កោះកុងៈ អាជ្ញាធរ​ក្រុង​ខេមរភូមិន្ទ នឹង​បើក​យុទ្ធនាការ​ចាក់​វ៉ាក់​សាំង​កូវីដ១៩ ទូទាំង​ក្រុង​ដល់​កុមារ និង​យុវវ័យ ដែល​មាន​អាយុ​ចាប់​ពី​១២ ដល់ ១៧ ឆ្នាំ ចាប់​ពី​ថ្ងៃ​ទី១ ដល់ថ្ងៃទី៧ ខែសីហា ចន្លោះ​ពី​ម៉ោង ៩ ព្រឹក​ដល់​ម៉ោង ៤ រសៀល នៅ​សាខាកាក​បាទ​ក្រហម​ខេត្ត​កោះកុង ស្ថិត​នៅ​ក្នុង​ភូមិ១ សង្កាត់​ស្មាច់មានជ័យ។

លិខិត​របស់​លោក ឈេង សុវណ្ណដា អភិបាល​ក្រុង​ខេមរភូមិន្ទ ចេញ​ផ្សាយ​កាល​ពី​ម្សិលមិញ​បាន​ឲ្យ​ដឹង​ថា អនុគណៈកម្មការ​ចំពោះ​កិច្ច​ចាក់វ៉ាក់​សាំង​កូវីដ​១៩ ខេត្ត​កោះកុង នឹង​បើក​យុទ្ធនាការ​ចាក់​វ៉ាក់​សាំង​កូវីដ​១៩ ដល់​កុមារ និង​យុវវ័យ ដែល​មាន​អាយុ​ចាប់​ពី ១២ ដល់​ក្រោម​១៨ឆ្នាំ នៅ​ទូទាំង​ក្រុង ខេមរភូមិន្ទ ចាប់​ពី​ថ្ងៃទី​ ១ រហូត​ដល់​ថ្ងៃ​ទី ៧ ខែ​សីហា ឆ្នាំ​២០២១ ចន្លោះ​ពី​ម៉ោង ៩​ព្រឹក រហូត​ដល់​ម៉ោង ៤​រសៀល នៅ​សាខា​កាក​បាទ​ក្រហម​ខេត្ត​កោះកុង ស្ថិត​នៅ​ក្នុង​ភូមិ១ សង្កាត់​ស្មាច់​មានជ័យ។

លោក ឈេង សុវណ្ណដា បញ្ជាក់​ក្នុង​លិខិត​នោះ​ថា យុទ្ធនាការ​ចាក់​វ៉ាក់សាំង​កូវីដ​១៩ ជូន​កុមារ និង​យុវវ័យ ដែល​មាន​អាយុ​ចាប់​ពី ១២ ដល់ ១៧​ឆ្នាំ ត្រូវ​បាន​កំណត់​កាល​បរិច្ឆេទ​សម្រាប់​សង្កាត់​ទាំង ៣ នៃ​ក្រុង​ខេមរភូមិន្ទ។ ក្នុង​នោះ​ថ្ងៃ​ទី ១ និង​ទី​២ ខែ​សីហា យុទ្ធនាការ​ធ្វើនៅ​សង្កាត់​ស្មាច់មានជ័យ ដែល​ថ្ងៃទី​១ ចាក់​នៅ​ភូមិ២ និង​ភូមិ​៣ ចំណែក​ថ្ងៃទី​២ ចាក់​នៅ​ភូមិ១ ភូមិ​បឹង​ឃុនឆាង និង​ភូមិ​ស្មាច់​មាន​ជ័យ។

ថ្ងៃទី ៣ និង ទី៤ យុទ្ធនាការ​នៅ​សង្កាត់​ដង​ទង់ ដែល​ថ្ងៃទី ៣​ចាក់​នៅ​ភូមិ៤ និង​ថ្ងៃទី​៤ ចាក់​នៅ​ភូមិ១ ភូមិ២ និង​ភូមិ៣។ ថ្ងៃទី​៥ និង​ទី៦ យុទ្ធនាការ​នៅ​សង្កាត់​ស្ទឹងវែង ដែល​ថ្ងៃទី ៥​ចាក់​នៅ​ភូមិ​ស្ទឹងវែង និង​ថ្ងៃទី ៦​ចាក់ នៅ​ភូមិ​ព្រែកស្វាយ។ ដោយឡែក សម្រាប់​ថ្ងៃ​ទី​៧ គឺ​ចាក់ជូន​អ្នក​ដែល​យឺត​តាម​កាល​កំណត់​ពី​ថ្ងៃ​ទី ១ ដល់​ថ្ងៃ​ទី​៦។

ក្នុងលិខិតលោក ឈេង សុវណ្ណដា បញ្ជាក់ថា ចំពោះកុមារ និង​យុវវ័យ​ដែល​ត្រូវ​ចាក់​វ៉ាក់​សាំង​កូវីដ​១៩ សូម​ភ្ជាប់​ទៅ​ជាមួយ​នូវ​ឯកសារបញ្ជាក់​អត្តសញ្ញាណ​មួយ​ក្នុង​ចំណោម ឯកសារ​បញ្ជាក់​អត្តសញ្ញាណ​ដូចជា កុមារ​អាយុ​ចាប់​ពី ១២ ដល់​ក្រោម ១៥​ឆ្នាំ សូម​ភ្ជាប់​ជាមួយសំបុត្រ​កំណើត ឬ​សៀវភៅ​គ្រួសារ​ឬ​សៀវភៅ​ស្នាក់​នៅ ឬ​លិខិត​ឆ្លងដែន។

ចំណែក​យុវវ័យ​អាយុ​ចាប់​ពី ១៥ ដល់​ក្រោម ១៨​ឆ្នាំ សូម​ភ្ជាប់​ជាមួយ​នូវ​អត្តសញ្ញាណ​ប័ណ្ណ​សញ្ជាតិ​ខ្មែរ ឬ​សំបុត្រ​កំណើត ឬ​សៀវភៅ​គ្រួសារ ឬ​សៀវភៅ​ស្នាក់​នៅ ឬ​លិខិត​ឆ្លង​ដែន។

លោក​ថ្លែង​ថា៖ «ក្នុង​ករណី​កុមារា កុមារី ​ឬ​យុវជន យុវនារី ណា​មិន​មាន​ឯកសារ​ខាង​លើ សូម​មាតា ឬ​អាណា​ព្យាបាល​រូតរះ​ទៅ​សាលាសង្កាត់​របស់​បង​ប្អូន ដើម្បី​ស្នើ​សុំ​លិខិត​បញ្ជាក់​អត្តសញ្ញាណ​សម្រាប់​ប្រើប្រាស់​ក្នុង​ការ​ចាក់​វ៉ាក់សាំង កូវីដ​១៩ ឱ្យ​ទាន់​ពេល​វេលា»។

ដើម្បី​ធានា​បាន​នូវ​សន្តិសុខ​សណ្តាប់​ធ្នាប់ របៀប​រៀបរយ និង​ធានា​បាន​នូវ​ការ​អនុវត្ត​វិធានការ​សុខាភិបាល ឱ្យ​បាន​ខ្ជាប់​ខ្ជួន រដ្ឋបាល​ក្រុង​ខេមរភូមិន្ទ អំពាវនាវ​ឱ្យ​ប្រជាពលរដ្ឋ​ដែល​ជា​មាតា​បិតា អាណា​ព្យាបាល​ជូន​កូនចៅ ទៅ​ទទួល​ការ​ចាក់​វ៉ាក់សាំង នៅ​ទីតាំង និង​កាល​បរិច្ឆេទ ដែល​បាន​កំណត់ និង​គោរព​ឱ្យ​បាន​ម៉ឺងម៉ាត់​នូវ​វិធាន​ការ​ការពារ ៣​កុំ និង ៣ ការពារ របស់​រាជរដ្ឋាភិបាល​កម្ពុជា​និង​វិធានការ​នានា​របស់ក្រសួង​សុខាភិបាល៕