.jpg)
សពបុរសដែលប្រទះឃើញនៅឆ្នេរអូរត្រេះពីថ្ងៃ ៤ សីហា។ រូបថត រដ្ឋបាលខេត្ត
ព្រះសីហនុៈ អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានអះអាងថា សពបុរសម្នាក់ដែលប្រទះឃើញនៅឆ្នេរខ្សាច់នៅព្រឹកថ្ងៃ ៤ សីហា ក្រោយពេលបាត់ខ្លួនក្នុងទឹកសមុទ្រ ខណៈគាត់ និងមិត្តភក្ដិ ៣ នាក់ទៀតបានចុះហែលទឹកលេងនៅឆ្នេរអូរត្រេះ ១ កាលពីល្ងាចថ្ងៃទី ៣ ខែសីហានោះ គឺមានអាជីពជាមេធាវី។
លោក ឃាង ភារម្យ បានប្រាប់ ភ្នំពេញ ប៉ុស្តិ៍ កាលពីម្សិលមិញថា សពបុរសដែលគេប្រទះឃើញនោះ ឈ្មោះ ជូ ជាគុយ អាយុ ២៩ ឆ្នាំមានអាជីពជាមេធាវី និងមានលំនៅក្នុងរាជធានីភ្នំពេញ។ នៅល្ងាចថ្ងៃកើតហេតុ (ល្ងាចថ្ងៃទី ៣ ខែសីហា) លោក គួច ចំរើន អភិបាលខេត្តព្រះសីហនុបានដឹកនាំកម្លាំងបញ្ជាការឯកភាពខេត្តចុះរុករកជនរងគ្រោះភ្លាមៗផងដែរ ក្រោយទទួលដំណឹងពីការបាត់ខ្លួនបុរសរូបនោះលិចចូលក្នុងសមុទ្រ។
លោកបានបញ្ជាក់ថា៖ «ក្រុមឆ្មាំសមុទ្ររបស់យើងបានសហការជាមួយក្រុមមន្ត្រីជំនាញមុជទឹកនៃកំពង់ផែស្វយ័តខេត្តព្រះសីហនុ និងក្រុមអ្នកមុជទឹកមកពីកោះរ៉ុងបាននាំគ្នាមុជទឹករាវរកអស់រយៈពេលជាច្រើនម៉ោង តែរកមិនឃើញ។ ប៉ុន្តែព្រឹកមិញនេះ [ព្រឹកថ្ងៃពុធ] ស្រាប់តែគេឃើញសពរបស់គាត់បានផុសអណ្ដែតមកទើរលើឆ្នេរខ្សាច់ក្នុងចម្ងាយ ១,៣ គីឡូម៉ែត្រ ពីទីកន្លែងកើតហេតុ»។
ការបាត់ខ្លួនរបស់បុរសខាងលើនេះ ស្របពេលដែលក្រសួងធនធានទឹក និងឧតុនិយមបានព្រមានអំពីភាពមិនប្រក្រតីនៃខ្យល់អាកាស និងរលកសមុទ្រក្នុងតំបន់ឆ្នេរ ហើយបានអំពាវនាវឱ្យប្រជាពលរដ្ឋ ជាពិសេសអ្នកទេសចរចូលចិត្តលេងទឹកកម្សាន្តឱ្យមានការប្រុងប្រយ័ត្នចំពោះគ្រោះធម្មជាតិ។
លោក ហេង សុភណ្ឌរិទ្ធ ប្រធានមន្ទីរធនធានទឹក និងឧតុនិយមខេត្តព្រះសីហនុបានប្រាប់ភ្នំពេញប៉ុស្តិ៍កាលពីម្សិលថា កាលថ្ងៃទី ៣ ខែសីហា មានខ្យល់អាកាសបក់បោកខ្លាំង និងមានល្បឿនលឿនព្រមទាំងមានរលកសមុទ្រធំៗដែលមានកម្ពស់រហូតដល់ជាង ២ ម៉ែត្រ។ ក្នុងស្ថានភាពនេះ ក្រុមការងាររបស់លោកក៏បានផ្សព្វផ្សាយភ្លាមៗ ដើម្បីឱ្យពលរដ្ឋក៏ដូចជាអ្នកទេសចរបង្កើនការប្រុងប្រយ័ត្នអំពីបញ្ហាខ្យល់កន្ត្រាក់បក់បោកខ្លាំង និងរលកសមុទ្រខ្ពស់ៗនេះផងដែរ។
លោកថ្លែងថា៖ «ក្រុមការងាររបស់យើងបានផ្សព្វផ្សាយជូនដំណឹងម្ដងហើយ ម្ដងទៀត អំពីស្ថានភាពមិនប្រក្រតីនៃអាកាសធាតុ និងបានអំពាវនាវឱ្យមានការប្រុងប្រយ័ត្ន ប៉ុន្តែបងប្អូនប្រជាពលរដ្ឋភាគច្រើនដែលជាអ្នកទេសចរហាក់ដូចជា មិនយកចិត្តទុកដាក់អំពីសុវត្ថិភាពរបស់ខ្លួននោះទេពួកគេតែងតែរឹងរូសចង់ចុះងូតលេងទឹកសមុទ្រ អ៊ីចឹងហើយទើបមានគ្រោះថ្នាក់ដល់ជីវិតបែបនេះ»។
យោងតាមការព្យាករអាកាសធាតុរបស់ក្រសួងធនធានទឹក និងឧតុនិយមដែលបានចេញផ្សាយកាលពីថ្ងៃទី ៣ ខែសីហា ឆ្នាំ ២០២១ ភ្លៀងលាយឡំខ្យល់កន្ត្រាក់នឹងបន្តកើតមានជាបន្តបន្ទាប់ក្នុងកម្រិតពីមធ្យមទៅខ្លាំងនៅក្នុងក្របខ័ណ្ឌទូទាំងប្រទេស ពិសេសតំបន់មាត់សមុទ្រ និងតំបន់ទំនាបជុំវិញបឹងទន្លេសាប នឹងមានខ្យល់បក់បោកខ្លាំងចាប់ពីថ្ងៃទី ៤ ដល់ថ្ងៃទី ១០ ខែសីហាខាងមុខនេះ៕
