ភ្នំពេញៈ ជំនួយវ៉ាក់សាំងបង្ការវីរុសកូវីដ ១៩ ប្រភេទ Oxford AstraZeneca ចំនួន ៤១ ម៉ឺនដូស របស់ចក្រភពអង់គ្លេស គ្រោងនឹងដឹកតាមជើងយន្តហោះមកដល់កម្ពុជានៅពេលរសៀល ថ្ងៃទី ៤ ខែសីហា។ យោងតាមការផ្សព្វផ្សាយព័ត៌មានកាលពីថ្ងៃទី៣ ខែសីហា របស់នាយកដ្ឋានព័ត៌មាន នៃក្រសួងការពារជាតិ។
ការផ្សព្វផ្សាយនេះបានឱ្យដឹងថា៖ «តាមគម្រោង វ៉ាក់សាំង Oxford AstraZeneca ដែលជាការបរិច្ចាគរបស់ចក្រភពអង់គ្លេសចំនួន ៤១៥ ០០០ ដូស ក្នុងក្របខណ្ឌទ្វេភាគី ជូនរាជរដ្ឋាភិបាលកម្ពុជា នឹងដឹកមកដល់កម្ពុជានៅល្ងាចថ្ងៃទី ៤ ខែ សីហា ឆ្នាំ ២០២១»។
តាមគម្រោងដែលបានគ្រោងទុក លោកនាយករដ្ឋមន្ត្រី ហ៊ុន សែន នឹងទៅទទួលវ៉ាក់សាំង ដែលជាការបរិច្ចាគរបស់ចក្រភពអង់គ្លេស ក្នុងក្របខណ្ឌទ្វេភាគី កម្ពុជា-អង់គ្លេស។
រហូតមកដល់ពេលនេះការផ្ដល់ជំនួយវ៉ាក់ប្រឆាំងកូវីដ ១៩ មកកម្ពុជា ជាទ្វេភាគី មានចិនបានផ្តល់វ៉ាក់សាំងជាង ៣ លានដូស។ ជប៉ុនបានផ្ដល់ ១ លានដូស។ អាមេរិកបានផ្ដល់ ១ លានដូស និងអង់គ្លេស ចំនួន ៤១ ម៉ឺន ៥ ពាន់ដូស។
ចាប់តាំងពីការចាប់ផ្ដើមយុទ្ធនាការចាក់វ៉ាក់សាំង រហូតមកដល់ថ្ងៃទី ២ ខែ សីហា ឆ្នាំ ២០២១ រាជរដ្ឋាភិបាលកម្ពុជាបានចាក់វ៉ាក់សាំងដល់ប្រជាពលរដ្ឋចំនួន ៧៤,១៨% ធៀបជាមួយចំនួនប្រជាជនគោលដៅ ១០ លាននាក់ និងលើកុមារនិងយុវវ័យអាយុពី ១២ ឆ្នាំ ទៅក្រោម ១៨ ឆ្នាំ មាន ៤,០៥% ធៀបជាមួយនឹងក្រុមគោលដៅ ១.៩៦៦.៩៣១ នាក់៕