ភ្នំពេញៈ អង្គការសង្គមស៊ីវិលចំនួន ៣ អំពាវនាវឱ្យវិនិយោគបន្ថែមទៀតលើការបំបៅកូនដោយទឹកដោះម្តាយ ដើម្បីសុខុមាលភាព និងនិរន្តរភាពប្រសើរ ឡើងរបស់កម្ពុជា បន្ទាប់ពីអត្រានៃការបំបៅកូនដោយទឹកដោះនៅកម្ពុជា កំពុង មានការធ្លាក់ចុះជាបន្តបន្ទាប់។
ការអំពាវនាវនេះ បានធ្វើឡើងស្របពេល ដែលប្រទេសជាង ១២០ នៅទូទាំងពិភពលោក រួមគ្នាប្រារព្ធសប្តាហ៍ពិភពលោកបំបៅកូនដោយទឹកដោះម្តាយ ដើម្បីលើកកម្ពស់ការយល់ដឹងពីសារៈសំខាន់នៃការបំបៅកូនដោយទឹកដោះម្តាយ សម្រាប់ការរស់រាន សុខភាព និងសុខុមាលភាពម្តាយ និងកូនៗរបស់ពួកគាត់ ក៏ដូចជាប្រយោជន៍សម្រាប់សង្គមជាតិទាំងមូល។
ទន្ទឹមនឹងនេះ សមាជិកនៃសម្ព័ន្ធអង្គការសង្គមស៊ីវិល ដើម្បីអាហារូបត្ថម្ភកម្ពុជា (អង្គការ Helen Keller អង្គការ Alive & Thrive និងអង្គការទស្សនៈពិភពលោកអន្តរជាតិ-កម្ពុជា) ក្នុងភាពជាដៃគូជាមួយកម្មវិធីអាហារូបត្ថម្ភថ្នាក់ជាតិ អង្គការ GIZ, MUSUFO, USAID, RTI និងអង្គការយូនីសេហ្វ ក៏បានប្រកាសទិវាសប្តាហ៍ពិភពលោកបំបៅកូនដោយទឹកដោះម្តាយនៅកម្ពុជាសម្រាប់ឆ្នាំ ២០២១ ក្រោមប្រធានបទ «យើងទាំងអស់រួមគ្នា គាំពារ និងគាំទ្រការបំបៅកូនដោយទឹកដោះម្តាយ»។
សេចក្តីប្រកាសព័ត៌មានរួមរបស់សមាជិកនៃសម្ព័ន្ធអង្គការទាំងនេះដែលបានចេញផ្សាយនៅថ្ងៃទី ៣ ខែសីហាបានលើកឡើងថា បើទោះបីជាការបំបៅកូនជារឿងរបស់បុគ្គលជាមួយម្តាយយ៉ាងណាក្តី ប៉ុន្តែនៅឆ្នាំនេះ ទិវាសប្តាហ៍ពិភពលោកបំបៅកូនដោយទឹកដោះម្តាយ ២០២១ សូមអំពាវនាវដល់គ្រួសារ សហគមន៍ រដ្ឋាភិបាល និងសង្គមទាំងមូលរួមគ្នាវិនិយោគ និងគាំទ្រការបំបៅកូនដោយទឹកដោះម្តាយ សម្រាប់ពិភពលោកមួយដែលមានសុខភាព និងនិរន្តរភាពជាងមុន។
អង្គការទាំងនោះបានលើកឡើងថា «ទោះបីជាសប្តាហ៍ពិភពលោកបំបៅកូនដោយទឹកដោះម្តាយប្រារព្ធធ្វើឡើង តែក្នុងរយៈពេល ១ សប្តាហ៍ ពោលគឺពីថ្ងៃទី ១ ដល់ថ្ងៃទី ៧ ខែសីហាក្តី តែកិច្ចខិតខំប្រឹងប្រែង ដើម្បីការពារ លើកកម្ពស់ និងគាំទ្រដល់ការបំបៅកូនដោយទឹកដោះម្តាយនៅក្នុងប្រទេសកម្ពុជា នៅតែបន្តធ្វើពេញ ១ ឆ្នាំ»។
ចាប់តាំងពីឆ្នាំ ២០០០ ដល់ឆ្នាំ ២០១០ អត្រានៃការបំបៅកូនដោយទឹកដោះតែ ១ មុខនៅប្រទេសកម្ពុជា (សមាមាត្រនៃទារកដែលបៅទឹកដោះម្តាយតែ ១ មុខចាប់ពីកើតរហូតដល់អាយុ ៦ ខែស្របទៅតាមការណែនាំរបស់អង្គការសុខភាពពិភពលោក) កើនឡើងយ៉ាងខ្លាំង ពោលគឺចាប់ពី ១១ ភាគរយរហូតដល់ ៧៤ ភាគរយ។
ចាប់ពីឆ្នាំ ២០០១ មក កម្មវិធីអាហារូបត្ថម្ភថ្នាក់ជាតិរបស់ក្រសួងសុខាភិបាលជាមួយដៃគូអាហារូបត្ថម្ភសំខាន់ៗនាពេលនោះ (អង្គការសុខភាពពិភពលោក អង្គការយូនីសេហ្វ និងអង្គការ Helen Keller) ប្រារព្ធសប្តាហ៍ពិភពលោកបំបៅកូនដោយទឹកដោះម្តាយជារៀងរាល់ឆ្នាំ។
ដោយមើលឃើញពីកំណើននៃការបំបៅកូនដោយទឹកដោះម្តាយមានការកើនឡើងគួរឱ្យកត់សម្គាល់ ការប្រារព្ធត្រូវបានបញ្ឈប់នៅឆ្នាំ ២០១០ ដោយយោងទៅតាមការសន្និដ្ឋាននាពេលនោះថា សាធារណជនមានការយល់ដឹងទូលំទូលាយពីសារៈសំខាន់នៃការបំបៅកូនដោយទឹកដោះហើយ។
ប៉ុន្តែរបាយការណ៍សិក្សាថ្មីមួយដែលចេញនៅឆ្នាំ ២០១៤ បែរជាបង្ហាញថា ការបំបៅកូនដោយទឹកដោះម្តាយតែមួយមុខបានធ្លាក់ចុះ ហើយការប្រើផលិតផលទឹកដោះគោមានការកើនឡើងទៅវិញ ដែលបង្កនូវគ្រោះថ្នាក់ដល់សុខភាព និងការរស់រានមានជីវិតរបស់កុមារក៏ដូចជា ធ្វើឱ្យប៉ះពាល់ដល់ការចំណាយ និងសេដ្ឋកិច្ចគ្រួសារផងដែរ។ ហេតុនេះហើយទើបទិវាសប្តាហ៍ពិភពលោកបំបៅកូនដោយទឹកដោះម្តាយនៅកម្ពុជាត្រូវបានប្រារព្ធឡើងវិញចាប់ពីឆ្នាំ ២០១៥ ដោយមានការចូលរួមពីកម្មវិធីអាហារូបត្ថម្ភថ្នាក់ជាតិ និងអង្គការដៃគូ។ នេះបើតាមសេចក្តីប្រកាសរួមដដែល។
អង្គការទស្សនៈពិភពលោកអន្តរជាតិ-កម្ពុជាបានឱ្យដឹងថា ដោយគោរពទៅតាមការណែនាំក្នុងការទប់ស្កាត់ការរីករាលដាលជំងឺកូវីដ ១៩ ការប្រារព្ធទិវាបំបៅកូនដោយទឹកដោះម្តាយនៅឆ្នាំនេះបានកំណត់ធ្វើឡើងតាមអនឡាញក្នុងនោះមានការចែកចាយវីដេអូ ការជជែកពិភាក្សាផ្សាយផ្ទាល់ និងការឆ្លើយសំណួរ តាមបណ្តាញសង្គមជាដើម។
អង្គការនេះបានបញ្ជាក់ថា ក្រៅពីស្ត្រីមានផ្ទៃពោះ និងស្ត្រីដែលកំពុងបំបៅកូនដោយទឹកដោះ ឪពុក ជីដូនជីតា អាណាព្យាបាល បុគ្គលិកសុខាភិបាល អ្នកដឹកនាំសហគមន៍ និងសមាជិកពាក់ព័ន្ធដទៃទៀតក្នុងសហគមន៍ដែលអាចចែករំលែកបទពិសោធ និងប្រើប្រាស់សិទ្ធិអំណាច និងពេញចិត្តចំពោះការបំបៅកូនដោយទឹកដោះម្តាយនឹងក្លាយជាក្រុមគោលដៅនៃការផ្សព្វផ្សាយនៃកម្មវិធីផ្សាយតាមអនឡាញទាំងនេះ។
អង្គការទស្សនៈពិភពលោកអន្តរជាតិ-កម្ពុជាបានបញ្ជាក់ថា «ការផ្ទុះឡើងនូវជំងឺកូវីដ ១៩ បានជំរុញឱ្យមានការយកចិត្តទុកដាក់កាន់តែខ្លាំងថែមទៀតក្នុងការគាំទ្រ និងវិនិយោគលើការបំបៅដោះកូនដោយទឹកដោះម្តាយ។
ការបំបែកម្តាយ និងកូន ការរំខានពីការទទួលបានសេវាសុខភាពដូចជាការប្រឹក្សាពីការបំបៅកូន និងការផ្សព្វផ្សាយពីផលិតផលទឹកដោះគោដោយគ្មានសីលធម៌ ក្នុងអំឡុងពេលដែលជំងឺរាតត្បាតសកល កំពុងជះឥទ្ធិពលជាអវិជ្ជមានដល់ការអនុវត្តការបំបៅដោះកូនដោយទឹកដោះម្តាយ។ តម្រូវការនៃការវិនិយោគ និងគាំទ្រដល់ការបំបៅកូនដោយទឹកដោះម្តាយកាន់តែមានភាពធំធេងថែមទៀត»៕