ក្រចេះ: អភិបាលក្រុងក្រចេះបានសម្រេចបង្កើតក្រុមការងារចុះអនុវត្តការផ្អាកអាជីវកម្មផលិតស្រាស គ្មានច្បាប់អនុញ្ញាត និងទប់ស្កាត់ការលក់ស្រាស ក្លែងក្លាយគ្មានគុណភាព ដែលធ្វើឱ្យប៉ះពាល់ដល់សុខភាព ឬ គ្រោះថ្នាក់ដល់អាយុជីវិត។
យោងតាមសេចក្តីសម្រេចដែលចុះហត្ថលេខដោយលោក សេក ប៊ុនហេង អភិបាលក្រុងក្រចេះ ដែល ភ្នំពេញ ប៉ុស្តិ៍ ទទួលបាននៅថ្ងៃទី ៦ ខែសីហានេះ មានសមាសភាពចំនួន ៨ រូប រួមទាំងចៅសង្កាត់ទាំង ៥ របស់ក្រុងក្នុងនោះអភិបាលក្រុងក្រចេះលោក សេក ប៊ុន ហេង ជាប្រធាន។
បើតាមសេចក្តីសម្រេចនេះ ក្រុមការងារនេះមានតួនាទី និងភារកិច្ចសហការជាមួយមន្ទីរជំនាញ ចុះត្រួតពិនិត្យសិប្បកម្មបិតស្រាសដែលពុំមានច្បាប់អនុញ្ញាតឱ្យមានច្បាប់អនុញ្ញាតឱ្យបានត្រឹមត្រូវ ស្របតាមច្បាប់ស្តីពីការគ្រប់គ្រងរោងចក្រ សិប្បកម្ម។
ទប់ស្កាត់រាល់ការលក់ស្រាសក្លែងក្លាយ និងផលិតស្រាសគ្មានគុណភាព។
ណែនាំដល់ម្ចាស់សិប្បកម្មផលិតស្រាស មិនត្រូវប្រើប្រាស់នូវសារធាតុគីមីហាមឃាត់ ដែលអាចប៉ះពាល់ដល់សុខភាព និងអាយុជីវិតអ្នកប្រើប្រាស់។
ណែនាំឱ្យម្ចាស់សិប្បកម្មផលិតឱ្យផលិតស្រាស (ស្រាអង្ករ) ត្រូវមានអនាម័យ និងមានគុណភាព ស្របតាមបទដ្ឋានបច្ចេកទេស និងស្តង់ដា និងណែនាំឱ្យម្ចាស់សិប្បកម្ម មានផលិតផលស្រាសដែលខ្លួនបានផលិតមកវិភាគឱ្យបានទៀងទាត់ជារៀងរាល់ខែ៕