.jpg)
ស្ថានភាពពលករខ្មែរប្រចាំនៅប្រទេសថៃ កំពុងរៀបចំវិលត្រឡប់មកប្រទេសកម្ពុជាវិញ កាលពីថ្ងៃទី ២៣ កក្កដា។ រូបថត សង់ត្រាល់
ភ្នំពេញៈ ក្រសួងការងារ បណ្តុះបណ្តាលវិជ្ជាជីវៈ ប្រាប់កុំឱ្យពលករខ្មែរដែលកំពុងរស់នៅក្នុងប្រទេសថៃ ចល័ត ឬវិលត្រឡប់មកកម្ពុជា ក្នុងពេល ១៤ ថ្ងៃ ខណៈ ដែលកំពុងតែមានការផ្ទុះឆ្លងរាលដាលខ្លាំងនៃជំងឺកូវីដ ១៩ នាពេលនេះ ព្រោះអាជ្ញាធរថៃនឹងចាត់វិធានការតឹងរ៉ឹងចំពោះអ្នកដែលល្មើស នឹងបម្រាម។
ការប្រកាសយ៉ាងដូច្នេះ បានធ្វើឡើង បន្ទាប់ពីស្ថានភាពឆ្លងរីករាលដាលជំងឺកូវីដក្នុងប្រទេសថៃ មានសម្ទុះខ្លាំងក្លា ហើយនាំឱ្យពលករខ្មែរជាច្រើនបានសម្រុកមកកម្ពុជាវិញ និងថែមទាំងបាននាំយកនូវជំងឺកូវីដ ១៩ បំប្លែងថ្មី ចូលកម្ពុជាផងដែរ។ សេចក្តីជូនដំណឹងរបស់ក្រសួងការងារចេញនៅថ្ងៃ ៣០ កក្កដា ស្នើពលករខ្មែរ ចូលរួមការសហការ ដោយផ្អាកការធ្វើដំណើរ ឬចល័តចេញពីកន្លែងស្នាក់នៅ និងធ្វើការនៅប្រទេសថៃ ហើយឆ្ពោះមកព្រំដែនកម្ពុជា-ថៃ ចំនួន ១៤ ថ្ងៃ។
ក្រសួងបញ្ជាក់ថា៖ «កុំចល័តចេញពីកន្លែងស្នាក់នៅបច្ចុប្បន្នរបស់ខ្លួន ឆ្ពោះមកព្រំដែនកម្ពុជា-ថៃ ចំនួន ១៤ ថ្ងៃ ចាប់ពីថ្ងៃទី ៣០ ខែកក្កដានេះ រហូតដល់ថ្ងៃទី ១២ ខែសីហា ឆ្នាំ ២០២១។ ប្រសិនបើមានធុរៈចាំបាច់ ឬចប់ការងារ ត្រូវវិលត្រឡប់មកប្រទេសកម្ពុជាវិញ សូមបងប្អូនមេត្តារង់ចាំរហូតដល់ក្រោយថ្ងៃទី ១២ ខែសីហា»។
ក្រសួងបន្តថា ប្រសិនជាបងប្អូនធ្វើដំណើរមកព្រំដែនកម្ពុជា-ថៃ តាមមធ្យោបាយណាមួយក៏ដោយ គឺបងប្អូននឹងត្រូវគេតម្រូវឱ្យធ្វើដំណើរវិលត្រឡប់ទៅកន្លែងដើមវិញ ហើយម្ចាស់រថយន្ត ឬមេខ្យល់ ដែលបំផុស ឬដឹកជញ្ជូនបងប្អូនពលករគឺល្មើសនឹងបម្រាមរបស់អាជ្ញាធរថៃ ហើយត្រូវប្រឈមនឹងការចាត់វិធានការតាមច្បាប់ផងដែរ។
ជាមួយគ្នានេះ ក្រសួងការងារក៏បានប្រកាសដែរថា ក្នុងរយៈពេលស្នាក់នៅ និងធ្វើការនៅប្រទេសថៃ ប្រសិនជាបងប្អូនពលករមានបញ្ហានៅកន្លែងធ្វើការ ឬមានបញ្ហាជីវភាពលំបាកខ្លាំងគឺអាចទំនាក់ទំនងទៅស្ថានឯកអគ្គរាជទូតកម្ពុជាប្រចាំប្រទេសថៃ នៅរៀងរាល់ម៉ោងធ្វើការដើម្បីស្ថានទូត ក៏ដូចជាក្រុមការងារស្ម័គ្រចិត្តពិនិត្យ និងខិតខំស្វែងរកដំណោះស្រាយជូនបងប្អូន។
លោក ហេង សួរ កាលពីថ្ងៃទី ២៩ កក្កដា បានសរសេរនៅលើបណ្តាញហ្វេសប៊ុករបស់លោកថា ចាប់ពីម៉ោងនេះតទៅ សូមបងប្អូនពលករខ្មែរ ដែលកំពុងស្នាក់នៅ និងធ្វើការនៅប្រទេសថៃទាំងអស់កុំចល័តចេញពីកន្លែង ដែលខ្លួនកំពុងស្នាក់នៅឆ្ពោះមកព្រំដែនកម្ពុជា-ថៃ។
លោកបញ្ជាក់ថា៖ «ចំពោះមុខ ប្រសិនជាបងប្អូនធ្វើដំណើរមកព្រំដែនកម្ពុជា-ថៃ តាមមធ្យោបាយណាក៏ដោយ គឺបងប្អូននឹងត្រូវអាជ្ញាធរមានសមត្ថកិច្ចថៃតម្រូវឱ្យធ្វើដំណើរវិលត្រឡប់ទៅកន្លែងដើមវិញ»។
លោក លឹម សុផុន ក្រុមការងារនៃអង្គការសង់ត្រាល់ ប្រចាំប្រទេសថៃបានប្រាប់ភ្នំពេញប៉ុស្តិ៍នៅថ្ងៃទី ៣០ ខែកក្កដាថា ក្នុងពេលនេះ សម្ទុះនៃការវិលត្រឡប់របស់ពលករខ្មែរ ចូលប្រទេស គឺពិតជាមានភាពខ្លាំងក្លាខ្លាំងណាស់។ លោកបន្តថា ពលករ-ខ្មែរ បានធ្វើការចល័តទីតាំង ជាពិសេសសម្រុកមកតាមព្រំដែនកម្ពុជា ថៃ ដើម្បីបានចូលក្នុងប្រទេសវិញ។ ប៉ុន្តែពួកគេ មិនបានដឹងថា ការវិលត្រឡប់បែបនេះ គឺប្រឈមនឹងគ្រោះថ្នាក់ខ្លាំងប៉ុនណានោះទេ។
លោកបានរៀបរាប់ថា៖ «ពួកគាត់ ភាគច្រើនសម្រុកទៅពេលយប់ តាមរយៈមេខ្យល់ ដោយសារតែពួកគេបារម្ភពីស្ថានភាពនៅក្នុងប្រទេសថៃ ដែលមានការឆ្លងខ្លាំង។ ពេលមកដល់ព្រំដែន ពួកគាត់មិនបានដឹងថា ព្រំដែនមានរឹតបន្តឹងទេ ហើយនាំឱ្យពលករខ្មែរវិលវល់មិនដឹងទៅណា ហើយពិបាករកកន្លែងស្នាក់ទៀត»។
កាលពីពាក់កណ្តាលខែកក្កដា កម្ពុជា បានប្រកាសរកឃើញវីរុសបំប្លែងថ្មី Delta ចំនួន ៣៧ ករណីថ្មី ដោយក្នុងនោះមាន ១៣ នាក់ជាពលករខ្មែរ ដែលធ្វើដំណើរមកពីប្រទេសថៃចូលមកកម្ពុជា តាមច្រកអូរបីជាន់ និងអូរស្មាច់។ ចំណែក ២១ នាក់ទៀត គឺជាពលរដ្ឋខ្មែរ ដែលត្រឡប់មកពីប្រទេសថៃដូចគ្នា ដោយមានអ្នកខ្លះចូលមកតាមច្រកប៉ោយប៉ែត និងច្រកម៉ាឡៃ ខណៈ ៣ នាក់ទៀត គឺជាជនជាតិឥណ្ឌូនេស៊ី ដែលមកដល់កម្ពុជា តាមអាកាសយានដ្ឋាន។
កម្ពុជាបានរកឃើញអ្នកមានវិជ្ជមានវីរុសកូវីដ ១៩ បំប្លែងថ្មី ប្រភេទ B.1.617.2 (Delta) សរុបចំនួន ៧៥ នាក់ ដែលសុទ្ធតែជាករណីនាំចូលគិតចាប់ពីថ្ងៃទី ៣១ ខែមីនា ឆ្នាំ ២០២១ រហូតដល់ថ្ងៃទី ១៤ ខែកក្កដា ឆ្នាំ ២០២១៕
