ព្រៃវែងៈ ទីបំផុតសពអ្នកជំងឺកូវីដ ត្រូវបានក្រុមគ្រួសារសាច់ញាតិ នាំយកទៅបញ្ចុះនៅឯស្រុកកំណើតក្នុងខេត្តត្បូងឃ្មុំវិញ បន្ទាប់ពីអ្នកភូមិរាប់សិបគ្រួសារ ក្នុងឃុំព្រែកខ្សាយ (ក) នៃស្រុកពាមរក៏ ខេត្តព្រៃវែង បាននាំគ្នារារាំងមិនឲ្យយកសពអ្នកជំងឺកូវីដ ទៅកប់នៅលើទីទួលបញ្ចុះសព ដែលស្ថិតនៅខាងក្រោយភូមិរបស់ពួកគេ ដោយបារម្ភខ្លាចមានការឆ្លងរីករាលដាលនៃជំងឺកូវីដ១៩ នៅក្នុងសហគមន៍របស់ពួកគេ។ នេះបើតាមការប្រាប់ឲ្យដឹងពីអាជ្ញាធរមូលដ្ឋាន នៅថ្ងៃទី ២ ខែសីហា។
លោក លី ចាន់ថា នាយនគរបាលប៉ុស្តិ៍ឃុំព្រែកខ្សាយ (ក) បានប្រាប់ភ្នំពេញប៉ុស្តិ៍ថា កាលពីរសៀលថ្ងៃទី ១ ខែ សីហា មានបុរសជនជាតិខ្មែរឥស្លាមម្នាក់នៅភូមិចាក់ខ្លាញ់ ឃុំពាមរក៌ស្រុកពាមរក៌ បានស្លាប់ក្រោយពីឈឺរ៉ាំរ៉ៃជាច្រើនឆ្នាំ។
ប៉ុន្តែក្រុមគណកម្មការទប់ស្កាត់ការឆ្លងរីករាលដាលនៃជំងឺកូវីដ ស្រុកពាមរក៏ បានបញ្ជូនក្រុមគ្រូពេទ្យជំនាញចុះពិនិត្យសាកសពបុរសនោះ ដោយប្រើឧបករណ៍រ៉េភីតតេស្ត៍រកមេរោគកូវីដ ១៩ ជាលទ្ធផលសពបុរសជនជាតិខ្មែរឥស្លាមនោះ មានផ្ទុកវិជ្ជមានជំងឺកូវីដ ១៩។ ដោយសារនៅភូមិចាក់ខ្លាញ់ គ្មានទីតាំងបញ្ចុះសព ក្រុមគ្រួសារនៃសព ក៏បានស្នើសុំប្រធានគណៈកម្មការទប់ស្កាត់ជំងឺកូវីដ១៩ ស្រុកពាមរក៏ នាំសពបុរសនោះទៅកប់នៅទីទួលបញ្ចុះសព ដែលស្ថិតក្នុងភូមិឧត្តម ឃុំព្រែកខ្សាយ (ក) ប៉ុន្តែ ត្រូវបានអ្នកភូមិនៅទីនោះរារាំង។
លោកបានបញ្ជាក់ថា៖ «តាមការណែនាំរបស់គណបញ្ជាការឯកភាពស្រុកពាមរក៍ អាជ្ញាធរយើងក៏បានជួយសម្របសម្រួល និងអនុញ្ញាតឲ្យគ្រឿងចក្រអេស្កាវ៉ាទ័រ ដែលក្រុមគ្រួសារនៃសពបានជួល ចូលទៅកាយរណ្ដៅបញ្ចុះសពនៅលើទីទួលនោះ។ ប៉ុន្តែនៅពេលដែលកាយរួច ស្រាប់តែអ្នកភូមិ ដែលភាគច្រើនមានសពជីដូនជីតានិងសាច់ញាតិកប់នៅទីនោះ បាននាំគ្នាមកតវ៉ា រារាំងមិនឲ្យឡានពេទ្យដឹកសពបុរសជនជាតិឥស្លាមដែលមានវិជ្ជមានកូវីដ-១៩នោះ ចូលទៅកប់នៅទីនោះទេ»។
បើតាមលោក លី ចាន់ថា ក្រុមអ្នកភូមិបានលើកហេតុផលជាច្រើន ដើម្បីជំទាស់ក្រុមគ្រួសារសព មិនឲ្យកប់សពបុរស ដែលមានវិជ្ជមានជំងឺកូវីដនោះ នៅក្នុងភូមិរបស់ពួកគេនោះទេ។
លោក ម៉ៅ ចំរើន អាយុ ៤៦ ឆ្នាំ ដែលបានចូលរួមនៅក្នុងការតវ៉ានោះ បានប្រាប់ ភ្នំពេញ ប៉ុស្តិ៍ថា តាមរយៈការផ្សព្វផ្សាយរបស់ក្រសួងសុខាភិបាល ក៏ដូចជាអាជ្ញាធរមូលដ្ឋាន ជំងឺកូវីដ ១៩ គឺជាជំងឺឆ្លងដ៏កាចសាហាវបំផុត ព្រោះគ្រាន់តែអ្នកពាក់ពន្ធ័ប្រយោលសោះក៏ត្រូវដាក់ឲ្យធ្វើចត្តាឡីស័ក ១៤ ថ្ងៃដែរ ហើយបើដឹងថាគ្រួសារណាកើតកើតជំងឺនេះ គឺគ្មានអ្នកណាហ៊ានទៅជិតទេ ព្រោះខ្លាចឆ្លង។
លោកបាននិយាយទៀតថា៖ «ហេតុដូច្នេះហើយបានជាពួកយើងដាច់ខាតមិនឲ្យនាំយកសពអ្នកដែលកើតជំងឺកូវីដ ១៩ ហ្នឹងមកបញ្ចុះនៅក្បែភូមិរបស់ពួកយើង ព្រោះវាអាចបង្កឲ្យមានការឆ្លងរីករាលដាលនៅក្នុងសហគមន៍របស់ពួកយើង»។
ជុំវិញករណីនេះ អ្នកស្រី ស្រេង ទៀង អភិបាលស្រុកពាមរក៌ បានប្រាប់ភ្នំពេញប៉ុស្តិ៍ថា បុរសជនជាតិខ្មែរឥស្លាមនោះ មុនស្លាប់ មានប្រវត្តិកើតជំងឺលើសឈាមនិងទឹកនោមផ្អែម ហើយគេបានប្រទះឃើញគាត់ដេកស្លាប់នៅក្នុងផ្ទះកាលពីថ្ងៃទី ៣១ កក្កដា ប៉ុន្តែដើម្បីការពារតាមវិធានការសុខាភិបាលទើបអ្នកស្រីបានទាក់ទងហៅក្រុមគ្រូពេទ្យ មកយកសំណាកសពពិនិត្យជាមុនសិនបើគាត់អវិជ្ជមានជំងឺកូវីដ ១៩ ទើបប្រគល់អោយសាច់ញាតិរៀបចំយកទៅធ្វើបុណ្យ ប៉ុន្តែក្រោយពីពិនិត្យរួចលទ្ធផលបែរជាវិជ្ជមានជំងឺកូវីដ ១៩ ទើបគណៈកម្មការទប់ស្កាត់ជំងឺកូវីដ ១៩ ថ្នាក់ស្រុកត្រូវចាត់ចែងរកទីតាំងសុវត្ថិភាព ដើម្បីបញ្ចុះសព។
អ្នកស្រីបានបញ្ជាក់ថា៖ «ដោយសារយើងពុំមានទីតាំងដីទំនេរអាចបញ្ចុះសពបានទើបអាជ្ញាធរសម្រេចយកសពទៅបញ្ចុះនៅទីទួលបញ្ចុះសពនោះ ដោយសារទីតាំងនោះ គឺជាដីសាធារណៈរបស់រដ្ឋ។ ចំណែកសពមុននឹងយកចេញទៅទីនោះគ្រូពេទ្យជំនាញបានរុំខ្ចប់យ៉ាងជិតដាក់ក្នុងមឈូស និងបានបាញ់ថ្នាំសម្លាប់មេរោគយ៉ាងត្រឹមត្រូវផងដែរប៉ុន្តែដោយសារអ្នកភូមិមិនយល់ ហើយមានការភ័យខ្លាចទើបនាំគ្នាចេញមករារាំងបែបនេះ»។
អ្នកស្រីបានបន្ថែមថា៖ «ក្រោយពីមានការរារាំងពីអ្នកភូមិទាំងនោះ ក្រុមគ្រួសារនៃសពក៏បានស្នើសុំឲ្យអាជ្ញាធរយើងជួយអន្តរាគមន៍ នាំសពបុរសនោះទៅបញ្ចុះនៅស្រុកកំណើតឯខេត្តត្បូងឃ្មុំវិញ។ ឥឡូវបញ្ហានោះបានដោះស្រាយហើយ »៕