.jpg)
វ៉ាក់សាំងកូវីដ ១៩ (Astra Zeneca) ចំនួន ៣៣២ ពាន់ដូស ជំហានទី១ របស់រដ្ឋាភិបាលជប៉ុនបានដឹកមកដល់កម្ពុជារួចហើយកាលពីរាត្រីថ្ងៃទី ២៣ កក្កដា។ ហេង ជីវ័ន
ភ្នំពេញៈ បើមិនមានអ្វីប្រែប្រួលនោះទេ វ៉ាក់សាំងបង្ការជំងឺកូវីដ ១៩ ប្រភេទ AstraZeneca ដែលជាជំនួយទ្វេភាគីរបស់រដ្ឋាភិបាលជប៉ុនជំហានទី ២ ជូនដល់ប្រទេសកម្ពុជាចំនួន ៦៦៨ ០០០ ដូសបន្ថែមទៀត នឹងដឹកមកដល់ព្រលានយន្តហោះអន្តរជាតិរបស់កម្ពុជានៅយប់ថ្ងៃទី ៦ ខែសីហានេះ។ នេះបើយោងតាមលោកស្រី យក់ សម្បត្តិ រដ្ឋលេខាធិការក្រសួងសុខាភិបាល ប្រាប់សារព័ត៌មាន។
ជំនួយវ៉ាក់សាំងកូវីដ ១៩ (Astra Zeneca) ចំនួន ៣៣២ ពាន់ដូស ជំហានទី១ របស់រដ្ឋាភិបាលជប៉ុនបានដឹកមកដល់កម្ពុជារួចហើយកាលពីរាត្រីថ្ងៃទី ២៣ កក្កដា ឆ្នាំ ២០២១ ដោយមានការប្រគល់ទទួលពីលោកនាយករដ្ឋមន្ត្រី ហ៊ុន សែន និលោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា។
បើតាមលោក មិកាមិ ម៉ាសាហ៊ីរ៉ូ ជំនួយវ៉ាក់សាំងកូវីដ ១៩ (Astra Zeneca) ជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលជប៉ុនក្នុងការប្រយុទ្ធប្រឆាំងនឹងការឆ្លងជំងឺកូវីដ ១៩ នៅលើសកលលោក ហើយរដ្ឋាភិបាលជប៉ុនមានការរីករាយក្នុងការផ្តល់វ៉ាក់សាំង AstraZeneca ប្រមាណមួយលានដូស ដែលបានផលិតនៅក្នុងប្រទេសជប៉ុនឱ្យប្រទេសកម្ពុជា។
នៅក្នុងលិខិតរបស់លោក ស៊ូហ្គា យ៉ូស៊ីហ៊ីដេ នាយករដ្ឋមន្ត្រីជប៉ុនផ្ញើជូនលោកនាយករដ្ឋមន្ត្រី ហ៊ុន សែន បានសរសេរថា៖ «ខ្ញុំសង្ឃឹមថាជំនួយលើកនេះនឹងរួមចំណែកជួយដល់វិធានការទប់ស្កាត់ការឆ្លងមេរោគកូវីដ ១៩ នៅក្នុងប្រទេសកម្ពុជា ព្រមទាំងជួយលើកទឹកចិត្តប្រជាជនកម្ពុជាដែលជាមិត្តដ៏សំខាន់របស់ប្រជាជនជប៉ុន»៕
