.jpg)
រថយន្តត្រូវដាច់ជាបំណែកដោយសារបើកបុកបង្គោលភ្លើង។ រូប នគរបាល
ភ្នំពេញៈ បុរសម្នាក់បានស្លាប់ភ្លាមៗនៅកន្លែងកើតហេតុ ដោយសារបើកបររថយន្តក្នុងល្បឿនលឿន បណ្តាលឱ្យជ្រុលចង្កូតទៅបុកបង្គោលភ្លើង និងជញ្ជាំងផ្ទះប្រជាពលរដ្ឋពេញមួយទំហឹង ធ្វើឱ្យរថយន្តរួញខ្ទេចចូលគ្នា កាលពីរំលងអធ្រាត្រ ឈានចូលថ្ងៃទី ៣ សីហា នៅភូមិព្រៃជីសាក់ សង្កាត់ចោមចៅ ទី៣ ខណ្ឌពោធិ៍សែនជ័យ។
លោក សែម រតនា នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានី-ភ្នំពេញប្រាប់នៅរសៀលថ្ងៃទី ៣ សីហាថា បុរសរងគ្រោះឈ្មោះ សុន សុភាព ហៅ ចាវ អាយុ ២៦ ឆ្នាំ មុខរបរ បើកបររថយន្តមានលំនៅសង្កាត់ស្វាយប៉ាក ខណ្ឌឫស្សីកែវ។
លោកបន្តថា៖ «ឥឡូវនេះខាងជំនាញកំពុងស្រាវជ្រាវទាក់ទងទៅក្រុមគ្រួសារគាត់។ យើងក៏កំពុងពិនិត្យលើគ្រោះថ្នាក់នេះថាប៉ះពាល់អ្វីខ្លះ?»។
លោក រតនា បានរំឭកតាមសម្តីសាក្សីនៅកន្លែងកើតហេតុថា មុនកើតហេតុគេបានឃើញរថយន្តម៉ាកឡិចស៊ីស NX200t ពណ៌ស ពាក់ស្លាកលេខ ភ្នំពេញ 2AU-1056 ដែលមានជនរងគ្រោះបើកនៅក្នុងរថយន្តតែម្នាក់ឯងបានបើកបរតាមមហាវិថីសហព័ន្ធរុស្ស៊ីក្នុងទិសដៅពីកើត ទៅលិច ក្នុងល្បឿនលឿន។
លុះបើករថយន្តដល់ចំណុចកើតហេតុ ម្យ៉ាងដោយសារផ្លូវកោងផងនោះ ជនរងគ្រោះបានបួងចង្កូតហើយគេឃើញរថយន្តជ្រុលទៅបុកបង្គោលភ្លើង១ដើម។ ប៉ុន្តែដោយកម្លាំងល្បឿនលឿន ក៏បន្តទៅបុករបងថ្មនៃផ្ទះប្រជាពលរដ្ឋនៅក្បែរនោះ បណ្ដាលឲ្យរថយន្តដាច់ជា ២ កំណាត់។ រីឯអ្នកបើកបររថយន្តបានកៀបស្លាប់ជាប់នៅក្នុងរថយន្ត។
លោកបន្តថា ក្រោយកើតហេតុភ្លាម នគរបាលមូលដ្ឋានបានចុះធ្វើអន្តរាគមន៍ និងរាយការណ៍បន្តទៅអធិការនគរបាលខណ្ឌពោធិ៍សែនជ័យ។ បន្ទាប់មកលោកអធិការខណ្ឌបានរាយការណ៍បន្តមកការិយាល័យចរាចរណ៍របស់លោកដែលជាផ្នែកជំនាញ។ លោក សែម រតនា បន្តថា បន្ទាប់ពីកម្លាំងជំនាញរបស់លោកទៅដល់កន្លែងកើតហេតុពិនិត្យឃើញថា ជនរងគ្រោះបង្កគ្រោះថ្នាក់ដោយខ្លួនឯងទេ៕
