ភ្នំពេញៈ ក្រុមអ្នកបើកបរឡានធំដឹកខ្សាច់លើសទម្ងន់កំណត់នៃច្បាប់ ចំនួន ៣៥ នាក់បានរួមគ្នាផ្ដិតមេដៃដាក់ញត្តិ បន្តការតវ៉ាទាមទារសុំយករថយន្តដែលសមត្ថកិច្ចបានឃាត់ទុក ព្រោះតែអំពើល្មើសច្បាប់នាពេលកន្លងមក ដោយព្រមទទួលកំហុស និងសុំការអនុគ្រោះពីផ្លូវច្បាប់។
ក្រុមអ្នកតវ៉ាបានព្យាយាមដាក់ញត្តិទៅកាន់ក្រសួងសាធារណការ ខុទ្ទកាល័យលោកនាយករដ្ឋមន្ត្រី ហ៊ុន សែន និងព្រះបរមរាជវាំង ដើម្បីស្នើសុំឱ្យជួយអន្តរាគមន៍លើកលែងទោស និងសុំឱ្យប្រគល់រថយន្តមកបន្តធ្វើអាជីវកម្មវិញ។
ញត្តិរបស់ពួកគេដែលបានដាក់ជូនទៅស្ថាប័នទាំង ៣ នោះបានឱ្យដឹងថា៖ «យើងខ្ញុំពិតជាមានការសោកស្តាយណាស់ចំពោះការប្រព្រឹត្តខុស ដូច្នេះយើងខ្ញុំទាំងអស់គ្នា ព្រមទទួលខុសត្រូវតាមផ្លូវច្បាប់ដោយបានបង់លើការពិន័យជាទឹកប្រាក់រួចមកហើយ។ ប៉ុន្តែករណីរក្សារថយន្តនៅកន្លែង (សមត្ថកិច្ច) យើងខ្ញុំស្នើសុំមេត្តាលើកលែង និងអនុញ្ញាតឱ្យយករថយន្តទៅប្រកបរបររកស៊ីត្រឹមត្រូវតាមផ្លូវច្បាប់វិញ ដោយក្តីអនុគ្រោះ»។
លោក លឹម មុនី តំណាងម្នាក់ដែលបានចូលរួមការដាក់ញត្តិនេះបានប្រាប់ ភ្នំពេញ ប៉ុស្តិ៍ នៅថ្ងៃទី ៤ សីហាថា មូលហេតុដែលពួកគេទាមទារសុំឱ្យប្រគល់រថយន្តមកវិញ ព្រោះពួកគេម្នាក់ៗបានជំពាក់លុយធនាគារ ហើយបាត់បង់អាជីវកម្មដោយសារតែរថយន្តជាប់នៅក្នុងដែនសមត្ថកិច្ច។
លោក មុនី បានថ្លែងថា៖ «ប្រសិនបើរង់ចាំក្នុងរយៈពេល ១ ឆ្នាំនៃការឃាត់ទុក (តាមច្បាប់កំណត់ ហើយទើបប្រគល់រថយន្តមកវិញ) នោះធនាគារនឹងរឹបអូសយកអចលនទ្រព្យរបស់ពួកយើងអស់ជាមិនខាន ហើយរថយន្តដែលទុកចោលយូរត្រូវរងការខូចខាត និងជួសជុលឡើងវិញ ដូច្នេះយើងខ្ញុំគ្មានលទ្ធភាពសម្រាប់ជួសជុលនោះទេ»។
លោកបានបញ្ជាក់ថា៖ «ពួកខ្ញុំ ពិតជាទទួលកំហុស និងសន្យាឈប់ប្រព្រឹត្តល្មើសនឹងការដឹកលើសទម្ងន់នេះទៀតហើយ»។
កាលពីថ្ងៃទី ២០ ខែកក្កដា អ្នកបើកឡាន និងម្ចាស់ឡានដឹកដី ដឹកខ្សាច់ប្រមាណ ២០០ នាក់បានប្រមូលផ្តុំគ្នាតវ៉ាម្តងរួចមកហើយ ប៉ុន្តែសំណើរបស់ពួកគេត្រូវបានក្រសួងសាធារណការ និងដឹកជញ្ជូន បានបដិសេធ ព្រោះផ្ទុយច្បាប់ មិនអាចអនុញ្ញាតបាននោះទេ។
លោក គង់ ចំរើន តំណាងខុទ្ទកាល័យនាយករដ្ឋមន្ត្រី ហ៊ុន សែន បានប្រាប់ភ្នំពេញប៉ុស្តិ៍នៅថ្ងៃទី ៤ សីហាថា លោកមិនហ៊ានទទួលញត្តិរបស់ក្រុមអ្នកតវ៉ានោះទេ ដោយសារតែពិនិត្យឃើញថា សំណើដែលពួកគាត់ស្នើសុំ គឺខុសនឹងច្បាប់។
លោកថ្លែងថា៖ «គាត់មកដាក់ហើយ តែខ្ញុំមិនហ៊ានទទួលទេ ព្រោះទម្រង់នៃលិខិតនេះគឺខុសច្បាប់។ កាលណាក្រសួងសាមី គេថាខុសច្បាប់អ៊ីចឹង បើយើងអន្តរាគមន៍ទទួលបន្តទៀត គឺកាន់តែខុសច្បាប់»។
ទោះជាយ៉ាងណាក៏ដោយ លោក គង់ ចំរើន ពន្យល់ណែនាំឱ្យពលរដ្ឋចូលរួមគោរពច្បាប់ទាំងអស់គ្នា ព្រោះច្បាប់បានផ្សព្វផ្សាយទៅកាន់ពលរដ្ឋហើយ។
លោក ប៉ាល់ ច័ន្ទតារា រដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍នៅថ្ងៃទី ៤ សីហាថា ក្រសួងមិនមានគោលការណ៍ដោះស្រាយលើសំណើស្នើឱ្យប្រគល់រថយន្តទៅពួកគេវិញបានទេ។
លោកអះអាងថា៖ «ផ្ទុយទៅវិញ យើងនឹងនៅតែបន្តវិធានការក្តៅ រឹតបន្តឹងការអនុវត្តច្បាប់ពាក់ព័ន្ធបទល្មើសដឹកលើសទម្ងន់នេះបន្តទៀត ដើម្បីធានាដល់ការគោរព និងអនុវត្តច្បាប់»។
តាមក្រសួងសាធារណការ និងដឹកជញ្ចូនបានឱ្យដឹងថា ក្នុងរយៈពេល ១ ឆ្នាំនៃការអនុវត្តច្បាប់ចរាចរណ៍ផ្លូវគោកក្នុងពេល កន្លងមកនេះ មន្ត្រីបានឃាត់យានយន្តដឹកលើសទម្ងន់នៃច្បាប់កំណត់ជិត ២០០ គ្រឿង ដើម្បីយកមករក្សាទុក រយៈពេល ១ ឆ្នាំ និងពិន័យជាប្រាក់ទៅតាមកម្រិតនៃបទល្មើស៕
វីដេអូ៖