.jpg)
មន្ត្រីរដ្ឋបាលខេត្តបន្ទាយមានជ័យ ចុះពិនិត្យទីតាំងធ្វើចត្តាឡីស័កបន្ថែមនៅក្នុងខេត្តបន្ទាយមានជ័យ។ រូបថត រដ្ឋបាលខេត្ត
បន្ទាយមានជ័យៈ រដ្ឋបាលខេត្តបន្ទាយមានជ័យប្រកាសរកឃើញវិជ្ជមានកូវីដ១៩ ចំនួន ៣០១នាក់ នៅថ្ងៃទី ៣០ ខែកក្កដា និងមិនមានករណីជាសះស្បើយទេ នៅថ្ងៃទី៣១ ខែកក្កដានេះ។
តាមសេចក្តីប្រកាសព័ត៌មាន របស់រដ្ឋបាលខេត្តបន្ទាយមានជ័យ នៅថ្ងៃនេះ បានឲ្យដឹងថា លទ្ធផលតេស្តរហ័សនៅថ្ងៃទី៣១ ខែកក្កដានេះ មិនមានករណីជាសះស្បើយអ្នកជំងឺកូវីដ១៩ទេ ខណៈលទ្ធផលពីមន្ទីរពិសោធន៍ជាតិភ្នំពេញ (NIPH) នៅថ្ងៃទី៣០ ខែកក្កដា បានរកឃើញវិជ្ជមានកូវីដ១៩ ចំនួន ៣០១ នាក់ ដែលជាករណីឆ្លងចូលក្នុងព្រឹត្តិការណ៍សហគមន៍ ២០ កុម្ភៈ។
ក្នុងសេចក្តីប្រកាសរដ្ឋបាលខេត្តបន្ទាយមានជ័យសរសេរថា «សូមជម្រាបជូនបងប្អូនប្រជាពលរដ្ឋ និងសាធារណជន ដែលបានប៉ះពាល់ដោយផ្ទាល់ សូមរួសរាន់ទៅជួបក្រុមគ្រូពេទ្យ និងធ្វើចត្តាឡីស័ក ដើម្បីយកសំណាកទៅពិនិត្យ។ ចំណែកអ្នកប៉ះពាល់ដោយប្រយោលជាមួយអ្នកវិជ្ជមានកូវីដ១៩ ទាំង ៣០១នាក់ សូមរួសរាន់ធ្វើចត្តាឡីស័កតាមផ្ទះ ក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធនិងប៉ះពាល់ ជាមួយអ្នកដទៃជាដាច់ខាត»។
រដ្ឋបាលខេត្តនេះបញ្ជាក់ថា ក្នុងករណីមានការប្រែប្រួលសុខភាពខុសប្រក្រតី ដូចជា ឡើងកម្តៅលើសពី៣៧ អង្សាសេ ក្អក កណ្តាស់ ហៀរសំបោរ ឈឺបំពង់ក មានកំហាក ថប់ដង្ហើម ជាដើម ត្រូវប្រញាប់ទំនាក់ទំនងទៅក្រុមឆ្លើយតបបន្ទាន់នៃមន្ទីរសុខាភិបាល នៃរដ្ឋបាលខេត្ត ឬមន្ទីរពេទ្យខេត្ត ក្រុង ស្រុក ឬមណ្ឌលសុខភាពឃុំ សង្កាត់ និងអាជ្ញាធរមូលដ្ឋាន តាមរយៈទូរស័ព្ទលេខ ០១២ ៧២៤ ០៤២ /០១២ ៩៤៨ ៧៧៩៕
