.jpg)
វ៉ាក់សាំងជាជំនួយទ្វេភាគីរបស់អង់គ្លេស បានដឹកមកដល់កម្ពុជានៅរសៀលថ្ងៃទី ៥ សីហានេះ។ ហេង ជីវ័ន
ភ្នំពេញៈ វ៉ាក់សាំង Oxford AstraZeneca ដែលជាការបរិច្ចាគរបស់ចក្រភពអង់គ្លេស ចំនួន ៤១៥ ០០០ ដូស ក្នុងក្របខ័ណ្ឌទ្វេភាគីជូនរាជរដ្ឋាភិបាលកម្ពុជាបានមកដល់ព្រលានយយន្តហោះអន្តរជាតិភ្នំពេញហើយ ខណៈលោកនាយករដ្ឋមន្ត្រី ហ៊ុន សែន ប្រកាសដាក់ចេញយុទ្ធនាការចាក់វ៉ាក់សាំងបង្ការជំងឺកូវីដ ១៩ ដូសទី៣ ឬដូសជំរុញ ស្របជាមួយយុទ្ធនាការចាក់វ៉ាក់សាំងកូវីដ ១៩ ដល់កុមារ។
នារសៀលម៉ោង ២ រសៀលនេះ ថ្ងៃទី ៥ សីហានេះ វ៉ាក់សាំង Oxford AstraZeneca បានដឹកមកដល់កម្ពុជា និងបានធ្វើពិធីប្រគល់និងទទួលរវាងឯកអគ្គរាជទូតស្តីទីរបស់ចក្រភពអង់គ្លេសប្រចាំកម្ពុជានិងលោកនាយករដ្ឋមន្ត្រី ហ៊ុន សែន ។
ថ្លែងក្នុងឱកាសនោះលោក ហ៊ុន សែន បានស្នើទៅចក្រភពអង់គ្លេសឲ្យបន្តផ្តល់ជំនួយជាវ៉ាក់សាំងប្រភេទនេះ មកកាន់កម្ពុជាបន្ថែមទៀត ដើម្បីកម្ពុជាអាចបន្តយុទ្ធនាការចាក់វ៉ាក់សាំងជាដូសជំរុញជូនដល់ប្រជាពលរដ្ឋឲ្យកាន់តែមានប្រសិទ្ធភាពខ្ពស់បន្ថែមពីវ៉ាក់សាំងដែលបានចាក់ហើយចំនួន ២ លើក។
ស្របពេលជាមួយនេះផងដែរ លោកនាយករដ្ឋមន្ត្រី ក៏បានប្រកាសថា រាជរដ្ឋាភិបាលកម្ពុជាក៏បានសម្រេចដាក់ចេញនូវយុទ្ធនាការចាក់វ៉ាក់សាំងបង្ការជំងឺកូវីដ ១៩ ដូសទី៣ ឬដូសជំរុញជូនមន្ត្រីសេវាសាធារណៈជួរមុខដែលកំពុងបម្រើការនៅតាមបណ្តាខេត្តនានា ដែលស្ថិតនៅតាមព្រំដែនជាមួយប្រទេសថៃ ដែលមេរោគដែលតាបបំប្លែងថ្មីកំពុងវាយលុក ស្របជាមួយយុទ្ធនាការចាក់វ៉ាក់សាំងកូវីដ ១៩ ដល់កុមារ និងយុវវ័យដែលមានអាយុចាប់ពី ១២ ឆ្នាំដល់ក្រោម ១៨ ឆ្នាំ។
លោក ហ៊ុន សែន បានបញ្ជាក់ថាវ៉ាក់សាំងដែលទទួលបានក្នុងពេលនេះគឺជាវ៉ាក់សាំងសម្រាប់ចាក់ជូនប្រជាពលរដ្ឋក្នុងយុទ្ធនាការចាក់ដូសទី៣ ក្នុងពេលនេះ។
លោកបញ្ជាក់ថា៖ «អំពាវនាវដល់ប្រជាពលរដ្ឋ អនុវត្តវិធានការ ៣ កុំ ៣ ការពារ និងចូលរួមក្នុងយុទ្ធនការចាក់វ៉ាក់សាំង ដើម្បីការពារសុវត្ថិភាព សុខភាព ក៏ដូចជាសុខមាភាពរបស់គ្រួសារ សហគញមន៍ និងសង្គមជាតិទាំងមូល»៕
