.jpg)
លោក គង់ គាំ (ឆ្វេង) និងលោក អ៊ូ ច័ន្ទរ័ត្ន នាពេលកន្លងមក។ ហុង មិនា
ភ្នំពេញៈ លោក គង់ គាំ អតីតប្រធានគណបក្ស សម រង្ស៊ី បានព្យាករថា អ្នកនយោបាយនៃអតីតគណបក្សសង្គ្រោះជាតិ (CNRP) ដែលជាប់បម្រាមចំនួន ១ ភាគ ៣ នៃចំនួន ១១៨ រូប នឹងស្នើសុំសិទ្ធិធ្វើនយោបាយឡើងវិញនៅមុនការបោះឆ្នោតឆ្នាំ ២០២២ និងឆ្នាំ ២០២៣ ដោយមិនចង់ជាប់ពាក់ព័ន្ធនឹងគម្រោងរដ្ឋាភិបាលរួបរួមជាតិរបស់លោក សម រង្ស៊ី និង «ក្រុមក្រៅច្បាប់ ក្រៅប្រទេសនោះឡើយ»។
លោក សម រង្ស៊ី កាលពីថ្ងៃ ១៧ ខែកក្កដា បានអំពាវនាវឱ្យពលរដ្ឋកម្ពុជា ចាប់ផ្តើមគិតគូរបង្កើត រដ្ឋាភិបាលរួបរួមជាតិនៅកម្ពុជាដោយយកគំរូតាមប្រទេសភូមា ដើម្បីទាមទារឱ្យលោកនាយករដ្ឋមន្ត្រី ហ៊ុន សែន ប្រគល់អំណាចជូនពលរដ្ឋវិញ។
លោក គង់ គាំ ដែលបច្ចុប្បន្នជាប្រធានកិត្តិយសគណបក្សឆន្ទៈខ្មែរ ប្រាប់ ភ្នំពេញ ប៉ុស្តិ៍ នៅថ្ងៃទី ៣ ខែសីហាថា ដោយមើលឃើញពីបញ្ហានេះ អ្នកនយោបាយនៃអតីត CNRP ដែលជាប់បម្រាមអាចបន្តសុំសិទ្ធិធ្វើនយោបាយឡើងវិញ ព្រោះពួកគេ មើលឃើញអ្នកនយោបាយមួយចំនួនរួចហើយ ដែលបានស្នើសុំសិទ្ធិធ្វើនយោបាយឡើងវិញ និងបានបង្កើតគណបក្សថ្មី កាន់តែច្រើនឡើង។
អ្នកនយោបាយចាស់វស្សារូបនេះបន្តថា អ្នកនយោបាយដែលស្នើសុំសិទ្ធិធ្វើនយោបាយឡើងវិញនេះ គឺបង្ហាញពីការអស់ជំនឿចំពោះអតីតគណបក្សសង្គ្រោះជាតិ ដែលមិនអាចមានវត្តមានឡើងវិញនោះទេ ជាពិសេសនោះគឺគ្មានសង្ឃឹមថា មេដឹកនាំកំពូលទាំង ២ របស់ពួកគេគឺលោក សម រង្ស៊ី និងលោក កឹម សុខា មិនអាចធ្វើនយោបាយឡើងវិញបានទេ។
លោក គង់ គាំ ពន្យល់ទៀតថា ចំណុចមួយទៀតនោះ គឺអតីតសមាជិកសង្គ្រោះជាតិទាំងនោះ គឺចង់រលាស់ខ្លួន និងមិនចង់ពាក់ព័ន្ធ សកម្មភាពក្រៅប្រទេស ជាពិសេសគម្រោងរដ្ឋាភិបាលរួបរួមជាតិរបស់លោក សម រង្ស៊ី ដែលនាំឱ្យមានទុក្ខទោសបន្តទៀត។
លោក គង់ គាំ បញ្ជាក់ថា៖ «ខ្ញុំព្យាករហើយ ខ្ញុំក៏មានមាត់ចាបមាត់ព្រាបមួយចំនួនថា អតីតសមាជិកគណបក្សសង្គ្រោះជាតិអាចនឹងចូលជាមួយគណបក្សប្រជាជនកម្ពុជា និងចូលរួមជាមួយគណបក្សថ្មី»។
លោក ឈឹម កាន អគ្គនាយករងនៃអគ្គនាយកដ្ឋានរដ្ឋបាលនៃក្រសួងមហាផ្ទៃថ្លែងថា រហូតមកដល់ពេលនេះ មិនទាន់មានសមាជិកនៃអតីតគណបក្សសង្គ្រោះជាតិណាផ្សេងទៀត ស្នើសុំសិទ្ធិធ្វើនយោបាយបន្តទៀតនោះទេ។
ប៉ុន្តែលោកបញ្ជាក់ថា រហូតមកទល់ពេលនេះមានអតីតសមាជិកគណបក្សសង្គ្រោះជាតិចំនួន ២៤ រូបហើយត្រូវបានអនុញ្ញាតឱ្យធ្វើនយោបាយឡើងវិញ និង ចំនួន ២ រូបផ្សេងទៀត ត្រូវបានបដិសេធ។
ទោះជាយ៉ាងណា លោក ឈឹម កាន មិនទាន់ហ៊ានធ្វើអត្ថាធិប្បាយជុំវិញថា តើនឹងមានសមាជិកអតីតសង្គ្រោះជាតិថែមទៀត ស្នើសុំសិទ្ធិធ្វើនយោបាយឡើងវិញនោះទេ ប៉ុន្តែបើមានលោកនឹងពិនិត្យពិចារណាក្នុងការផ្តល់ជូនទៅតាមនីតិវិធីឡើងវិញ។
លោកនាយករដ្ឋមន្ត្រី ហ៊ុន សែន កាលពីថ្ងៃទី ១ សីហា បានថ្លែងបដិសេធមិនផ្តល់សិទ្ធិធ្វើនយោបាយឡើងវិញជូនចំពោះថ្នាក់ដឹកនាំអតីតគណបក្សសង្គ្រោះជាតិ ២ រូប គឺលោក ជូង ជូងី និង លោក ញឹម គឹមញុល ដោយសារតែបុគ្គលទាំង ២ នេះបានប្រព្រឹត្តបទល្មើសបន្ថែម ដែលផ្ទុយពីការសម្រេចរបស់តុលាការ។
លោក ហ៊ុន សែន ថ្លែងថា៖ «ខ្ញុំមានសិទ្ធិក្នុងការសម្រេចមនុស្សដែលគេដកសិទ្ធិត្រូវសុំសិទ្ធិ តាមរយៈរដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងមហាផ្ទៃ គាត់រាយការណ៍មក គាត់ត្រូវភ្ជាប់មកជាមួយនឹងមនុស្សហ្នឹងបន្ទាប់តុលាការកាត់ដកសិទ្ធិគាត់ តើបានប្រព្រឹត្តអ្វីខុសទេ បើអត់មានខុសទេ យើងអនុញ្ញាតឱ្យគាត់»។
ទោះជាយ៉ាងណា លោក នាយករដ្ឋមន្ត្រីក៏មិនពឹងលើរបាយការណ៍របស់រដ្ឋមន្ត្រីក្រសួងមហាផ្ទៃទាំងស្រុងដែរ ដោយលោកថា ទោះបីរដ្ឋមន្ត្រីមហាផ្ទៃរាយការណ៍ថា សមាជិកអតីតគណបក្សសង្គ្រោះជាតិដែលបានស្នើសុំនោះ មិនដែលប្រព្រឹត្តខុសប៉ុន្តែ លោកព្យាករដឹងថា ម្នាក់នោះមកបំផ្លាញហើយ គឺលោកមិនឱ្យសិទ្ធិនោះទេ។
លោក ហ៊ុន សែន បញ្ជាក់ថា បើរូបលោកមិនព្រមចុះហត្ថលេខា ស្នើសុំទៅព្រះមហាក្សត្រក៏ព្រះមហាក្សត្រទ្រង់មិនឡាយព្រះហស្តលេខា ផ្តល់សិទ្ធិធ្វើនយោបាយដែរ។
លោក អ៊ូ ច័ន្ទរ័ត្ន អតីតសមាជិកនៃអតីតគណបក្សសង្គ្រោះជាតិ និងជាស្ថាបនិកគណបក្សកែទម្រង់កម្ពុជាដែលទើបបង្កើតថ្មីថ្លែងថា នៅមុនពេលបោះឆ្នោត ឆ្នាំ ២០២២ និងឆ្នាំ ២០២៣ ខាងមុខ សមាជិកនៃអតីតគណបក្សសង្គ្រោះជាតិកាន់តែច្រើននឹងបន្តស្នើសុំសិទ្ធិធ្វើនយោបាយឡើងវិញ ព្រោះដំណោះស្រាយមានភាពរ៉ាំរ៉ៃ នៅក្នុងរយៈពេល ៣ ឬ ៤ ឆ្នាំមកនេះ។
លោកបានថ្លែងបន្តថា មួយវិញទៀត លទ្ធភាពក្នុងការរកដំណោះស្រាយ ទាំងគ្រប់យន្តការ បន្ទាប់ពីការផ្តាច់អនុគ្រោះពន្ធ EBA ហាក់មិនមានសម្ពាធដែលធ្វើឱ្យមានដំណោះស្រាយទេ។ ជាពិសេសក្នុងកាលៈទេសៈដែលប្រទេសកំពុងជួបបញ្ហាជំងឺកូវីដ ១៩ នេះ បរទេសក៏ដូចជាសហរដ្ឋអាមេរិក ដែលចង់ឃើញការវិលត្រឡប់មកវិញនូវប្រជាធិបតេយ្យនៅក្នុងប្រទេសកម្ពុជា ក៏បានផ្តល់ជំនួយវ៉ាក់សាំងដល់កម្ពុជាផងដែរ។
លោកបញ្ជាក់ថា៖ «វាហាក់ដូចជាគេបំភ្លេចទៅហើយគេលែងចាត់ទុកជាអាទិភាពទៅហើយ នៅក្នុងអំឡុងពេលនេះនោះ។ ដូច្នេះអ្នកនយោបាយប្រាកដជាមើលឃើញរឿងទាំងអស់ហ្នឹងហើយបើសិនជាមើលឃើញរឿងទាំងអស់ហ្នឹង ហើយអាចពិចារណាចូលរួមប្រកួតប្រជែងតទៅទៀត ហើយប្រកួតប្រជែងតទៅទៀត កើតមានបានទាល់តែស្នើសុំសិទ្ធិនយោបាយឡើងវិញ។ ដូច្នេះយល់ថាអាចនឹងមានទៀត»។
គណបក្សសង្គ្រោះជាតិត្រូវបានតុលាការកំពូលចេញសាលដីកាសម្រេចរំលាយ កាលពីខែវិច្ឆិកា ឆ្នាំ ២០១៧ និងហាមមិនឱ្យមន្ត្រីជាន់ខ្ពស់របស់គណបក្សនេះចំនួន ១១៨ រូប ធ្វើនយោបាយរយៈពេល ៥ ឆ្នាំ៕
