.jpg)
លោក ហេង សំរិន និងប្រធានសភាថ្មីវៀតណាម។ រូបថត រដ្ឋសភា
ភ្នំពេញៈ លោក ហេង សំរិន ប្រធានរដ្ឋសភានៃព្រះរាជាណាចក្រ-កម្ពុជានៅថ្ងៃទី ៣ ខែសីហា បានផ្ញើលិខិតអបអរសាទរជូនចំពោះលោក Vuong Dinh Hue ដែលត្រូវបានបោះឆ្នោតជ្រើសតាំងជាប្រធានរដ្ឋសភានីតិកាលទី ១៥ នៃសាធារណរដ្ឋសង្គមនិយមវៀតណាម។ នេះបើតាមរដ្ឋសភាកម្ពុជា។
លិខិតរបស់លោក ហេង សំរិន ផ្ញើជូនចំពោះលោក Vuong Dinh Hue បានថ្លែងថា៖ «តាងនាមរដ្ឋសភានៃព្រះរាជាណាចក្រកម្ពុជា ខ្ញុំសូមសម្តែងនូវការអបអរសាទរយ៉ាងកក់ក្តៅជូនចំពោះឯកឧត្តមប្រធានដែលត្រូវបានបោះឆ្នោតជ្រើសតាំងជាប្រធានរដ្ឋសភានីតិកាលទី ១៥ នៃសាធារណរដ្ឋសង្គមនិយមវៀតណាមក្នុងអំឡុងពេលសម័យប្រជុំលើកទី ១ កាលពីថ្ងៃទី ២០ ខែកក្កដា ឆ្នាំ ២០២១ កន្លងទៅថ្មីៗនេះ»។
លោក ហេង សំរិន បានបង្ហាញជំនឿយ៉ាងមុតមាំថា ក្រោមការដឹកនាំរបស់លោក Vuong Dinh Hue នៃស្ថាប័ននីតិប្បញ្ញត្តិនៃសាធារណរដ្ឋ-សង្គមនិយមវៀតណាមចំណងមិត្តភាព ភាពជាអ្នកជិតខាងល្អ យូរអង្វែង និងកិច្ចសហប្រតិបត្តិការដ៏ទូលំទូលាយរវាងស្ថាប័ននីតិប្បញ្ញត្តិ។
លោកបានថ្លែងថា ក្រោមការដឹកនាំរបស់លោក Vuong Dinh Hue ចំណងមិត្តភាព ភាពជាអ្នកជិតខាងល្អ និងកិច្ចសហប្រតិបត្តិការដ៏ទូលំទូលាយរវាងប្រទេសកម្ពុជា និងវៀតណាមនឹងកាន់តែរីកលូតលាស់បន្ថែមទៀតក្នុងពេលអនាគត ដើម្បីជាឧត្តមប្រយោជន៍សម្រាប់ប្រជាជននៃប្រទេសទាំង ២ ជាបងប្អូន។
ជាមួយគ្នានេះ លោក ហេង សំរិន បានថ្លែងអំណរគុណចំពោះវៀតណាមដែលបានផ្តល់ម៉ាស់មុខចំនួនរាប់ម៉ឺនម៉ាស់ដល់ព្រះរាជាណាចក្រកម្ពុជា ដើម្បីប្រើប្រាស់ក្នុងការទប់ស្កាត់ការរីករាលដាលនៃជំងឺកូវីដ ១៩ ដែលបាននិងកំពុងរាតត្បាតប្រទេសជាច្រើននៅទូទាំងពិភពលោក។
លោកថ្លែងថា៖ «ខ្ញុំសូមវាយតម្លៃខ្ពស់ចំពោះកិច្ចខិតខំប្រឹងប្រែងរួមគ្នារបស់រដ្ឋាភិបាលនៃប្រទេសទាំង ២ ក្នុងការប្រយុទ្ធប្រឆាំងនឹងជំងឺរាតត្បាតនេះតាមរយៈកិច្ចសហប្រតិបត្តិការជិតស្និទ្ធ និងជំនួយផ្នែកវេជ្ជសាស្ត្រ»៕
