.jpg)
ក្មេងៗទទួលបានការចាក់វ៉ាក់សាំងបង្ការជំងឺកូវីដ ១៩ នៅសង្កាត់កោះដាច់ កាលពីថ្ងៃម្សិលមិញ។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន បញ្ជាក់ថា ផលប្រយោជន៍នៃការចាក់វ៉ាក់សាំងដល់កុមារ និងយុវវ័យអាចអនុញ្ញាតដល់ការបើកដំណើរការឡើងវិញ សម្រាប់សាលារៀន និងគ្រឹះស្ថានអប់រំនានាយ៉ាងហោចណាស់ថ្នាក់អនុវិទ្យាល័យសម្រាប់បវេសនកាលឆ្នាំសិក្សា ២០២១-២០២២ នៅខែកញ្ញា ឬខែតុលាខាងមុខ។ តំណាងគ្រឹះស្ថានសិក្សាឯកជនសាទរ ហើយថា បានត្រៀមរួចរាល់សម្រាប់បវេសនកាលនេះ។
លោកនាយករដ្ឋមន្ដ្រីថ្លែងបែបនេះ ក្នុងពេលបើកយុទ្ធនាការចាក់វ៉ាក់សាំងការពារជំងឺកូវីដ ១៩ ដល់កុមារ និងយុវវ័យ ដែលមានអាយុចាប់ពី ១២ ឆ្នាំដល់ ១៧ ឆ្នាំ នៅវិមានសន្តិភាព កាលពីថ្ងៃទី ១ ខែសីហា។
លោកថ្លែងថា៖ «ការចាក់វ៉ាក់សាំងលើកុមារ និងយុវវ័យផលប្រយោជន៍ គឺយើងអាចបើកដំណើការឡើងវិញនូវសាលារៀន និងគ្រឹះស្ថានអប់រំនានា។ យ៉ាងហោចណាស់យើងអាចចាប់ផ្ដើមបើកសាលារៀនពីថ្នាក់អនុវិទ្យាល័យឡើងទៅសម្រាប់បវេសនកាល ២០២១-២០២២ នៅខែកញ្ញា ឬខែតុលាខាងមុខ»។
លោកបញ្ជាក់ថា ការបើកសាលារៀនឡើងវិញនេះ គឺសំដៅកាត់បន្ថយផលប៉ះពាល់លើការអប់រំរបស់កុមារ និងយុវវ័យ ដែលជាទំពាំងស្នងឫស្សី និងជាសសរទ្រូងរបស់សង្គម។
លោកនាយករដ្ឋមន្ដ្រីថ្លែងថា ការចាក់វ៉ាក់សាំងដល់កុមារ និងយុវវ័យបានផ្ដល់ផលប្រយោជន៍ ទី ១ ការពារការឆ្លងនៅក្នុងក្រុមគ្រួសារ។ ទី ២ ធានាបាននូវទំពាំងស្នងឫស្សីដែលមានសុខភាពរឹងមាំ។ ទី ៣ កាត់បន្ថយអត្រាមរណៈភាពកុមារ និងយុវវ័យ។ ទី ៤ ចាប់ផ្ដើមបើកសាលារៀនឡើងវិញ។
បើតាមលោកនាយករដ្ឋមន្ដ្រី ការបិទសាលារៀនមួយរយៈពេលកន្លងមកបានបង្កផលប៉ះពាល់គុណភាពនៃការរៀនសូត្រ។ លោកថ្លែងថា៖ «ខ្ញុំបានជម្រាបហើយ ការព្រួយបារម្ភធំបំផុតរបស់ពិភពលោក ឬបើមិនរបស់ពិភពលោក គឺជារបស់រាជរដ្ឋាភិបាលកម្ពុជា ក៏ដូចជារបស់ខ្ញុំ គឺការបាត់បង់ធនធានមនុស្សដែលយើងត្រូវបណ្ដុះចេញ»។
លោកបន្ថែមថា ទោះបីកម្ពុជាបានរៀបចំឱ្យសិស្សទទួលបានការសិក្សាតាមអនឡាញក៏មិនដូចការរៀនផ្ទាល់ដែរ។ ដូច្នេះការចាក់វ៉ាក់សាំងសព្វគ្រប់ដល់កុមារ និងយុវវ័យ គឺបានផ្ដល់ឱកាសដល់ការបើកសាលារៀនឡើងវិញ។
លោក ហ៊ុន សែន ថ្លែងថា៖ «គ្រូក៏បានចាក់ សិស្សក៏បានចាក់ ដូច្នេះវាមិនសូវព្រួយ ហើយបើសិនជាឆ្លង វាកាត់បន្ថយការចម្លង ហើយបើសិនវាឆ្លង ក៏វាមិនឈឺធ្ងន់ធ្ងរដែរ វាដូចផ្ដាសាយធម្មតាអ៊ីចឹង»។
ទាក់ទងនឹងការបើកដំណើរការសាលារៀនឡើងវិញនេះ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ស្នើឱ្យយោងតាមប្រសាសន៍របស់នាយករដ្ឋមន្ត្រី។ ប៉ុន្ដែកាលពីថ្ងៃទី ២២ ខែកក្កដា លោក រស់ សុវាចា បានបញ្ជាក់ថា ការបើកឱ្យដំណើរការគ្រឹះស្ថានមធ្យមសិក្សាឡើងវិញជាជំហានៗនឹងអាចធ្វើឡើងនៅពេលការចាក់វ៉ាក់សាំងបង្ការវីរុសកូវីដ ១៩ ដល់កុមារប្រមាណ ២ លាននាក់ចប់រួចរាល់នាពេលខាងមុខ។
លោក ប៉ិច បូឡែន ប្រធានក្រុមប្រឹក្សាភិបាលសហព័ន្ធសេវាអប់រំនៅកម្ពុជា សាទរចំពោះការបញ្ជាក់របស់លោកនាយករដ្ឋមន្ដ្រីចំពោះការបើកសាលារៀនឡើងវិញនេះ។ លោកថា គ្រឹះស្ថានសិក្សាឯកជនក៏បានរំពឹង និងត្រៀមលក្ខណៈរួចហើយក្នុងការសហការជាមួយក្រសួងអប់រំលើការបើកដំណើរការសាលារៀនឡើងវិញនាខែកញ្ញា ឬតុលាខាងមុខនេះដែរ ដើម្បីផ្ដល់ការអប់រំ ការបង្រៀន និងការរៀនដល់សិស្សឱ្យបានទាន់ពេលក្នុងបវេសនកាលថ្មី។
លោកថ្លែងថា៖ «នៅពេលយើងអាចបើកដំណើរការសាលារៀនឡើងវិញយ៉ាងហោចណាស់ពីថ្នាក់អនុវិទ្យាល័យ គឺជារឿងល្អមែនទែន ក្នុងនាមខ្ញុំជាតំណាងខាងវិស័យអប់រំឯកជន គឺគាំទ្រមែនទែននូវចំណាត់ការ និងការសម្រេចចិត្ដរបស់សម្ដេចនាយករដ្ឋមន្ដ្រី។ ព្រោះសិស្សរបស់យើងពីថ្នាក់ទី ៧ ដល់ថ្នាក់ ទី ១២ ដែលមានអាយុពី ១៣ ដល់ ១៨ ឆ្នាំ គឺជាធនធានកម្លាំងសេដ្ឋកិច្ចដ៏ខ្លាំងមែនទែនសម្រាប់ជួយអភិវឌ្ឍសេដ្ឋកិច្ចប្រទេសរបស់យើងក្នុងអំឡុងពេល ៥-១០ ឆ្នាំខាងមុខទៀត»។
បើតាមលោក បូឡែន ការបើកដំណើរការសាលារៀនឡើងវិញក៏បានជួយសម្រួលច្រើនដល់សុខភាពផ្លូវចិត្ដសារពាង្គកាយ និងការសិក្សារបស់សិស្ស បន្ទាប់ពីពួកគេខកខានចូលរៀនរយៈពេលជិត ២ ឆ្នាំកន្លងមក ដែលកំពុងប្រឈមផលប៉ះពាល់ខ្លាំង ដោយសារតែការរស់នៅតែក្នុងផ្ទះ និងក្នុងបន្ទប់ដែលបិទជិត។
អង្គការសហប្រជាជាតិ (UN) តាមរយៈសេចក្ដីប្រកាសព័ត៌មានមួយកាលពីថ្ងៃទី ២០ ខែកក្កដាបានបន្តលើកទឹកចិត្ត និងគាំទ្រឱ្យរាជរដ្ឋាភិបាលកម្ពុជាផ្តល់អាទិភាពដល់ការបើកដំណើរការសាលារៀនឡើងវិញឱ្យបានឆាប់បំផុត តាមដែលអាចធ្វើទៅបាន ដើម្បីបញ្ចៀសការបន្តធ្លាក់ចុះនៃការអភិវឌ្ឍធនធានមនុស្ស។
បើតាមសេចក្ដីប្រកាសរបស់ UN ការអប់រំមានសារៈសំខាន់យ៉ាងខ្លាំង ចំពោះការអភិវឌ្ឍផ្ទាល់ខ្លួន និងសក្តានុពលពេញមួយជីវិតរបស់កុមារ៕
វីដេអូ៖
