្កាត់កំពង់ប្រណាក ក្រុងព្រះវិហាររយៈពេល ២ សប្តាហ៍ ដោយគិតចាប់ពីថ្ងៃទី ៣០ ខែកក្កដា ឆ្នាំ ២០២១ តទៅ។រូបថត រដ្ឋបាលខេត្តព្រះវិហារ
ខេត្តព្រះវិហារៈ រដ្ឋបាលខេត្តព្រះវិហារសម្រេចបន្តបិទខ្ទប់ផ្សារកំពង់ប្រណាក ជាបណ្តោះអាសន្ន ស្ថិតនៅក្នុងភូមិកណ្តាល សង្កាត់កំពង់ប្រណាក ក្រុងព្រះវិហាររយៈពេល ២ សប្តាហ៍ ដោយគិតចាប់ពីថ្ងៃទី ៣០ ខែកក្កដា ឆ្នាំ ២០២១ តទៅ។
ការបិទខ្ទប់នេះធ្វើឡើងក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ ១៩ នៅក្នុងភូមិសាស្ត្រ ទីតាំងដែលត្រូវបានបិទ និងទប់ស្កាត់មិនឱ្យឆ្លងរាលដាលទៅតំបន់ផ្សេងទៀត រហូតដល់មានការជូនដំណឹងសាជាថ្មី។
តាមលិខិតសម្រេចរបស់អភិបាលខេត្តព្រះវិហារ លោក ប្រាក់ សុវណ្ណ ចេញកាលពីម្សិលមិញបង្ហាញថា ក្រៅពីការបិទខ្ទប់ផ្សារកំពង់ប្រណាក រដ្ឋបាលខេត្តក៏បានសម្រេចនិរាករណ៍ សេចក្តីសម្រេចលេខ ០៩១/២១ សសរ ចុះថ្ងៃទី ១៦ ខែកក្កដា ឆ្នាំ ២០២១ របស់រដ្ឋបាលខេត្តព្រះវិហារស្តីពីការបិទខ្ទប់ផ្សារកំពង់ប្រណាក ស្ថិតនៅក្នុងភូមិកណ្តាល សង្កាត់កំពង់ប្រណាក ក្រុងព្រះវិហារ ខេត្តព្រះវិហារផងដែរ។
ក្នុងលិខិតសម្រេចនោះ លោក ប្រាក់ សុវណ្ណ បញ្ជាក់ថា នាយករដ្ឋបាលសាលាខេត្ត ស្នងការនគរបាលខេត្ត មេបញ្ជាការកងរាជអាវុធហត្ថខេត្ត មេបញ្ជាការតំបន់ប្រតិបត្តិការសឹករងព្រះវិហារ ប្រធានមន្ទីរសុខាភិបាលនៃរដ្ឋបាលខេត្ត អភិបាលក្រុងព្រះវិហារ ប្រធានមន្ទីរពាក់ព័ន្ធអង្គភាពពាក់ព័ន្ធ ចៅសង្កាត់កំពង់ប្រណាក គណៈកម្មការគ្រប់គ្រងផ្សារកំពង់ប្រណាក អ្នកវិនិយោគ និងអ្នកធ្វើអាជីវកម្មភាស៊ីផ្សារកំពង់ប្រណាក ត្រូវអនុវត្តសេចក្តីសម្រេចថ្មីរៀងៗខ្លួនឲ្យមានប្រសិទ្ធភាពចាប់ពីថ្ងៃចុះហត្ថលេខាតទៅ។
ដោយឡែកសេចក្តីប្រកាសព័ត៌មានរបស់រដ្ឋបាលខេត្តព្រះវិហារកាលពីម្សិលមិញបានឲ្យដឹងថា ក្នុងភូមិសាស្ត្រខេត្តព្រះវិហាររកឃើញមានអ្នកវិជ្ជមានកូវីដ ១៩ ចំនួន ៣១ នាក់បន្ថែមទៀត ខណៈអ្នកជាសះស្បើយមានចំនួន ២ នាក់។ ក្រុមគ្រូពេទ្យបានបញ្ជូនអ្នកវិជ្ជមានទាំង ៣១ នាក់ទៅសម្រាកព្យាបាលនៅមណ្ឌលព្យាបាលជំងឺកូវីដ ១៩ កម្រិតស្រាល (វិទ្យាល័យ ជា ស៊ីម ត្បែងមានជ័យ មណ្ឌលព្យាបាលជំងឺកូវីដ ១៩ កម្រិតស្រាលវិទ្យាល័យជាំក្សាន្ត និងមណ្ឌលព្យាបាលជំងឺកូវីដ ១៩ កម្រិតស្រាល វិទ្យាល័យរវៀង) ខេត្តព្រះវិហារ។
គិតត្រឹមថ្ងៃទី ៣០ ខែកក្កដា ខេត្តព្រះវិហារបានរកឃើញអ្នកវិជ្ជមានកូវីដ ១៩ ចំនួន ៥៧៥ នាក់ ស្រីចំនួន ២៦២ និងកុមារីចំនួន ២២ នាក់ក្នុងនោះបានជាសះស្បើយចំនួន ៣១៨ នាក់ ស្រីចំនួន ១៤៥ នាក់ និងកុមារីចំនួន ១៣ នាក់ ស្លាប់ចំនួន ១ នាក់។
រីឯអ្នកជំងឺកូវីដ ១៩ ចំនួន ២៥៦ នាក់ ស្រីចំនួន ១១៧ នាក់ និងកុមារីចំនួន ៩នាក់ កំពុងសម្រាកព្យាបាលនៅមន្ទីរពេទ្យបង្អែក ១៦ មករា និងមណ្ឌលព្យាបាលជំងឺកូវីដ ១៩ កម្រិតស្រាល (វិទ្យាល័យ ជា ស៊ីម ត្បែងមានជ័យ និងវិទ្យាល័យជាំក្សាន្ត) ខេត្តព្រះវិហារ។
ក្នុងលិខិតរដ្ឋបាលខេត្តព្រះវិហារសរសេរថា «រដ្ឋបាលខេត្តព្រះវិហារសូមអំពាវនាវដល់បងប្អូនប្រជាពលរដ្ឋ ពិសេស អ្នកប៉ះពាល់ដោយផ្ទាល់ និងដោយប្រយោលទាំងអស់ត្រូវទៅយកសំណាកនៅគ្រប់មណ្ឌលចត្តាឡីស័ក ឬមន្ទីរពេទ្យក្នុងខេត្តព្រះវិហារ។ ករណីមានរោគសញ្ញាសង្ស័យផ្សេងៗសូមទៅពិនិត្យសុខភាពនៅតាមមន្ទីរពេទ្យ ឬមណ្ឌលសុខភាពដែលស្ថិតនៅជិតកន្លែងបងប្អូនរស់នៅ ឬទំនាក់ទំនង លេខទូស័ព្ទ ០១២ ៩៨៥ ៦៨៩ /០៨៨ ៥៩៦ ៤៤៩៦»៕
