ភ្នំពេញៈ ត្រឹមថ្ងៃទី ៤ ខែសីហា កម្ពុជាបានចាក់វ៉ាក់សាំងបង្ការវីរុសកូវីដ ១៩ ដល់ប្រជាពលរដ្ឋបានចំនួនជាង ៧,៧ លាននាក់ ក្នុងនោះបានចាក់ដល់កុមារ និងយុវវ័យអាយុចាប់ពី ១២ ដល់ក្រោម ១៨ ឆ្នាំ បានជាង ១៦ ម៉ឺននាក់ ខណៈរដ្ឋបាលរាជធានីភ្នំពេញក៏កំពុងពង្រីកទីតាំងសម្រាប់ចាក់វ៉ាក់សាំងសម្រាប់កុមារ និងយុវវ័យបន្ថែម។
តាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានឱ្យដឹងថា កំណើនអត្រាចាក់វ៉ាក់សាំងកូវីដ ១៩ នៅកម្ពុជា គិតចាប់ពីថ្ងៃទី ១០ ខែកុម្ភៈ ដល់ថ្ងៃទី ៤ ខែសីហា ឆ្នាំនេះអ្នកចាក់វ៉ាក់សាំងអាយុចាប់ពី ១៨ ឆ្នាំឡើងទៅ ចាក់បានចំនួនជាង ៧,៥ លាននាក់ស្មើនឹង ៧៥,៤២ ភាគរយ បើធៀបនឹងចំនួនប្រជាជនគោលដៅ ១០ លាននាក់ និងកុមារយុវវ័យ អាយុពី ១២ ឆ្នាំ ទៅក្រោម ១៨ ឆ្នាំចាក់បានចំនួនជាង ១៦ ម៉ឺននាក់ ស្មើនឹង ៨,២៩% ធៀបនឹងប្រជាជនគោលដៅប្រមាណ ២ លាននាក់។ បើសរុបចំនួនអ្នកដែលបានចាក់វ៉ាក់សាំងរួចគឺមានជាង ៧,៧ លាននាក់។
លោកនាយករដ្ឋមន្ត្រី ហ៊ុន សែន នៅថ្ងៃទី ៥ ខែសីហា ពេលធ្វើជាអធិបតីក្នុងពិធីប្រគល់ទទួលវ៉ាក់សាំងបង្ការជំងឺកូវី ១៩ ដែលជាជំនួយរបស់ប្រជាពលរដ្ឋ និងរដ្ឋាភិបាលចក្រភពអង់គ្លេសជាង ៤ សែនដូសបានថ្លែងថា ដោយយល់យ៉ាងច្បាស់អំពីអត្ថប្រយោជន៍នៃការចាក់វ៉ាក់សាំង រាជរដ្ឋាភិបាលបានខិតខំ និងព្យាយាមស្វែងរកវ៉ាក់សាំងតាមយន្តការដែលមានជាទ្វេភាគីក្តី ជាពហុភាគីក្តី ដើម្បីចាក់ជូនដល់ប្រជាពលរដ្ឋ។
លោកនាយករដ្ឋមន្ដ្រីថ្លែងថា៖ «ចាប់តាំងពីថ្ងៃទី ១០ ខែកុម្ភៈឆ្នាំ ២០២១ កម្ពុជាបានចាប់ផ្ដើមចាក់វ៉ាក់សាំងជូនដល់ប្រជាពលរដ្ឋដែលមានអាយុចាប់ពី ១៨ ឆ្នាំឡើងទៅ ហើយចាប់ពីថ្ងៃទី ១ ខែសីហា ២០២១ កម្ពុជា ក៏បានសម្រេចបោះ ១ ជំហានទៀត គឺការចាប់ផ្ដើមបើកយុទ្ធនាការចាក់វ៉ាក់សាំងដល់កុមារ និងយុវវ័យ អាយុចាប់ពី ១២ ដល់ក្រោម ១៨ ឆ្នាំដែលមានប្រមាណ ២ លាននាក់បន្ថែមទៀត»។
រដ្ឋបាលរាជធានីភ្នំពេញនៅថ្ងៃទី ៤ ខែសីហា ក៏បានសម្រេចបន្ថែមទីតាំងចាក់វ៉ាក់សាំងមួយទៀតក្នុងខណ្ឌ ៧មករា រាជធានីភ្នំពេញ ដើម្បីចាក់វ៉ាក់សាំងដល់កុមារ និងក្មេងជំទង់ អាយុពី ១២ ឆ្នាំដល់ ១៧ ឆ្នាំ។ ទីតាំងថ្មីដែលបន្ថែមនេះ ស្ថិតនៅមន្ទីរសម្រាកព្យាបាល អូឡាំព្យ៉ា មេឌីខល នៅខណ្ឌ ៧ មករា។
រដ្ឋបាលរាជធានីភ្នំពេញឱ្យដឹងថា កន្លងមកធ្លាប់បានជូនដំណឹងអំពីយុទ្ធនាការចាក់វ៉ាក់សាំងសម្រាប់កុមារ និងយុវវ័យដែលមានអាយុចាប់ពី ១២ ឆ្នាំដល់ក្រោម ១៨ ឆ្នាំ នៅតាមមណ្ឌលសុខភាព និងមន្ទីរពេទ្យបង្អែក សរុបចំនួន ៣៩ ទីតាំង ក្នុងភូមិសាស្ត្រខណ្ឌទាំង ១៤ ចាប់ពីថ្ងៃទី ១ រហូតដល់ថ្ងៃទី ១៤ សីហា ឆ្នាំ ២០២១ សម្រាប់ដូសទី ១។
បើតាមរដ្ឋបាលរាជធានីភ្នំពេញមានមាតាបិតា និងអាណាព្យាបាលជាច្រើនបាននាំបុត្រធីតា និងសាច់ញាតិរបស់ខ្លួនមកទទួលវ៉ាក់សាំងបង្ការជំងឺកូវីដ ១៩ មានចំនួនយ៉ាងច្រើនកុះករដែលជាការរួមចំណែកក្នុងការទប់ស្កាត់ការរីករាលដាលនៃជំងឺកូវីដ។
រដ្ឋបាលរាជធានីភ្នំពេញបានអំពាវនាវ និងលើកទឹកចិត្តដល់មន្ទីរសម្រាកព្យាបាលឯកជនទាំងអស់ ដែលមានបំណងចង់ចូលរួមផ្ដល់សេវាចាក់វ៉ាក់សាំង ដើម្បីការពារខឿនសុខុមាលភាពសាធារណៈ ដោយឥតគិតថ្លៃជូនដល់កុមារ និងយុវវ័យដែលមានអាយុចាប់ពី ១២ ឆ្នាំដល់ក្រោម ១៨ ឆ្នាំអាចធ្វើការស្នើសុំដោយភ្ជាប់មកជាមួយនូវឯកសារគតិយុត្ត និងលិខិតបញ្ជាក់ផ្សេងៗ។
ជាមួយគ្នានេះ រដ្ឋបាលខេត្ដព្រះសីហនុបានឱ្យដឹងពីម្សិលមិញថា កុមារ និងយុវវ័យ ក្នុងខេត្ដព្រះសីហនុ ដែលបានចាក់វ៉ាក់សាំងបង្ការវីរុសកូវីដ ១៩ គិតត្រឹមថ្ងៃទី ៤ ខែសីហា មានចំនួនសរុប ១៩ ៦៦៤ នាក់ ស្មើនឹង ៧៩,៥ ភាគរយបើធៀបនឹងចំនួនកុមារ និងយុវវ័យគោលដៅសរុបដែលត្រូវចាក់ប្រមាណ ២៤ ៧២៦ នាក់។
ក្រសួងសុខាភិបាលនៅថ្ងៃទី ៣ ខែសីហា ឆ្នាំ ២០២១ នេះ ប្រកាសពីការរកឃើញអ្នកស្លាប់ដោយសារជំងឺកូវីដ ១៩ ចំនួន ១៩ នាក់បន្ថែមទៀត ខណៈអ្នកឆ្លងថ្មីក្រសួងបន្តរកឃើញចំនួន ៥៩១ នាក់ និងអ្នកជំងឺដែលបានព្យាបាលជាសះស្បើយថ្មីមានចំនួន ៦១៨ នាក់។ ក្នុងចំណោមករណីឆ្លងថ្មី ៥៩១ នាក់នេះ គឺមានករណីនាំចូលពីក្រៅប្រទេសចំនួន ១៨៣ នាក់ និងឆ្លងក្នុងសហគមន៍ចំនួន ៤០៨ នាក់។ ចំណែកករណីស្លាប់ថ្មីមានចំនួន ១៩ នាក់។
បើតាមក្រសួងសុខាភិបាលគិតត្រឹមព្រឹកថ្ងៃទី ៤ ខែសីហា ឆ្នាំ ២០២១ កម្ពុជាបានរកឃើញអ្នកឆ្លងជំងឺកូវីដ ១៩ សរុបចំនួន ៨០ ២២៥ នាក់ក្នុងនោះអ្នកជាសះស្បើយសរុបមាន ៧៣ ៤២១ នាក់ និងអ្នកស្លាប់សរុបកើនឡើងដល់ចំនួន ១ ៥០៧ នាក់៕