ភ្នំពេញៈ គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ (គ.អ.ក) បានប្រកាសពីលទ្ធផលចុះអប់រំផ្សព្វផ្សាយច្បាប់បានចំនួន ១ ០១៨ ទីតាំង និងឃាត់ខ្លួនដើម្បីធ្វើការអប់រំ និងពិន័យសរុបចំនួន ៥៤៨ នាក់ ចំពោះបុគ្គលដែលល្មើសនឹងវិធានការសុខាភិបាល និងវិធានការរដ្ឋបាល ដើម្បីទប់ស្កាត់ការឆ្លងរាលដាលជំងឺកូវីដនៅថ្ងៃទី ៣ ខែសីហា។
សេចក្តីជូនដំណឹងរបស់គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ (គ.អ.ក) បានឱ្យដឹងថា នៅថ្ងៃទី ៣ ខែសីហា សមត្ថកិច្ចបានអនុវត្តវិធានការអប់រំផ្សព្វផ្សាយច្បាប់បានចំនួន ១ ០១៨ ទីតាំង និងអនុវត្តវិធានការច្បាប់មានចំនួន ៣៧២ ករណី ដោយឃាត់ខ្លួន (អប់រំ និងពិន័យ) ចំនួន ៥៤៨ នាក់ឃាត់យានយន្ត ២១៥ គ្រឿង និងពិន័យជាប្រាក់បានចំនួន ៣២ លានរៀល។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញថ្លែងពីម្សិលមិញថា មួយរយៈពេលកន្លងមក អាជ្ញាធរមិនបានឃាត់ខ្លួនជនល្មើសបញ្ជូនទៅតុលាការ ឬឃុំខ្លួននោះឡើយ ដោយអាជ្ញាធរប្រើវិធានការស្រាលៗសិន។ ប៉ុន្តែចាប់ពីយប់ថ្ងៃទី ៣ ខែសីហាតទៅ នឹងចាត់វិធានការតឹងរ៉ឹង មានការឃាត់ខ្លួនមនុស្ស និងមានការផាកពិន័យធ្ងន់ធ្ងរ ឬក៏អាចមានវិធានការច្បាប់ ប្រសិនបើគាត់នៅតែល្មើសនូវបម្រាមគោចរនេះ។
បើតាមលោក សាន សុខ សីហា កម្លាំងអន្តរាគមន៍ពិសេសនៃស្នងការដ្ឋាននគរបាលរាជធានីភ្នំពេញបានស្លៀកពាក់ឈុតពេទ្យចេញប្រតិបត្តិការ តាមផ្លូវតូចធំ ដើម្បីចាប់អ្នកជួបជុំផឹកស៊ី ឬល្មើសនឹងបម្រាមគោចរយកមកធ្វើការផាកពិន័យ និងអនុវត្តតាមវិធានការច្បាប់។
លោកថ្លែងថា៖ «ជាលទ្ធផលយើងឃាត់បានមនុស្សចំនួន ២១ នាក់នៅយប់ថ្ងៃទី ៣ ខែសីហា និងឃាត់បានយានយន្តសរុប ១៥២ គ្រឿង (រថយន្ត ៣៨ គ្រឿង) ពិន័យរួច ៤៨ គ្រឿងយកមករក្សាទុកនៅខណ្ឌចំនួន ៤៣ គ្រឿង»។
ដោយឡែកសម្រាប់ខេត្តពោធិ៍សាត់លោក ខូវ រីដា អភិបាលរងខេត្តនេះថ្លែងពីម្សិលមិញថា ការអនុវត្តវិធានការរដ្ឋបាលសម្រាប់ខេត្តពោធិ៍សាត់គឺប្រើការអប់រំច្រើនដោយសារតែបញ្ហាប្រឈមចំពោះមុខមិនសូវមានកើតឡើងនោះទេ ព្រោះពលរដ្ឋមានការយល់ដឹងច្រើន។
លោកថ្លែងថា៖ «ដំណាក់កាលនេះខ្ញុំគ្រាន់តែធ្វើកិច្ចសន្យាអប់រំ យើងអត់ទាន់ដាក់ទោសទណ្ឌអីទេដោយសារអ្វីដែលគាត់កំពុងតែធ្វើនេះ មិនមែនជារឿងធំដុំពេកទេ យើងអាចអប់រំបាន យើងអប់រំ តែកាលណាអប់រំមិនបានបានយើងចាត់វិធានការច្បាប់តាមកាលៈទេសៈ» ។
បើតាមលោក ខូវ រីដា សម្រាប់ខេត្តពោធិ៍សាត់ គឺមានការរឹតបន្តឹង និងចុះអប់រំផ្សព្វផ្សាយ ណែនាំបានលទ្ធផលល្អប្រសើរ។ អាជ្ញាធរមិនអនុញ្ញាតឱ្យមានការប្រមូលផ្តុំគ្នាឡើយទោះបីនៅតាមភូមិឃុំក៏ដោយ។
លោកថ្លែងថា «ឯកឧត្តមអភិបាលខេត្ត លោកដាក់បទបញ្ជាទាំងអស់ទៅលើអាជ្ញាធរ កងកម្លាំងប្រដាប់អាវុធមូលដ្ឋានហ្នឹង ត្រូវរឹតបន្តឹងអប់រំផ្សព្វផ្សាយ និងណែនាំ អ៊ីចឹងមានដាក់បារ៉ាស់ដាក់អី ដើម្បីសួរនាំពន្យល់ហេតុផល ហើយនិងក្រុមល្បាតម៉ូតូតាមខ្នងផ្ទះខ្លាចមានប្រមូលផ្តុំផឹកស៊ី គឺយើងត្រូវផ្អាកក្នុងមួយរយៈពេលហ្នឹងដើម្បីសុវត្ថិភាព»។
លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀង ថ្លែងពីម្សិលមិញថា ជាការកត់សម្គាល់ចំពោះការអនុវត្តវិធានការសុខាភិបាលនៅខេត្តស្វាយរៀង មិនមានការល្មើសច្រើននោះទេ សំខាន់គឺការអប់រំណែនាំឱ្យប្រជាពលរដ្ឋបានយល់ដឹង និងចូលរួមទាំងអស់គ្នាប្រសើរជាង។
លោកថ្លែងថា៖ «កន្លងមកយើងមានផាកពិន័យប្រមាណ ៥ ករណីហើយ អ៊ីចឹងនៅខេត្តយើងមានតួលេខឃាត់ផាកពិន័យដែរ តែមិនច្រើនទេ សំខាន់មានការអប់រំណែនាំឱ្យបានច្រើនវិញ តែបើយើងគិតតែរឿងពិន័យនោះ វាក៏ច្រើនដែរ ប៉ុន្តែជួនកាលកំហុសល្មមៗ យើងអត់ឱនឱ្យគាត់ ហើយណែនាំអប់រំបន្ថែមសិនទៅ បើសិនណាកំហុសគាត់នៅដដែល យើងនឹងចាត់វិធានការច្បាប់»។
ចំណែកនៅខេត្តបាត់ដំបង លោក សឿម ប៊ុនរិទ្ធិ អភិបាលរង និងជាអ្នកនាំពាក្យរដ្ឋបាលខេត្តនេះបានថ្លែងថា ខេត្តបាត់ដំបងមានកងកម្លាំងអន្តរាគមន៍របស់សមត្ថកិច្ចល្បាតទាំងកម្លាំងនគរបាល និងអាវុធហត្ថក្នុងការពិនិត្យមើលអ្នកល្មើសបម្រាមគោចរនៅពេលយប់ ប៉ុន្តែជាលទ្ធផលមិនមានអ្នកល្មើសឡើយ។
លោកថ្លែងថា៖ «តាំងពីយើងមានវិធានការនេះមក គឺមិនមានអ្នកល្មើសលួចជួបជុំផឹកស៊ី ឬល្មើសបម្រាមគោចរនោះទេ ព្រោះពេលនេះយើងកំពុងអនុវត្តវិធានការខ្លាំង»។ អាជ្ញាធរបានផ្សព្វផ្សាយអប់រំរួចហើយដោយមិនអាចលើកលែងឡើយ បើឃើញល្មើសគឺត្រូវតែអនុវត្តទៅតាមវិធានការច្បាប់៕