កំពតៈ មន្ត្រីជំនាញផ្នែកការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) សាខាខេត្តកំពតបានឱ្យដឹងកាលពីថ្ងៃទី ៣ សីហាថា មន្ទីរពិសោធន៍ជាតិនៃអគ្គលេខាធិការដ្ឋាន ក.ប.ប បានរកឃើញសារធាតុមេតាណុលកម្រិតខ្ពស់នៅក្នុងសំណាកស្រាស និងស្រាថ្នាំចំនួន ១២ ក្នុងចំណោម ២២ សំណាក ដែលត្រូវបានបញ្ជូនមកពីឃុំដូនយ៉យ ស្រុកឈូក ខេត្តកំពត ជាទីដែលមានមនុស្សយ៉ាងតិច ៥ នាក់បានស្លាប់ និងជាង ១០ នាក់ទៀតធ្លាក់ខ្លួនឈឺកាលពីចុងខែកក្កដា។
លោក សុទ្ធ ណារឿន ប្រធានសាខា ក.ប.ប ខេត្តកំពតបានប្រាប់ភ្នំពេញប៉ុស្តិ៍ថា កម្រិតសារធាតុមេតាណុល ដែលត្រូវបានរកឃើញក្នុងសំណាកស្រាស និងស្រាថ្នាំចំនួន ១២ ក្នុងចំណោម ២២ សំណាក ដែលនាំមកពីតំបន់ដូនយ៉យ ស្រុកឈូកខេត្តកំពតនោះគឺមានចន្លោះពី ១០,៩ ភាគរយ ដល់ ១៨,៦ ភាគរយដែលអាចបង្កឱ្យអ្នកទទួលទានស្លាប់បាន។
លោកបានថ្លែងថា៖ «ជាទូទៅនៅក្នុងផលិតផលស្រាដែលមានសុវត្ថិភាពសម្រាប់អ្នកនិយមទទួលទានស្រា គឺមានសារធាតុមេតាណុលមិនលើសពី ០,២ ភាគរយឡើយ។ ប៉ុន្តែសំណាកស្រាស និងស្រាថ្នាំដែលយើងបានប្រមូលយកពីតំបន់ដូនយ៉យ ជាទីដែលមានមនុស្ស ៥ នាក់ស្លាប់ និង ១៤ នាក់ទៀត ធ្លាក់ខ្លួនឈឺកាលពីចុងខែកក្កដានោះ មានកម្រិតសារធាតុមេតាណុលពី ១០,៩ ភាគរយរហូតដល់ ១៨,៦ ភាគរយ»។
លោកបានបន្ថែមថា៖ «កម្រិតនេះអាចធ្វើឱ្យអ្នកទទួលទានស្លាប់ ឬធ្លាក់ខ្លួនឈឺរ៉ាំរ៉ៃ ប្រសិនបើទទួលទានវាលើសពី ១៥ មិល្លីលីត្រ សម្រាប់មនុស្សដែលមានជំងឺខ្សោយបេះដូង និងលើសសម្ពាធឈាមប្រចាំកាយ»។
បើតាមលោក ណារឿន សារធាតុមេតាណុលត្រូវបានគេប្រើប្រាស់នៅក្នុងឧស្សាហកម្ម ថ្នាំលាបផ្ទះ ក្ដារបន្ទះ និង ឧស្សាហកម្មមួយចំនួនទៀត។ សារធាតុនេះអាចបង្កឱ្យរមាស់ស្បែក ឈឺក្បាល រលាកផ្លូវដង្ហើម ជាពិសេសដំបៅមហារីកក្រពះ។
ជាមួយលទ្ធផលតេស្តពីមន្ទីរពិសោធន៍ខាងលើនេះ សមត្ថកិច្ចនគរបាលជំនាញកាលពីថ្ងៃទី ២ សីហាបានបញ្ជូនសំណុំរឿង និងជនសង្ស័យ ២ នាក់រួមមានឈ្មោះ គង់ ធាន និងឈ្មោះ ផាន់ ចេង ដែលជាអាជីវករលក់ស្រាស និងស្រាថ្នាំ នៅឃុំដូនយ៉យទៅតុលាការ ដើម្បីចាត់វិធានការបន្តតាមនីតិវិធី។ នេះ បើតាមលោក លក ញ៉ាវ ស្នងការរងខេត្តកំពតទទួលបន្ទុកផ្នែកព្រហ្មទណ្ឌ។
លោកថ្លែងថា៖ «យើងបានបញ្ជូនសំណុំរឿងពុលស្រានោះ និងជនសង្ស័យ ២ នាក់ ទៅតុលាការហើយ»។
អ្នកនាំពាក្យអយ្យការអមសាលាដំបូងខេត្តកំពត លោក ខា ដែនណា បានប្រាប់ភ្នំពេញប៉ុស្តិ៍ថា ជនសង្ស័យទាំង ២ នោះត្រូវបានតុលាការខេត្តកំពតសម្រេចចោទប្រកាន់ពីបទ «ប្រព្រឹត្តអំពើមិនសុចរិតទាក់ទងនឹងទំនិញ សេវា ឬការអះអាងដោយបំភាន់ មានស្ថានទម្ងន់ទោសតាមបញ្ញត្តិមាត្រា ៤៣ នៃច្បាប់ស្ដីពីកិច្ចការពារអ្នកប្រើប្រាស់» និងបានបង្គាប់ឱ្យសមត្ថកិច្ចនគរបាលយុត្តិធម៌នាំយកពួកគេទៅឃុំខ្លួននៅពន្ធនាគារខេត្ត ជាបណ្ដោះអាសន្នតាំងពីថ្ងៃទី ២ ខែសីហាមកម្ល៉េះ។
ក្នុងរយៈពេល ៣ ខែចុងក្រោយនេះ ខេត្តកំពតមានករណីពុលស្រាកើតឡើងចំនួន ៣ លើកដោយបានបង្កឱ្យមនុស្សសរុបចំនួន ១៨ នាក់ស្លាប់ និង ១៥០ នាក់ទៀតធ្លាក់ខ្លួនឈឺ។
ទន្ទឹមនឹងនេះ រដ្ឋបាលខេត្តកំពតបានចេញបម្រាមហាមឃាត់ការទិញលក់ និងផលិតស្រាស និងស្រាថ្នាំនៅទូទាំងខេត្ត ដើម្បីទប់ស្កាត់ការទទួលទានស្រាស និងស្រាថ្នាំ ដែលមានកម្រិតជាតិមេតាណុលខ្ពស់បង្កឱ្យមានគ្រោះថ្នាក់ ស្របពេលដែលមន្ត្រីជំនាញនៃអគ្គនាយកដ្ឋាន ក.ប.ប សហការជាមួយកម្លាំងនគរបាលក្រសួងមហាផ្ទៃបានចុះបង្ក្រាបចាប់រឹបអូសអាល់កុលក្លែងក្លាយ ឬសារធាតុមេតាណុលរាប់សិបពាន់លីត្រ ពីគ្រប់បណ្ដាខេត្ត និងរាជធានី មកដុតបំផ្លាញចោលស្ទើរតែរៀងរាល់ខែ៕
វីដេអូ៖