ភ្នំពេញៈ ការងារបង្កបង្កើនផលស្រូវរដូវវស្សារបស់ប្រជាកសិករក្នុងឆ្នាំនេះមានសម្ទុះលឿនជាងឆ្នាំមុន ដោយគិតត្រឹមដំណាច់ខែកក្កដាកន្លងទៅសម្រេចបានរហូតជាង ៩៧% នៃផ្ទៃដីផែនការដាំដុះសរុបជាង ២,៦ លានហិកតា។ នេះបើតាមរបាយការណ៍ព័ត៌មាននៅលើបណ្ដាញសង្គមរបស់លោក វេង សាខុន រដ្ឋមន្ត្រីក្រសួងកសិកម្ម។
របាយការណ៍បានបង្ហាញថា បច្ចុប្បន្នប្រជាកសិករប្រមាណជាង ៩៩ ភាគរយ បានប្រើប្រាស់គ្រឿងយន្តកសិកម្មជំនួសសត្វគោក្របី ក្នុងការងារភ្ជួររាស់ដីស្រែចម្ការរបស់ខ្លួន ដើម្បីកាត់បន្ថយពេលវេលាកម្លាំងពលកម្ម និង ជួយកែសម្រួលគុណភាពដីឱ្យល្អប្រសើរជាងមុន។ ក្នុងនោះការភ្ជួររាស់ដីដោយប្រើគ្រឿងយន្តកសិកម្មសម្រេចបាន ២ ៥៣៥ ០២២ ហិកតា ស្មើនឹង ៩៩,៣៨% ខណៈការភ្ជួររាស់ដោយប្រើកម្លាំងសត្វគោក្របីសម្រេចបាន ១៥ ៨៤២ ហិកតាស្មើនឹង ០,៦២%។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ក៏បានបញ្ជាក់ក្នុងរបាយការណ៍ដែរថា៖ «គិតត្រឹមថ្ងៃទី ៣០ ខែកក្កដា ឆ្នាំ ២០២១ ការងារព្រោះ និងស្ទូងស្រូវរដូវវស្សាសម្រេចបានជាង ២,៤ លានហិកតា ស្មើនឹង ៩៤,០៣% នៃផែនការជាង ២,៦ លានហិកតា លឿនជាងឆ្នាំមុនចំនួន ១៦៦ ១៣៦ ហិកតា ខណៈការងារប្រមូលផលស្រូវរដូវវស្សាសម្រេចបានចំនួន ១២៣ ១៧៣ ហិកតា ស្មើនឹង ៥,០២% នៃផ្ទៃដីដែលបានអនុវត្តសរុបដោយទទួលបានបរិមាណផលចំនួន ៥០៣ ៥១៩ តោន»។
ក្រៅពីការបង្កបង្កើនផលដំណាំស្រូវ ប្រជាកសិករក៏បានដាំដុះដំណាំសាកវប្បកម្ម និងដំណាំឧស្សាហកម្មរយៈពេលខ្លីសម្រាប់បំពេញសេចក្ដីត្រូវការក្នុងជីវភាពគ្រួសារប្រចាំថ្ងៃផងដែរ។ ក្នុងនោះបានដាំដំណាំសាកវប្បកម្មរយៈពេលខ្លី រួមមាន ពោតស ដំឡូងជ្វា និង បន្លែគ្រប់មុខ សរុបបានចំនួន ៤៨ ២០៧ហិកតា ស្មើនឹង ៨៧,៧០% នៃផែនការចំនួន ៥៤ ៩៦៦ ហិកតា យឺតជាងឆ្នាំមុនចំនួន ១ ៣៣៥ ហិកតា បើតាមរបាយការណ៍ដំណាំឧស្សាហកម្មរយៈពេលខ្លី រួមមាន ពោតក្រហម ដំឡូងមី សណ្ដែកបាយសណ្ដែកដី សណ្ដែកសៀង និង អំពៅ សរុបបានចំនួន ៧៣១ ៣០៧ ហិកតា ស្មើនឹង ៨៩,២២ % នៃផែនការចំនួន ៨១៩ ៦២៩ ហិកតា លឿនជាងឆ្នាំមុនចំនួន ២ ១២៧ ហិកតា។
ល្បឿនការងារបង្កបង្កើនផលដ៏គួរឱ្យកត់សម្គាល់នេះ ប្រជាកសិករអះអាងថា ដោយសាររបបទឹកភ្លៀងក្នុងឆ្នាំនេះមានការធ្លាក់រាយប៉ាយបានល្អប្រសើរជាងឆ្នាំមុនៗចាប់តាំងពីដើមរដូវវស្សាមកម្ល៉េះ។
ប្រជាកសិករនៅស្រុកសង្កែ ខេត្តបាត់ដំបង អ្នកស្រី ខៀវ លម្អង អាយុ ៤៥ ឆ្នាំបានប្រាប់ភ្នំពេញប៉ុស្តិ៍ នៅថ្ងៃទី ២ ខែសីហាថា មកទល់ពេលនេះ ស្រូវដើមរដូវវស្សារបស់គាត់ចំនួន ៥ ហិកតាកំពុងបែកគុម្ព និងចេញផ្កាស្រុះគ្នាល្អណាស់ ហើយវាអាចនឹងប្រមូលផលបាននៅដំណាច់ខែសីហានេះ។
អ្នកស្រីលម្អងនិយាយពោរពេញដោយក្ដីសង្ឃឹមថា៖ «គ្រួសារខ្ញុំមិនដែលជួបបញ្ហាខ្វះខាតស្រូវអង្ករនោះទេ ព្រោះជាទូទៅពួកយើងធ្វើស្រូវបានជាមធ្យមពី ៤,៥ តោនទៅ ៥,៣ តោនក្នុង ១ ហិកតា ហើយក្នុង ១ រដូវ ពួកយើងធ្វើស្រូវបាន ២ ដង គឺដើមរដូវ និងចុងរដូវ»។
បើតាមអ្នកស្រីលម្អង ដំណាំស្រូវ ដែលគាត់ដាំជាប្រភេទស្រូវស្រាល ដែលអាចដាំតែក្នុងចន្លោះពី ៨០ ថៃ្ងទៅ ៨៥ ថ្ងៃប៉ុណ្ណោះ អាចប្រមូលផលបាន និងមិនត្រូវការទឹកច្រើននោះទេ។ ប៉ុន្តែត្រូវការការថែទាំ បោចស្មៅ និងដាក់ជីឱ្យបានត្រឹមត្រូវទៅតាមបទដ្ឋានបច្ចេកទេសនៃដំណាំស្រូវ ដែលបានណែនាំដោយមន្ត្រីជំនាញ។
លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង ប្រាប់ភ្នំពេញប៉ុស្តិ៍ថា គិតត្រឹមថ្ងៃទី ២ ខែសីហា ការបង្កបង្កើនផលស្រូវរបស់កសិករក្នុងខេត្តនេះបានសម្រេចសរុបជាង ២៧ ម៉ឺនហិកតា ស្មើនឹងជាង ៨២ ភាគរយនៃផែនការជាង ៣២ ម៉ឺនហិកតា លឿនជាងឆ្នាំមុនចំនួនជាង ៦ ម៉ឺនហិកតា។
លោកបញ្ជាក់ថា៖ «យ៉ាងណាក៏ដោយ នៅដំណាច់ខែសីហា ឬ ដើមខែកញ្ញាខាងមុខនេះ បងប្អូនប្រជាកសិករយើងនឹងធ្វើការដាំដុះបាន ១០០ ភាគរយ ឬ ច្រើនជាងផែនការ ដែលយើងបានកំណត់ ព្រោះដល់ពេលនោះ របាយទឹក ភ្លៀងនឹងធ្លាក់ជោកជាំ គ្របដណ្ដប់គ្រប់ទីកន្លែង ដែលធ្វើឱ្យមានប្រភពទឹកគ្រប់គ្រាន់ សម្រាប់ការងារបង្កបង្កើនផល»៕
វីដេអូ៖