ព្រះវិហារៈ អយ្យការអមសាលាដំបូងខេត្តព្រះវិហារ នៅថ្ងៃទី ៥ សីហា បានចោទប្រកាន់បុរស ៤ នាក់ ប៉ុន្មានម៉ោងបន្ទាប់ពីនគរបាល បញ្ជូនដល់តុលាការ ពាក់ព័ន្ធបទជួញដូរគ្រឿងញៀងមេតំហ្វេតាមីនជាង ៣០ ក្រាម ប្រព្រឹត្តនៅភូមិរលំថ្ម ក្នុងឃុំរំដោះស្រែ ស្រុកជាំក្សាន្ត។
លោក ស៊ុន ចលនា នាយការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តព្រះវិហារឱ្យដឹងនៅថ្ងៃទី ៥ សីហាថា ជនទាំង ៤ នាក់ ទី១-ឈ្មោះ វែង គ្រឹស្នា ភេទប្រុស អាយុ ២៥ ឆ្នាំ មុខរបរ ជាអតីតយោធា ទី២ ឈឿន ចាន់ ដា ភេទ ប្រុស អាយុ ២៤ ឆ្នាំ មានរបរជាជាងអ៊ុតស្គុតម៉ូតូ ទី៣ ខឿត ឈុន ណា ភេទប្រុស អាយុ ២០ ឆ្នាំ មានរបរមិនពិតប្រាកដ និងឈ្មោះ ប៊ុត ឆើត ភេទប្រុស អាយុ ៣៧ ឆ្នាំជាកសិករ។
លោកប្រាប់ថា៖ «ជនទាំង ៤ នាក់ ត្រូវតំណាងអយ្យការ ចោទពីបទរក្សាទុក ជួញដូរ និងប្រើប្រាស់តាមមាត្រា ៤០ និង ៤៥ នៃច្បាប់ស្តីពីការត្រួតពិនិត្យគ្រឿងញៀន»។
លោករំឭកថា កាលពីថ្ងៃទី ៣ សីហា មុនមានការឃាត់ខ្លួន គឺកម្លាំងសមត្ថកិច្ច ការិយាល័យប្រឆាំងបទល្មើសគ្រឿងញៀន បានតាមដានមុខសញ្ញានេះជាច្រើនថ្ងៃមកហើយ។
លុះនៅថ្ងៃទី ៣ សីហា ក្រុមជនសង្ស័យ បានកំពុងធ្វើការចែកចាយគ្រឿងញៀន ហើយដោយមានការតាមដានពួកគេយ៉ាងប្រកិតៗនោះ កម្លាំងសមត្ថកិច្ច របស់លោក ក៏ធ្វើការឃាត់ខ្លួនពួកគេជាក់ស្តែង ស្ថិតនៅភូមិរលំថ្ម ក្នុងឃុំរំដោះស្រែ ស្រុកជាំក្សាន្ត ខេត្តព្រះវិហារ។
បើតាមលោក ចលនា ថា ពេលឃាត់ខ្លួនដំបូងឈ្មោះ វែង គ្រឹស្នា អះអាងប្រាប់សមត្ថកិច្ចថា ជាយោធានៅអង្គភាពកងពលលេខ ៩ ឈរជើងនៅខេត្តព្រះវិហារ។
ប៉ុន្តែពេលលោកទៅសួរនៅអង្គភាពកងពលលេខ ៩ នោះ ត្រូវបានមេបញ្ជាការអង្គភាពថា ឈ្មោះ វែង គ្រឹស្នា ម្នាក់នេះ ត្រូវបានបណ្តេញចេញ និងលុបឈ្មោះពីអង្គភាពយូរមកហើយ ព្រោះជនម្នាក់នេះ មិនគោរពវិន័យអង្គភាព។
លោកបញ្ជាក់ថា ចំពោះវត្ថុតាងរួមមាន ថ្នាំញៀនប្រភេទមេតំហ្វេតាមីនចំនួន ១៣ កញ្ចប់ធំ និងឧបករណ៍សម្រាប់ជក់គ្រឿងញៀ មួយចំនួន ព្រមទាំងទូរស័ព្ទដៃចំនួន ចំនួន ៣ គ្រឿង៕