ភ្នំពេញៈ សមត្ថកិច្ចបានបញ្ជូនមនុស្ស ១៨ នាក់ ទៅតុលាការពាក់ព័ន្ធនឹងការល្មើសវិធានការសុខាភិបាល និងវិធានការរដ្ឋបាល ខណៈការអប់រំផ្សព្វផ្សាយច្បាប់ធ្វើបានចំនួន ១ ៦៩១ ទីតាំង និងអនុវត្តវិធានការច្បាប់បាន ៨២២ ករណី ហើយបានអប់រំ និងពិន័យបានចំនួនជាង ១ ០០០ នាក់ កាលពីថ្ងៃទី ៤ ខែ សីហា ឆ្នាំ ២០២១។
តាមសេចក្តីជូនដំណឹងរបស់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ (គ.អ.ក) ចុះថ្ងៃទី ៤ ខែសីហាបានឱ្យដឹងថា សមត្ថកិច្ចបានបញ្ជូនមនុស្ស ១៨ នាក់ទៅតុលាការដើម្បីចាត់ការតាមច្បាប់ បន្ទាប់ពីបានរកឃើញថា ពួកគេពាក់ព័ន្ធនឹងបទល្មើសវិធានការសុខាភិបាល និងវិធានការរដ្ឋបាល។
សេចក្តីជូនដំណឹងបញ្ជាក់ថា នៅថ្ងៃដដែលនោះសមត្ថកិច្ចបានអនុវត្តវិធានការអប់រំផ្សព្វផ្សាយច្បាប់បានចំនួន ១ ៦៩១ ទីតាំង និងអនុវត្តវិធានការច្បាប់មានចំនួន ៨២២ ករណី ដោយបានឃាត់ខ្លួនមនុស្សមកអប់រំ និងពិន័យចំនួន ១ ៣៥៤ នាក់ និងឃាត់យានយន្តចំនួន ៧៣៤ គ្រឿង ពិន័យជាប្រាក់ ចំនួន ៣០ ៧០០ ០០០ លានរៀលផងដែរ។
លោក សាន សុខសីហា អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានឱ្យដឹងកាលពីម្សិលមិញថា លទ្ធផលជាក់ស្តែងនៃកិច្ចខិតខំប្រឹងប្រែងរបស់នគរបាលរាជធានី-ភ្នំពេញក្នុងការអនុវត្តវិធានការរដ្ឋបាលក្នុងរយៈពេលចុងក្រោយនេះមានការថយចុះជាបន្តបន្ទាប់។
លោកបានថ្លែងថា៖ «យប់មិញនេះ[យប់ថ្ងៃទី ៤ ខែសីហា] យើងឃាត់បានយានយន្ត ១២១ គ្រឿង ក្នុងនោះមានរថយន្ត ៣៩ គ្រឿង ហើយយើងបានផាកពិន័យនៅនឹងកន្លែងចំនួន ៤១ គ្រឿងក្នុងនោះមានរថយន្ត ១៥ គ្រឿងសល់ប៉ុន្មានទៀតយើងយកទៅរក្សាទុកនៅតាមខណ្ឌដើម្បីផាកពិន័យបន្ត»។
លោក សាន សុខសីហា បានបញ្ជាក់ថា នៅយប់ថ្ងៃទី ៤ ខែសីហា សមត្ថកិច្ចក៏បានឃាត់ខ្លួនមនុស្ស ១៦ នាក់ទាក់ទងការល្មើសបម្រាមគោចរផ្សេងៗផងដែរ ដើម្បីយកមកខណ្ឌសាកសួរបន្ត។ លោកថា ប្រសិនបើករណីត្រឹមតែល្មើសធម្មតា សមត្ថកិច្ចអាចផាកពិន័យតាមច្បាប់ ប៉ុន្តែបើសួរនាំដឹងថា ល្មើសធ្ងន់ធ្ងរ បង្កបាតុភាព ឬបញ្ហាអ្វីផ្សេងៗ នឹងរៀបចំសំណុំរឿងបញ្ជូនទៅតុលាការ។
ដោយឡែកនៅក្រុងតាខ្មៅ លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅបានថ្លែងថា ការចុះប្រតិបត្តិការនៅយប់ថ្ងៃទី ៤ ខែសីហា សមត្ថកិច្ចឃាត់ខ្លួនមនុស្សបាន ១៤ នាក់បញ្ជូនទៅខណ្ឌដើម្បីសួរនាំ និងរៀបចំសំណុំរឿងជាក់ស្តែងទៅតុលាការ។
លោកបានថ្លែងថា៖ «លោកឧត្តមសេនីយ៍ទោស្នងការបានដាក់បទបញ្ជាយ៉ាងម៉ឺងម៉ាត់មិនឱ្យជួបជុំហូបចុកផឹកស៊ីល្មើសវិធានការសុខាភិបាលទេ ហើយជាពិសេសបម្រាមគោចរចាប់ពីម៉ោង ៩ យប់ទៅ គឺមិនអនុញ្ញាតឱ្យមានការធ្វើដំណើរនៅលើដងផ្លូវ ដើម្បីការពារជំងឺឆ្លងកូវីដ ប៉ុន្តែនៅក្នុងក្រុងតាខ្មៅពលរដ្ឋលោកសហការបានល្អ ព្រោះខ្ញុំដើរមើលត្រឹមម៉ោង ៩ អីហ្នឹងគឺស្ងាត់ឈឹងអស់ហើយ»៕