.jpg)
លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង។ រូបថត CCF
ភ្នំពេញៈ មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង (ក.ប.ប) បានបង្ក្រាបអំពើមិនសុចរិតក្នុងការធ្វើអាជីវកម្មចំនួន ៥៦ ករណី និងបានអនុវត្តវិធានការដំបូងនៃការពិន័យអន្តរការណ៍លើអំពើល្មើសនៅក្នុងខែកក្កដានៅទូទាំងប្រទេស។
លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង បានប្រាប់ ភ្នំពេញ ប៉ុស្តិ៍ នៅថ្ងៃទី ២ ខែសីហាថា ក្នុងរយៈពេល ១ ខែ បន្ទាប់ពីកាលបរិច្ឆេទនៃការចាប់ផ្តើមអនុវត្តច្បាប់ស្តីពីកិច្ចការពារអ្នកប្រើប្រាស់ ពិសេសការអនុវត្តប្រកាសអន្តរក្រសួងស្តីពីនីតិវិធីពិន័យអន្តរការណ៍លើអំពើល្មើសនឹងច្បាប់ស្តីពីកិច្ចការពារអ្នកប្រើប្រាស់។
លោកបានអះអាងថា មន្ត្រីស៊ើបអង្កេតរបស់អគ្គនាយកដ្ឋាន ក.ប.ប. បានចុះទៅតាមគោលដៅ និងមុខសញ្ញាដែលកំណត់ដោយអគ្គនាយកដ្ឋាន ដើម្បីស្រាវជ្រាវ និងកំណត់បទល្មើស ចំពោះអំពើ និងការអនុវត្តធុរកិច្ចមិនសុចរិត ពាក់ព័ន្ធនឹងទំនិញ និងសេវា។
លោកបានបញ្ជាក់ថា៖ «ក្នុងខែកក្កដាកន្លងទៅ មន្ត្រីស៊ើបអង្កេតនៃអគ្គនាយកដ្ឋាន ក.ប.ប. ដែលទទួលបាននីតិសម្បទាជានគរបាលយុត្តិធម៌ បានរកឃើញបទល្មើសចំនួន ៥៦ ករណី។ បទល្មើសដែលត្រូវបានរកឃើញ ភាគច្រើនជាបទល្មើសពាក់ព័ន្ធនឹងអំពើមិនសុចរិតក្នុងការធ្វើអាជីវកម្មប្រេងឥន្ធនៈ ការធ្វើអាជីវកម្មទំនិញក្លែងបន្លំគុណភាព (ដូចជា) អាល់កុល ទំនិញហួសរយៈពេលប្រើប្រាស់ ទំនិញគ្មាន ឬមានស្លាកសញ្ញាមិនអនុលោម»។
ជាមួយនឹងការចុះអនុវត្តនៃខែដំបូងនេះ លោក ផាន អូន បាននិយាយថា ការអនុវត្តវិធានការពិន័យអន្តរការណ៍លើអំពើល្មើសនឹងច្បាប់ស្តីពីកិច្ចការពារអ្នកប្រើប្រាស់ គឺបានជួបនឹងបញ្ហាមួយចំនួន ដែលធ្វើឱ្យការងារចុះអនុវត្តមានភាពលំបាក។
លោកបានអះអាងពីផលលំបាកទាំងនោះថា៖ «ដូចជាការឆ្លងរាលដាលនៃជំងឺកូវីដ ១៩ នៅកម្ពុជា នៅកំពុងមានសម្ទុះមិនទាន់ថមថយនៅឡើយ ធ្វើឱ្យការងារត្រួតពិនិត្យ និងស៊ើបអង្កេតដើម្បីកំណត់បទល្មើសជួបការរាំងស្ទះ។ ម្យ៉ាងទៀត ច្បាប់ស្តីពីកិច្ចការពារអ្នកប្រើប្រាស់ទើបត្រូវបានអនុវត្ត ការយល់ដឹងរបស់អាជីវករនៅពុំទាន់បានស៊ីជម្រៅនៅឡើយ»។
យោងតាមច្បាប់ស្តីពីកិច្ចការពារអ្នកប្រើប្រាស់ កាលពីខែវិច្ឆិកា ឆ្នាំ ២០១៩ បានឱ្យដឹងថា ច្បាប់នេះសំដៅធានាឱ្យមានកិច្ចការពារដល់អ្នកប្រើប្រាស់ ដើម្បីបង្កើតបរិយាកាសនៃការធ្វើពាណិជ្ជកម្មដោយស្មោះត្រង់ និងការប្រកួតប្រជែងដោយសុចរិត។
យោងតាមច្បាប់នេះ ក៏បានចែងពីការដាក់ទោសទណ្ឌចំពោះម្ចាស់ក្រុមហ៊ុន ផលិតករ ពាណិជ្ជករ អាជីវករ ដែលបានប្រព្រឹត្តសកម្មភាពល្មើសនឹងច្បាប់នេះ ដោយការពិន័យជាប្រាក់ និងការដាក់ទោសទណ្ឌក្នុងពន្ធនាគារ៕
