មណ្ឌលគិរីៈ ការិយាល័យ WWF-Cambodia ប្រចាំខេត្តមណ្ឌលគិរី នៅព្រឹកថ្ងៃទី ០៥ ខែ សីហា ឆ្នាំ ២០២១ បានផ្ដល់រង្វាន់លើកទឹកចិត្ត និងលិខិតសរសើរជូនមន្រ្តីឧទ្យានុរក្សនៃមន្ទីរបរិស្ថានខេត្តមណ្ឌលគិរីចំនួន ៦ នាក់ បានទទួលជ័យលាភីជាមន្ត្រីឧទ្យានុរក្សមានស្នាដៃឆ្នើម នៅក្នុងឆ្នាំនេះ។
លោក កែវ សុភគ៌ ប្រធានមន្ទីរបរិស្ថាន ខេត្តមណ្ឌលគិរី ដែលបានចូលរួមនៅក្នុងពីធីផ្ដល់រង្វាន់ និងលិខិតសរសើរដល់ម្ចាស់ជ័យលាភីជាឧទ្យានុរក្សឆ្នើមទាំងនោះ បានប្រាប់ភ្នំពេញប៉ុស្តិ៍ថា ពិធីនេះបានធ្វើឡើងជារៀងរាល់ឆ្នាំ ដែលក្នុងមួយឆ្នាំៗមានអ្នកឈ្នះចំនួន ៦ នាក់។ សម្រាប់អ្នកឈ្នះនៅក្នុងឆ្នាំនេះ រួមមានឈ្មោះ សាន ធួន, អ៊ឹង រដ្ឋា, ម៉ៃ សាម៉ន, រ៉េត ភារុន, ផាតស្នា និងឈ្មោះ អឿន សំរិត។
លោកបានបញ្ជាក់ថា៖ «ការវាយតម្លៃ និង ការផ្ដល់រង្វាន់លើកទឹកចិត្តដល់មន្ត្រីឧទ្យានុរក្សទាំង៦នាក់នេះ ធ្វើឡើង ដោយមានការចូលរួមពីថ្នាក់ដឹកនាំអង្គភាពនិង អង្គការ WWF-Cambodia ដែលជាដៃគូ និងជាអ្នកឧបត្ថម្ភលើកម្មវិធីនេះ។ ការវាយតម្លៃ និងជ្រើសរើសពួកគាត់ឲ្យឈ្នះលើកម្មវិធី ជាមន្ត្រីឧទ្យានុរក្សមានស្នាដៃឆ្នើមនៅឆ្នាំនេះមិនសំដៅលើតែសកម្មភាពការងារការពារ អភិរក្ស និងបង្ក្រាបបទល្មើសធនធានធម្មជាតិប៉ុណ្ណោះទេ តែត្រូវផ្ដោតសំខាន់ទៅលើ សកម្មភាពចុះសិក្សាស្រាវជ្រាវ និង ផ្សព្វផ្សាយអប់រំ ដោយបំផុសចលនាប្រជាពលរដ្ឋ ឲ្យចូលរួមការពារបរិស្ថានផងដែរ»។
បើតាមលោក សុភគ៌ មន្ត្រីឧទ្យានុរក្សនៅទូទាំងខេត្តមណ្ឌលគិរី មានចំនួនសរុប ១១៥ នាក់ ក្នុងនោះ ៩៦ នាក់ ជាមន្ត្រីឧទ្យានុរក្សក្រសួងបរិស្ថាន ចំណែក ១៥ នាក់ទៀត គឺជាកម្លាំងសហការ ដែលមកពីអង្គភាពពាក់ព័ន្ធក្នុងខេត្តមណ្ឌលគិរី។
អ្នកឈ្នះពានរង្វាន់ជាមន្ត្រីឧទ្យានុរក្សមានស្នាដៃឆ្នើមម្នាក់ ក្នុងចំណោមអ្នកឈ្នះ ៦ នាក់ នៅក្នុងឆ្នាំនេះ លោក ម៉ៃ សាម៉ន អាយុ ៤១ ឆ្នាំ ជាមន្ត្រីឧទ្យានុរក្ស មកពីដែនជម្រកសត្វព្រៃភ្នំព្រេច បានប្រាប់ ភ្នំពេញ ប៉ុស្តិ៍ថា លោកនឹងបន្តខិតខំប្រឹងប្រែងលើកិច្ចការងារបន្ថែមទៀត ដើម្បីទទួលបានជ័យលាភីជាថ្មីម្ដងទៀតនៅឆ្នាំក្រោយ។
លោក សាម៉ន ដែលមានជំនាញខាងផ្នែកសិក្សាស្រាវជ្រាវជីវចម្រុះ និងបានចូលបំពេញការងារជាមន្ត្រីឧទ្យានុរក្ស ចាប់តាំងពីឆ្នាំ ២០០២ មក បានថ្លែងថា៖ «ខ្ញុំពិតជារីករាយណាស់ នៅពេលក្រុមគណៈកម្មការបានវាយតម្លៃខ្ពស់លើកិច្ចខិតខំប្រឹងប្រែងរបស់ខ្ញុំនៅក្នុងការងារសិក្សាស្រាវជ្រាវអំពីជីវចម្រុះនៅក្នុងដែនជម្រកសត្វព្រៃភ្នំព្រេច និងការងារស្នូលមួយចំនួនទៀត ទាក់ទងនិងការផ្សព្វផ្សាយអប់រំដល់ពលរដ្ឋ ព្រមទាំងការការពារ អភិរក្ស និងបង្ក្រាបបទល្មើសធនធានធម្មជាតិក្នុងតំបន់នេះ។ ខ្ញុំនឹងបន្តខិតខំថែមទៀត ដើម្បីឈ្នះពានរង្វាន់នេះនៅឆ្នាំបន្តបន្ទាប់ទៀត»។
លោក ម៉ី ផល្លា ប្រធានកម្មវិធីអភិរក្សតំបន់ព្រៃទេសភាពភាគខាងកើតនៃអង្គការ WWF-Cambodia បាននិយាយថា អង្គការ WWF បាននឹងកំពុងបន្តការគាំទ្រលើការងារអភិរក្ស ដល់មន្រ្តីឧទ្យានុរក្ស ក្នុងដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេច នៃមន្ទីរបរិស្ថានខេត្តមណ្ឌលគិរី លើផ្នែកថវិកា បច្ចេកទេស សម្ភារ និងបណ្តុះបណ្តាលផងដែរ។
ទន្ទឹមនិងស្ថានភាពនៃជម្ងឺ COVID-19 កំពុងរីករាលដាលក្នុងសហគមន៍ មន្រ្តីឧទ្យានុរក្ស ដែលជាវិរៈបុរសការពារធនធានធម្មជាតិ កំពុងតែនៅក្នុងព្រៃ ដើម្បីទប់ស្កាត់បទល្មើសដូចជាការដាក់អន្ទាក់ បរបាញ់សត្វព្រៃ កាប់ឈើ និងរានដីព្រៃជាដើម។ ពួកគាត់មិនត្រឹមតែទប់ស្កាត់បទល្មើសទាំងនេះទេ តែពួកគាត់ត្រូវទប់ទល់នឹងការឆ្លងនៃជម្ងឺ COVID-19 មកលើខ្លួនគាត់ និងក្រុមគ្រួសារផងដែរ។
បានថ្លែងថា៖ «កម្មវិធីផ្ដល់ពានរង្វាន់ និងលិខិតសរសើរ ដល់មន្រ្តីឧទ្យានរុក្សឆ្នើមនេះ គឺដើម្បីលើកទឹកចិត្ត នូវកិច្ចខិតខំប្រឹងប្រែងក្នុងការងារអភិរក្សធនធានធម្មជាតិរបស់ពួកគាត់»។
បើតាមលោ កា ផល្លា កិច្ចការពង្រឹងការអនុវត្តច្បាប់ជាធាតុស្នូលមួយនៃការគ្រប់គ្រងតំបន់ការពារធម្មជាតិ និងត្រូវបានអនុវត្តយ៉ាងខ្ជាប់ខ្ជួនដោយមន្រ្តីឧទ្យានុរក្សចំនួន ១១៤ រូប ក្នុងដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេចនៃតំបន់ព្រៃទេសភាពភាគខាងកើត។ បន្ថែមពីលើការអនុវត្តភារកិច្ចដោយមន្រ្តីល្បាត សមាជិកសហគមន៍សរុបចំនួន ៥៨៨ នាក់ផ្សេងទៀតក៏បាន និងកំពុងចូលរួមក្នុងសកម្មភាពល្បាតជាប្រចាំនៅក្នុងតំបន់ការពារព្រៃសហគមន៍របស់ខ្លួនផងដែរ៕