.jpg)
ក្រុមគ្រូពេទ្យចុះយកសំណាក ដើម្បីធ្វើតេស្តរកកូវីដ អាជីវករផ្សារទួលសង្កែ ពីថ្ងៃទី ២ សីហា។ ហេង ជីវ័ន
ភ្នំពេញៈ ក្រសួងសុខាភិបាល ចេញផ្សាយសេចក្តីណែនាំស្តីពីការអនុវត្តយុទ្ធនាការជាតិ ក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩» ដោយរំពឹងថា គ្រប់គ្នាបន្តចូលរួមអនុវត្ត និងគោរពតាមវិធានបានខ្ជាប់ខ្ចួន ដើម្បីកាត់ផ្តាច់ការចម្លង។
សេចក្តីណែនាំដែលមានកម្រាស់ ៤៣ ទំព័រ និង ១០ ចំណុចបានរៀបរាប់ពីទិដ្ឋភាពរួម ដែលបានកំពុងកើតមានឡើង នៅក្នុងប្រទេសកម្ពុជា ដោយសារវិបត្តិកូវីដ ១៩ ដោយភ្ជាប់ជាមួយនឹងយុទ្ធសាស្ត្រចំនួន ២ ចំណុចក្នុងការទំនាក់ទំនងអន្តរបុគ្គល និងការប្រើប្រាស់ប្រព័ន្ធផ្សព្វផ្សាយ ដើម្បីអនុវត្តយុទ្ធនាការនេះឱ្យទទួលបានជោគជ័យ។
បន្ថែមពីនេះ សេចក្តីណែនាំក៏បានកំណត់ពីសកម្មភាពរាប់ចាប់ពីយុទ្ធនាការថ្នាក់ជាតិរហូតដល់ថ្នាក់ក្រោមជាតិ និងបុគ្គលពាក់ព័ន្ធទាំងអស់ រួមទាំងប្រជាពលរដ្ឋខ្លួនឯងផ្ទាល់ ដើម្បីបង្កើនការប្រុងប្រយ័ត្ន និងការការពារឱ្យបានខ្ជាប់ខ្ជួន ជាពិសេសវិធានការ ៣ កុំ និង ៣ ការពារ។
សេចក្តីណែនាំបានសង្កត់ធ្ងន់ថា៖ «យុទ្ធនាការនេះ ត្រូវការសម្ភារមួយចំនួនដើម្បីទាក់ទាញចំណាប់អារម្មណ៍របស់សាធារណជនអំពីគោលរឿងនៃយុទ្ធនាការ។ សម្ភាររួមមានសារអប់រំដែលបានផលិតកន្លងមក និងសម្ភារបន្ថែមមួយចំនួន ដូចជាអាវយឺត មួក ពាក្យស្លោក រួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩ បដា និងសារសំឡេង ស្ប៉តវិទ្យុ ទូរទស្សន៍ដែលនឹងផលិតជាបន្តបន្ទាប់»។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានថ្លែងយ៉ាងដូច្នេះថា ប្រទេសកម្ពុជាកំពុងវិវឌ្ឍទៅកាន់ការឆ្លងរាលដាលនៃជំងឺកូវីដ ១៩ ទ្រង់ទ្រាយធំក្នុងសហគមន៍ ដែលជាបន្ទុកធំលើសសមត្ថភាពប្រព័ន្ធប្រពោធនកម្មសម្រាប់ការព្យាបាលធ្ងន់ធ្ងរ (ICU) ប្រសិនបើពុំមានការដាក់ចេញ និងអនុវត្តជាបន្ទាន់ នូវយុទ្ធសាស្ត្រដែលមានប្រសិទ្ធភាពបន្ថែមនោះទេ។
លោកស្រីបន្តថា វីរុសកូវីដ ១៩ កំពុងចរាចរក្នុងចំណោមប្រជាពលរដ្ឋ និងមានករណីឆ្លងក្នុងចំណោមបុគ្គលិកសុខាភិបាល ករណីធ្ងន់ធ្ងរ និងស្លាប់កំពុងកើនឡើងផងដែរ។ ដូច្នេះហើយ ដើម្បីទប់ស្កាត់ការចម្លងវីរុស ការដាក់ចេញនូវយុទ្ធសាស្ត្រ ៦ ចំណុច សំដៅទប់ស្កាត់ រលកទី៣ នៃការឆ្លងរាលដាលជំងឺកូវីដ ១៩ និងដើម្បីត្រៀមខ្លួនរស់ជាមួយជំងឺកូវីដ ១៩ ក្នុងគន្លងប្រក្រតីភាពថ្មី គឺជាភាពចាំបាច់ ដែលគ្រប់គ្នា ត្រូវចូលរួមអនុវត្ត និងគោរពតាម។
លោកស្រីបានបញ្ជាក់ថា៖ «ការចូលរួមប្រកបដោយស្មារតីទទួលខុសត្រូវខ្ពស់ពីសំណាក់បុគ្គលម្នាក់ៗ គ្រួសារនីមួយៗ សហគមន៍ ព្រមទាំងស្ថាប័ន និងវិស័យឯកជនក្នុងការអនុវត្តវិធានការបង្ការ និងការពារខ្លួនពីមេរោគកូវីដ ១៩ គឺជាកត្តាគន្លឹះដ៏សំខាន់ក្នុងការកាត់បន្ថយការឆ្លងរាលដាលនៃជំងឺកូវីដ ១៩»។
ដូច្នេះលោកស្រីបានសង្កត់ធ្ងន់ថា ដើម្បីទាក់ទាញប្រជាពលរដ្ឋឱ្យបង្កើនការយកចិត្តទុកដាក់ខ្ពស់ឡើងវិញក្នុងការប្រកាន់ខ្ជាប់នូវវិធានការសុវត្ថិភាពផ្នែកសុខាភិបាល ជាពិសេស វិធានការ ៣ ការពារ និង ៣ កុំ គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ បានធ្វើការជូនដំណឹងដល់អភិបាលនៃគណៈអភិបាលរាជធានី-ខេត្ត បន្តជំរុញយុទ្ធនាការអប់រំផ្សព្វផ្សាយអំពីវិធានការការពារការចម្លងជំងឺកូវីដ ១៩ ដោយប្រើប្រាស់សារអប់រំសុខភាពដែលបានផលិត ផ្សព្វផ្សាយ និងចែកចាយកន្លងមក។
លើសពីនេះ ដើម្បីជំរុញការផ្លាស់ប្តូរឥរិយាបថរបស់ប្រជាជនឱ្យកាន់តែមានប្រសិទ្ធភាព អនុគណៈកម្មការអប់រំបណ្តុះបណ្តាល និងទំនាក់ទំនងសាធារណៈបានរៀបចំបន្ថែមនូវសេចក្ដីណែនាំអនុវត្តយុទ្ធនាការជាតិរួមគ្នាទទួលខុសត្រូវ ទប់ស្កាត់ការចម្លងវីរុសកូវីដ ១៩ ដែលយុទ្ធនាការនាពេលនេះ ផ្ដោតខ្លាំងទៅលើការជំរុញការទទួលខុសត្រូវរបស់បុគ្គល គ្រួសារ សហគមន៍ ស្ថាប័នពាក់ព័ន្ធ ជាពិសេសសេវាឯកជន អាជ្ញាធរមូលដ្ឋាន រួមគ្នាទទួលខុសត្រូវក្នុងស្មារតីសាមគ្គីភាព ដើម្បីកាត់ផ្តាច់ខ្សែចម្លងវីរុសកូវីដ ១៩។
សូមជម្រាបថា រហូតមកដល់ថ្ងៃ ៣០ កក្កដានេះ កម្ពុជារកឃើញករណីជំងឺកូវីដឆ្លងសរុបជិត ៨ ម៉ឺននាក់ ក្នុងនោះចំនួនអ្នកបាត់បង់អាយុជីវិតមានរហូតដល់ជិត ១ ៤០០ នាក់៕
វីដេអូ៖
