.jpg)
សមត្ថកិច្ចពិនិត្យអ្នកបើកបរយានជំនិះនៅក្នុងម៉ោងបម្រាមគោចរ នៅខណ្ឌមានជ័យរាជធានីភ្នំពេញ កាលពីយប់ថ្ងៃទី ១ សីហា។ ហ៊ាន រង្សី
ភ្នំពេញ៖ សមត្ថកិច្ចបានបញ្ជូនមនុស្ស ១៨ នាក់ទៅតុលាការ ពាក់ព័ន្ធនឹងការល្មើសវិធានការសុខាភិបាល និងវិធានការរដ្ឋបាល ខណៈធ្វើការអប់រំផ្សព្វផ្សាយច្បាប់បានចំនួន ១ ៦៩១ ទីតាំង និងអនុវត្តវិធានការច្បាប់បាន ៨២២ ករណី នៅថ្ងៃទី ៤ ខែ សីហា ឆ្នាំ ២០២១។
សេចក្តីជូនដំណឹងរបស់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ (គ.អ.ក) នៅថ្ងៃទី ៤ ខែសីហា បានឲ្យដឹងថា សមត្ថកិច្ចបានបញ្ជូនមនុស្ស ១៨ នាក់ទៅតុលាការ ដើម្បីចាត់ការតាមច្បាប់ បន្ទាប់ពីបានរកឃើញថា ពួកគេពាក់ព័ន្ធនឹងបទល្មើសវិធានការសុខាភិបាល និងវិធានការរដ្ឋបាល។
សេចក្តីជូនដំណឹងបញ្ជាក់ថា នៅថ្ងៃដដែលនោះ សមត្ថកិច្ចបានអនុវត្តវិធានការអប់រំផ្សព្វផ្សាយច្បាប់បានចំនួន ១ ៦៩១ ទីតាំង និងអនុវត្តវិធានការច្បាប់មានចំនួន ៨២២ ករណី ឃាត់ខ្លួនមនុស្សមកធ្វើការអប់រំ និងពិន័យចំនួន ១ ៣៥៤ នាក់ និងឃាត់យានយន្តចំនួន ៧៣៤ គ្រឿង ពិន័យជាប្រាក់ ចំនួន ៣០ ៧០០ ០០០ លានរៀលផងដែរ៕
