កំពង់ឆ្នាំងៈ រដ្ឋបាលខេត្តកំពង់ឆ្នាំងគ្រោងកាត់ឃុំចំនួន ៤ ក្នុងស្រុករលាប្អៀរ ដើម្បីដាក់បញ្ចូលក្នុងក្រុងកំពង់ឆ្នាំង ដោយគម្រោងនេះនឹងដាក់ស្នើទៅរដ្ឋាភិបាលក្នុងពេលឆាប់ៗ ដើម្បីពង្រីកទីក្រុង និងរៀបចំផែនការមេទីក្រុងជាថ្មី ឈានទៅរកការអភិវឌ្ឍបន្ថែមទៀត ផ្នែកហេដ្ឋារចនាសម្ព័ន្ធ និងការរីកចម្រើនរបស់ប្រជាជន។
លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានប្រាប់ភ្នំពេញប៉ុស្តិ៍នៅថ្ងៃទី ៤ ខែសីហាថា តាមផែនការរបស់រដ្ឋបាលខេត្ត គឺគ្រោងនឹងកាត់ឃុំមួយចំនួនក្នុងស្រុករលាប្អៀរ ដើម្បីដាក់បញ្ចូលក្នុងក្រុងកំពង់ឆ្នាំង ដោយរួមទាំងរៀបចំប្លង់មេថ្មី ទូទាំងក្រុងផងដែរ។ ការពង្រីកក្រុងកំពង់ឆ្នាំងនេះ គឺដើម្បីឆ្លើយតបនឹងការរីកចម្រើនរបស់ប្រជាពលរដ្ឋ និងការរៀបចំទីក្រុងឱ្យស្របតាមស្តង់ដា។
លោកបញ្ជាក់ថា គម្រោងនេះរដ្ឋបាលខេត្តបានសិក្សាមួយរយៈហើយជាមួយធនាគារអភិវឌ្ឍន៍អាស៊ី ADB ព្រោះក្រុងកំពង់ឆ្នាំង ត្រូវតែពង្រីក ដោយសារតែការរីកចម្រើនរបស់ប្រជាពលរដ្ឋ។ លោកបន្តថា៖ «ដូច្នេះ យើងបានសិក្សារួចហើយថា ក្រុងត្រូវពង្រីកយកប៉ុន្មានឃុំបន្ថែមទៀត បង្កើតជាសង្កាត់ថ្មី ១ ដែលមានឈ្មោះថា ភ្នំក្រាំងដីមាស។ យើងកំពុងធ្វើការបន្តបន្ទាប់ទៀត»។
បើតាមលោក ស៊ុន សុវណ្ណារិទ្ធិ តាមគម្រោងការកាត់ឃុំចំនួន ៤ របស់ស្រុករលាប្អៀរ គឺមានឃុំជ្រៃបាក់ ឃុំស្រែថ្មី ឃុំស្វាយជ្រុំ ឃុំពង្រ ដែលនឹងត្រូវបញ្ចូលជាឃុំ ១ ថ្មី ក្រោមការគ្រប់គ្រងរបស់រដ្ឋបាលក្រុងកំពង់ឆ្នាំង។
លោកបញ្ជាក់ថា៖ «មកដល់ពេលនេះ ប្លង់មេថ្មីសម្រាប់ក្រុងកំពង់ឆ្នាំង គឺត្រូវបានរៀបចំបានប្រមាណ ៩០ ភាគរយហើយ ហើយក្នុងករណីដែលបញ្ចប់ការរៀបចំប្លង់មេថ្មីនេះ រដ្ឋបាលខេត្តនឹងដាក់សំណើសុំគោលការណ៍សម្រេចពីរដ្ឋាភិបាល ដើម្បីអនុម័តប្លង់មេ និងការកាត់បញ្ចូលបន្ថែមនូវឃុំចំនួន ៤ នេះ»។
គម្រោងពង្រីក និងរៀបចំប្លង់មេទីក្រុងកំពង់ឆ្នាំង គឺមានការចូលរួមពី ADB និងអង្គការ GIZ ដោយបានគាំទ្រផ្នែកបច្ចេកទេស និងថវិកា។
បើតាមលោក ស៊ុន សុវណ្ណារិទ្ធិ គម្រោងនេះបានសិក្សាជាច្រើនឆ្នាំរួចមកហើយ អមជាមួយនឹងគម្រោងអភិវឌ្ឍន៍ហេដ្ឋារចនាសម្ព័ន្ធក្នុងក្រុងដទៃទៀត។
លោក យិន សាវេន អភិបាលក្រុងកំពង់ឆ្នាំង បាននិយាយថា នេះគឺជាភាពរីកចម្រើនមួយសម្រាប់ក្រុងកំពង់ឆ្នាំងទាំងមូល ដែលទាមទារឱ្យមានការពង្រីកវិសាលភាព និងផ្ទៃដី ដើម្បីឱ្យស្របទៅនឹងភាពរីកចម្រើនរបស់ក្រុងក្នុងពេលបច្ចុប្បន្ន។
ក្រុងកំពង់ឆ្នាំង គឺមានសង្កាត់ចំនួន ៤ រួចមកហើយ ហើយបើមានការបង្កើតសង្កាត់ថ្មី ដើម្បីពង្រីកផ្ទៃដី និងប្រជាជនបន្ថែមទៀត គឺកាន់តែប្រសើរ ដោយលោក សាវេន បានបង្ហាញពីការប្តេជ្ញាចិត្តក្នុងការគ្រប់គ្រងឱ្យបានកាន់តែល្អបន្ថែមទៀត ដើម្បីបម្រើប្រជាពលរដ្ឋ។
លោកបញ្ជាក់ថា៖ «ជាគំនិតរបស់ខ្ញុំ បើរដ្ឋបាលខេត្តលោករៀបចំ ខ្ញុំសូមអរគុណណាស់ ដើម្បីយើងបានពង្រីកក្រុងឱ្យមានវិសាលភាពធំ ទៅតាមស្តង់ដារបស់រាជរដ្ឋាភិបាល។ ការពង្រីកនេះ ធំប៉ុនណាក៏ខ្ញុំនឹងព្យាយាមធ្វើការគ្រប់គ្រងឱ្យបានល្អទៅតាមការសម្រេចរបស់ថ្នាក់ដឹកនាំ»។
ខេត្ដកំពង់ឆ្នាំងត្រូវបានបែងចែកជាក្រុង ១ ស្រុកចំនួន ៧ សង្កាត់ចំនួន ៤ ឃុំចំនួន ៦៦ និងភូមិចំនួន ៥៦៩ ភូមិ។ ខេត្ដដែលនៅជាប់បឹងទន្លេសាបមួយនេះ មានផ្ទៃដីសរុប ៥៥២ ១០០ ហិកតា មានប្រជាជនចំនួន ១៣០ ៩៧៨ គ្រួសារ ស្មើនឹង ៥៥០ ៨៩០ នាក់ ហើយអត្រាកំណើនប្រជាជនប្រចាំឆ្នាំមានចំនួន ១,២៨ % ខណៈទំហំគ្រួសារជាមធ្យម ៤,២១ នាក់/គ្រួសារ។ នេះបើតាមរបាយការណ៍របស់រដ្ឋបាលខេត្ត៕