The Phnom Penh Post Search

Search form

Logo of Phnom Penh Post newspaper Phnom Penh Post - អាជ្ញាធរ​ស្រុក​ទឹកឈូ ស្នើ​ទៅ​អាជ្ញាធរ​ខេត្តកំពត មាន​វិធានការ​លើ​ក្រុមហ៊ុន​កំពត​ផត ដែល​ឈូសឆាយដី​ប៉ះពាល់​ដី​ពលរដ្ឋ




អាជ្ញាធរ​ស្រុក​ទឹកឈូ ស្នើ​ទៅ​អាជ្ញាធរ​ខេត្តកំពត មាន​វិធានការ​លើ​ក្រុមហ៊ុន​កំពត​ផត ដែល​ឈូសឆាយដី​ប៉ះពាល់​ដី​ពលរដ្ឋ

Content image - Phnom Penh Post
សមត្ថ​កិច្ច​ស្រុក​ទឹក​ឈូ ចុះ​ទៅ​ហាម​ឃាត់​គ្រឿង​ចក្រ​ក្រុម​ហ៊ុន កំពតផត កាលពី​ថ្ងៃ​ទី​៣ ខែ​សីហា ឆ្នាំ​២០២១។ រូប​ថត ហ្វេស​ប៊ុក

អាជ្ញាធរ​ស្រុក​ទឹកឈូ ស្នើ​ទៅ​អាជ្ញាធរ​ខេត្តកំពត មាន​វិធានការ​លើ​ក្រុមហ៊ុន​កំពត​ផត ដែល​ឈូសឆាយដី​ប៉ះពាល់​ដី​ពលរដ្ឋ

កំពតៈ អាជ្ញាធរ​ស្រុក​ទឹកឈូ កំពុង​ធ្វើ​របាយការណ៍​ដាក់ជូនទៅ​អាជ្ញាធរ​ខេត្តកំពត ដើម្បី​មាន​វិធានការ​លើ​ក្រុមហ៊ុន​កំពត​ផត បន្ទាប់ពី​បាន​ចុះទៅ​ហាមឃាត់​ក្រុមហ៊ុន​នេះ​ ឲ្យ​ផ្អាក​សកម្មភាព​ឈូសឆាយ​ប៉ះពាល់​ដល់​ដី​ពលរដ្ឋ​ ១៩ គ្រួសារ នៅ​ចំណុច​ភូមិ​ព្រែក​អំពិល ឃុំ​កោះ​តូច ស្រុក​ទឹកឈូ កាលពី​ថ្ងៃទី ៣ ខែសីហា។

លោក អ៊ឹម ច័ន្ទ​សោធន អភិបាលរង​ស្រុក​ទឹកឈូ ថ្លែង​ពី​ម្សិលមិញ​ថា ពេលនេះ​អាជ្ញាធរ​ស្រុក​កំពុង​ធ្វើ​របាយការណ៍​ ដើម្បី​ដាក់ជូនទៅ​រដ្ឋបាលខេត្ត រក​វិធានការ​ដោះស្រាយ​បន្ត បន្ទាប់ពី​បាន​ចុះទៅ​ធ្វើការ​ហាមឃាត់​គ្រឿងចក្រ​ក្រុមហ៊ុន​កំពត​ផត​ឲ្យ​ផ្អាក​សកម្មភាព​ឈូ​ឆាយដី​ប៉ះពាល់​ចូលដល់​ដី​ប្រជាពលរដ្ឋ នៅ​ភូមិ​ព្រែក​អំពិល ឃុំ​កោះ​តូច ស្រុក​ទឹកឈូ​កាលពី​ថ្ងៃទី ៣ ខែសីហា។

លោក​អភិបាលរង​ស្រុក​បន្តថា ការចុះទៅ​ហាមឃាត់​សកម្មភាព​ឈូសឆាយដី​ នៅ​ទីតាំង​នោះ​ធ្វើឡើង​ដោយយោង​តាម​ពាក្យបណ្តឹង​របស់​ប្រជាពលរដ្ឋ​ចំនួន១៩គ្រួសារ បាន​ចោទប្រកាន់ថា ក្រុមហ៊ុន​កំពត​ផត​កំពុង​ធ្វើ​សកម្មភាព​រំលោភ​លើដីរ​បស់​ខ្លួន។

លោក​ថ្លែងថា៖ «ការ​ចុះមក​ពេលនេះ យើង​ធ្វើការ​ហាមឃាត់​សកម្មភាព​គ្រឿងចក្រ​ឲ្យ​ផ្អាក​សិន។ រង់ចាំ​ការដោះស្រាយ ពី​សំណាក់​អាជ្ញាធរ និង​ជំនាញ​ពាក់ព័ន្ធ​រួចរាល់ ទើប​អាច​ឲ្យ​បន្តធ្វើ សកម្មភាព​បាន»។

លោក​បាន​បញ្ជាក់ថា កន្លងមក​អាជ្ញាធរ​បាន​កោះអញ្ជើញ​តំណាង​ក្រុមហ៊ុន​ជាច្រើន​សារ​ឲ្យ​ចូលរួម​ពិភាក្សា​ដោះស្រាយ​ដោយផ្ទាល់​ជាមួយ​ប្រជាពលរដ្ឋ តែ​ត្រូវ​ខាង​ក្រុមហ៊ុន​បដិសេធ និង​បន្តធ្វើ​សកម្មភាព​ឈូសឆាយ​លើដី​ប្រជាពលរដ្ឋ​ដែល​នៅជាប់​ក្បែរ​នោះ​ដោយ​សំអាងថា​ ជា​ដី​របស់​ក្រុមហ៊ុន។

លោក ចំរើន ចាន់​នុំ តំណាង​ប្រជាពលរដ្ឋ ១៩ គ្រួសារ និយាយថា ដី​ពួកគាត់​ មាន​បណ្ណ​កាន់កាប់​ត្រឹមត្រូវ និង​បាន​អាស្រ័យ​ផល​ជាច្រើន​ឆ្នាំ ដែល​កន្លងមក​ មិន​ដែលមាន​បញ្ហា​អ្វី​កើតឡើង​ទេ។ ប៉ុន្តែ​ចាប់តាំងពី​ដី​​នៅ​ខេត្ត​កំពត​ឡើងថ្លៃ​នៅ​ឆ្នាំ ២០១៩ រហូតមក ក្រុមហ៊ុន​ចេះតែ​វាទ​ព្រំ​របស់ខ្លួន​កាន់តែ​ធំទៅៗ រំលង​ភ្នំ ឆ្លង​អូរ រហូតមកដល់​ដី​ពលរដ្ឋ​។

លោក​ថ្លែងថា៖ «ពួក​ខ្ញុំ​ស្នើសុំ​ឲ្យ​អាជ្ញាធរ មន្ត្រី​ជំនាញ និង​អ្នកពាក់ព័ន្ធ ជួយ​ជំរុញ និង​ព​ន្លឿ​ន​ការដោះស្រាយ​ជូន​ពួកគេ​ឱ្យបាន​ឆាប់រហ័ស​បំផុត។ ព្រោះ​បច្ចុប្បន្ន​ក្រុមហ៊ុន​ មិន​ត្រឹមតែ​បំផ្លាញដំណាំ និង​វាយកម្ទេច​របង​ព្រំដី​នោះទេ ថែមទាំង​យក​គ្រឿ​ចក្រ​មក​ឈូសឆាយ​តាម​អំពើ​ចិត្ត​ទៀតផង»។

បើតាម​លោក ចាន់​នុំ ក្រុមហ៊ុន​នៅតែ​បន្ត​ឲ្យ​គ្រឿងចក្រ​ឈូសឆាយ​ថែមទៀត បើទោះបីជា​អាជ្ញាធរ​ស្រុក​បាន​ចុះទៅ​ណែនាំ​ឲ្យ​មានការ​ផ្អាក​ដើម្បី​ដោះ​ស្រាយ​ក៏ដោយ ។ លោក​ថា ក្រុមហ៊ុន​បាន​ឈូសឆាយ​ចូល​ដី​ពលរដ្ឋ​ប្រមាណ ជិត ៤០ ហិកតា​ហើយ គិត​មកដល់​ថ្ងៃទី ៥ ខែសីហា។

លោក គិត វុ​ធ ប្រធានការិយាល័យ​ដែនដី​ស្រុក​ទឹកឈូ ថ្លែង​ពី​ម្សិលមិញ​ថា លោក​មិន​បានដឹង​ពី​រឿងនេះ​ទេ ថ្វីបើ​លោក​អភិបាលរង​ស្រុក​ បាន​ចុះទៅ​ផ្ទាល់​ដល់ទី​តាំង​នោះក្តី​។

លោក​ថ្លែងថា៖«បើ​មាន​បេសកកម្ម (ចុះ​ទៅមើល​ដីជម្លោះ) ទោះបី​ខ្ញុំ​មិនបាន​ចុះទៅ ក៏មាន​មន្ត្រី​ខ្ញុំ​ចុះទៅ​ដែរ ប៉ុន្តែ​នេះ​ខ្ញុំ​អត់​បាន​ដឹងផង ហើយ​មកដល់​ថ្ងៃនេះ [ថ្ងៃទី ៥ ខែសីហា] មិនទាន់​ឃើញ​ក្រុមហ៊ុន ធ្វើការ​ទាក់ទង​មក​ខាង​ជំនាញ​ខ្ញុំ​ ដើម្បី​បំពេញបែបបទ​ទៅតាម​ផ្លូវច្បាប់​នោះដែរ»។

ភ្នំពេញ​ ប៉ុស្តិ៍ មិនអាច​ស្វែងរក​ប្រភព ដើម្បី​ទាក់ទង​សុំ​ការបំភ្លឺ​ពី​ក្រុមហ៊ុន​កំពត​ផត​បានទេ នៅ​ថ្ងៃ​ទី ​៥​ ខែ​សីហា​៕

វីដេអូ៖

អត្ថបទគួរចាប់អារម្មណ៍