កំពង់ស្ពឺៈ កុមារីវ័យ ១២ ឆ្នាំម្នាក់ ត្រូវបានឪពុកម្ដាយប្រទះឃើញស្លាប់ ដោយចងកជាប់នឹងចម្រឹងបង្អួចសង្ស័យជាអំពើអត្តឃាត ប៉ុន្តែក្រុមមន្ត្រីនគរបាលជំនាញដែលចុះធ្វើកោសល្យវិច័យសពកុមារីរងគ្រោះ ថា ការស្លាប់របស់នាង គឺជាអំពើឃាតកម្ម និងកំពុងបន្តស៊ើបអង្កេតស្វែងរកមុខសញ្ញាជនសង្ស័យ។
លោក ឃុត ផាន់ណា នាយនគរបាលប៉ុស្តិ៍កាត់ភ្លុក បានថ្លែងថា កុមារីរងគ្រោះឈ្មោះ គ្រឿន ស្រីរ័ត្ន មានលំនៅភូមិវាលស្វាង ឃុំកាត់ភ្លុក ស្រុកបសេដ្ឋ ត្រូវបាន ឪពុកម្ដាយ ប្រទះឃើញស្លាប់កាលពីល្ងាចថ្ងៃទី ២៩ ខែ កក្កដា ឆ្នាំ ២០២១ ក្នុងស្ថានភាពចងកជាប់នឹងចម្រឹងបង្អួច ដែលសង្ស័យជាករណីធ្វើអត្តឃាតកម្មដោយខ្លួនឯង។
លោកថា៖ «ប៉ុន្តែ នៅព្រឹកថ្ងៃទី ៣០ ខែកក្កដា ក្រុមមន្ត្រីនគរបាលជំនាញនៃស្នងការដ្ឋាននគរបាលខេត្តកំពង់ស្ពឺ និងអង្គភាពការពារកុមារ ដែលបានចុះពិនិត្យ និងធ្វើកោសល្យវិច័យសាកសពកុមារីរងគ្រោះ បានអះអាងថា ការស្លាប់របស់កុមារីរងគ្រោះ គឺជាអំពើឃាតកម្ម»។
ផ្អែកតាមការរៀបរាប់របស់ឪពុកម្ដាយ ស្ថានភាពនៃសពជនរងគ្រោះ គឺត្រូវបានគេសម្លាប់ដោយយកក្រណាត់ខោជើងវែង ចងកជាប់នឹងចម្រឹងបង្អួចដែលមានកម្ពស់ ១,២ ម៉ែត្រពីកម្រាលឥដ្ឋការ៉ូ ប៉ុន្តែជើងរបស់នាងគឺនៅឈរជាប់នៅលើការ៉ូនោះដូចធម្មតា ដែលស្ថានភាពនេះបង្ហាញថា នាងមិនមែនធ្វើអត្តឃាតខ្លួនឯងនោះទេ។ នេះបើតាមរបាយការណ៍អង្គភាពការពារកុមារ។
លោក James McCabe នាយកប្រតិបត្តិ អង្គភាពការពារកុមារ (CPU) បញ្ជាក់ថា ៖ «ភ័ស្តុតាងជាក់ស្តែងនៅកន្លែងកើតហេតុ និងនៅលើសាកសពបានបង្ហាញយើងថា នេះមិនមានជាអំពើអត្តឃាតនោះទេ ហើយជាលទ្ធផលយើងបានបង្កើតជាក្រុមការងារចម្រុះ ដើម្បីធ្វើការស៊ើបអង្កេតជាករណីឃាតកម្មវិញ»។
លោក ឆិល ណាគ្រី ឪពុកកុមារីរងគ្រោះប្រាប់ ភ្នំពេញ ប៉ុស្តិ៍ថា កូនរបស់លោកមិនដែលឈ្លោះទាស់ទែងជាមួយក្មេងៗនៅផ្ទះជិតខាងគ្នានោះទេ។ ចំណែកលោកជាឪពុកម្ដាយក៏មិនដែលមានឈ្លោះជាមួយអ្នកជិតខាងណាដែរ ព្រោះអ្នកជិតខាងភាគច្រើនសុទ្ធតែជាបងប្អូនជីដូនមួយ។
លោកនិយាយថា នៅល្ងាចថ្ងៃកើតហេតុ ក្រោយត្រឡប់ពីស្ទូងស្រូវនៅឯស្រែ ប្រពន្ធរបស់លោកក៏រៀបចំធ្វើម្ហូបអាហារ។ ប៉ុន្តែមិនឃើញកូនស្រីរបស់លោកនោះទេ។ បន្ទាប់មកលោកក៏ឮសំឡេងម្ដាយក្មេកលោកស្រែកថា «ជួយផង! អារ័ត្នចងក!»។
លោកបញ្ជាក់ថា៖ «ខ្ញុំបានស្ទុះចូលទៅក្នុងផ្ទះ ហើយឃើញកូនស្រីខ្ញុំ ចងកស្លាប់ជាប់នឹងចម្រឹងបង្អួច ជាមួយក្រណាត់ខោជើងវែង។ ប៉ុន្តែជើងរបស់នាងឈរនៅលើកម្រាលឥដ្ឋការ៉ូ ហើយមានស្នាមក្រចកមុតកផ្នែកខាងក្រោមចង្កា»។ លោកបន្ថែមថា៖ «ឃើញដូច្នេះ ពួកយើងជាឪពុកម្ដាយ គិតថានាងចងកសម្លាប់ខ្លួន ប៉ុន្តែបើសិនជានាងពិតជាត្រូវបានគេសម្លាប់ ដូចការអះអាងរបស់មន្ត្រីនគរបាលជំនាញមែននោះ មិនដឹងថា នាងភ័យខ្លាច និងឈឺចាប់កម្រិតណាទេ»។ លោក ណាគ្រី បានអំពាវនាវសុំឲ្យអាជ្ញាធរជួយស្វែងរកមុខជនដៃដល់មកផ្ដន្ទាទោសទៅតាមច្បាប់ ដើម្បីផ្ដល់យុត្តិធម៌ដល់កូនស្រីរបស់លោក។
នៅពេលនេះ ក្រុមសមត្ថកិច្ចកំពុងបន្តស្រាវជ្រាវស្វែងរកអត្តសញ្ញាណជនសង្ស័យ ដើម្បីចាត់វិធានការតាមនីតិវិធីច្បាប់។ នេះបើតាម លោក អ៊ុំ ចំរើន អធិការស្រុកបសេដ្ឋថ្លែងពីម្សិលមិញ។ លោកថា ប៉ុន្តែមកទល់ពេលនេះក្រុមសមត្ថកិច្ចក៏ដូចជាក្រុមមន្ត្រីជំនាញនៃអង្គភាពការពារកុមារ នៅមិនទាន់រកឃើញតម្រុយអំពីមុខសញ្ញាជនសង្ស័យក្នុងអំពើឃាតកម្មនេះនៅឡើយទេ៕