សៀមរាបៈ ក្រុមអ្នកបច្ចេកទេសផ្នែកបុរាណវិទ្យានៃអាជ្ញាធរជាតិអប្សរា បាននិងកំពុងជួសជុលតួអាគ្នេយ៍របស់ប្រាសាទលលៃ ដែលទទួលរងនូវការដួលរលំស្ទើរទាំងស្រុង អស់រយៈពេលរាប់រយឆ្នាំមកហើយ ដោយសារកត្តាអាយុកាល កត្តាធម្មជាតិ និងកង្វះការថែទាំ។
តាមការចុះផ្សាយរបស់អាជ្ញាធរជាតិអប្សរាកាលពីម្សិលមិញបានឱ្យដឹងថា ប្រាសាទលលៃនេះស្ថិតនៅខាងជើងផ្លូវជាតិលេខ ៦ (សៀមរាប-ភ្នំពេញ) ត្រង់បង្គោលគីឡូម៉ែត្រលេខ ១៣ បត់ចុះចម្ងាយ ៥០០ ម៉ែត្រពីផ្លូវជាតិក្នុងភូមិលលៃ ឃុំប្រាសាទបាគង ស្រុកប្រាសាទបាគង ខេត្តសៀមរាប។
អាជ្ញាធរជាតិអប្សរាបញ្ជាក់ទៀតថាការងារជួសជុលបានចាប់ផ្តើមពីពាក់កណ្តាលឆ្នាំ ២០២១ នេះគឺមិនបានជួសជុលឡើងវិញនូវតួប្រាសាទទាំងមូលទេ គឺគ្រាន់តែធ្វើកំណាយពំនូកកម្ទេចឥដ្ឋចេញ ដើម្បីបើកបង្ហាញតួប្រាង្គឡើងវិញ និងជួសជុលពង្រឹងរចនាសម្ព័ន្ធតួប្រាសាទដែលសេសសល់ ដើម្បីបង្ការទប់ស្កាត់ការបង្កគ្រោះថ្នាក់ខូចខាតបន្តទៀតប៉ុណ្ណោះ។
លោក ឡុង កុសល អ្នកនាំពាក្យអាជ្ញាធរជាតិអប្សរា ប្រាប់ភ្នំពេញប៉ុស្តិ៍កាលពីម្សិលមិញថា ប្រាសាទនេះត្រូវបានសាងសង់នៅក្នុងចុងសតវត្សរ៍ទី ៩ ដោយព្រះបាទយសោវរ្ម័នទី ១ ដើម្បីឧទ្ទិសថ្វាយដល់ព្រះឥសូរ ក្នុងសាសនាព្រាហ្មណ៍។ ប្រាសាទនេះ សាងសង់ឡើងអំពីឥដ្ឋ និងមានអាយុកាលនៃសំណង់យូរណាស់មកហើយ បណ្តាលឱ្យរលេះផ្នែកខ្លះ ដែលចាំបាច់ត្រូវតែមានការថែទាំ និងជួសជុលឱ្យបានត្រឹមត្រូវ។
លោកបានថ្លែងថា៖ «អ្វីដែលក្រុមការងារកំពុងធ្វើ គឺដកឥដ្ឋដែលរលុះនោះចេញពីប្រាង្គ ដើម្បីធ្វើកិច្ចការងារបន្តទៀត។ កិច្ចការងារនេះត្រូវធ្វើតែប៉ុណ្ណឹងសិន រហូតដល់ចុងឆ្នាំនេះ»។
បើតាមលោក ឡុង កុសល អាជ្ញាធរជាតិអប្សរាបានជួសជុលស្ទើរតែគ្រប់ទីតាំងប្រាសាទនៅក្នុងមូលដ្ឋានខេត្តសៀមរាប ដោយមិនបន្ធូរដៃឡើយ បើទោះកម្ពុជាកំពុងតែស្ថិតនៅក្នុងស្ថានភាពនៃការរីករាលដាលនៃជំងឺកូវីដ ១៩ ក៏ដោយ។
លោកពន្យល់ថា ការជួសជុលប្រាសាទបុរាណនីមួយៗក៏មិនខុសពីការមើលថែមនុស្សចាស់នោះទេ និងប្រុងប្រយ័ត្នជាទីបំផុត ហើយការជួសជុលប្រាសាទនេះទៀតសោតគឺអាជ្ញាធរជាតិអប្សរាប្រើប្រាស់ថវិកាជាតិទាំងស្រុង និងក្រៅពីនេះក៏មានជំនួយកិច្ចសហប្រតិបត្តិការផ្សេងៗក្នុងការជួសជុលនេះផងដែរ។
អាជ្ញាធរជាតិអប្សរាបញ្ជាក់ថា គម្រោងការជួសជុលតួអាគ្នេយ៍នៃប្រាសាទលលៃនេះ គ្រោងនឹងបញ្ចប់នៅចុងឆ្នាំនេះ៕