ភ្នំពេញ៖ យុទ្ធនាការចាក់វ៉ាក់សាំងកូវីដ ១៩ សម្រាប់ក្មេង និងយុវវ័យអាយុចាប់ពីអាយុ ១២ ឆ្នាំ ទៅក្រោម ១៨ ឆ្នាំ បានចាប់ផ្តើមដំណើរការហើយនៅព្រឹកនេះ បន្ទាប់ពីលោកនាយករដ្ឋមន្ត្រី ហ៊ុន សែន បានដឹកនាំចៅៗរបស់លោក ជិត ២០ រូប មកទទួលវ៉ាក់សាំងនៅវិមានសន្តិភាព។
កម្ពុជាដាក់ចេញផែនការសម្រាប់ការចាក់វ៉ាក់សាំងបង្ការជំងឺកូវីដ ១៩ លើកុមារ-យុវវ័យ អាយុចាប់ពី ១២ ឆ្នាំទៅក្រោម ១៨ ឆ្នាំ ដោយប្រើប្រាស់ប្រភេទវ៉ាក់សាំង ស៊ីណូវ៉ាក់ ផលិតនៅប្រទេសចិន ខណៈតាមការរំពឹងទុកកុមារអាយុចាប់ពី ១២ ដល់ក្រោម ១៨ ឆ្នាំនេះ គឺមានប្រមាណ ២ លាននាក់ ដែលនឹងត្រូវចាក់វ៉ាក់សាំង បន្ថែមពីលើចំនួនប្រជាពលរដ្ឋវ័យ ១៨ ឆ្នាំឡើង ប្រមាណជា ១០ លាននាក់។
លោកនាយករដ្ឋមន្ត្រី ហ៊ុន សែន បានថ្លែងក្នុងឱកាសនោះថា ការចាក់វ៉ាក់សាំងជូនកុមារក្នុងពេលនេះ គឺមិនមែនជារឿងចៃដន្យនោះទេ នេះគឺជាការយកចិត្តទុកដាក់របស់រដ្ឋាភិបាល ខណៈដែលកុមារ គឺត្រូវចាត់ទុកជាទំពាំងស្នងឫស្សី ដែលទាមទារឱ្យមានការយកចិត្តទុកដាក់។
លោកបានបញ្ជាក់ថា៖ «យើងក៏បានដឹងថា កុមារជាទំពាំងស្នងឫស្សី ប្រសិនបើកុមារ មានការខូចខាត់ចាប់ពីពេលនេះ យើងនឹងពុំមានឫស្សីដែលល្អនោះទេ។ មួយផ្នែកទៀត ផលប៉ះពាល់ដែលប៉ះពាល់នៃពេលវេលានៃកូវីដ ១៩ នេះ គឺប៉ះពាល់យ៉ាងធ្ងន់ទៅលើការបណ្តុះបណ្តាលផ្នែកធនធានមនុស្ស»។
ជាមួយនឹងការថ្លែងបែបនេះ លោកនាយករដ្ឋមន្ត្រីក៏បានអះអាងថា រដ្ឋាភិបាលក៏នឹងពិចារណាលើការបើកសាលារៀននៅក្នុងកម្រិតណាមួយ បន្ទាប់យុទ្ធនាការចាក់វ៉ាក់សាំងដល់កុមារ អាយុចាប់ពី ១២ ឆ្នាំ ដល់ក្រោម ១៨ ឆ្នាំនេះ៕