ភ្នំពេញៈ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានប្រាប់ដល់ប្រធានមន្ទីរពេទ្យថ្នាក់ជាតិ មជ្ឈមណ្ឌលជាតិ មន្ទីរពេទ្យរាជធានី-ខេត្ត-ស្រុក-ខណ្ឌ មណ្ឌលសុខភាព និងសេវាសុខាភិបាលឯកជន រួមជាមួយនឹងមន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ភពរៀបចំចាត់ចែង និងអនុវត្តការទទួលយកអ្នកជំងឺព្យាបាលនៅតាមសេវាសាធារណៈ។
យោងតាមលិខិតមួយច្បាប់របស់លោក ម៉ម ប៊ុនហេង ដែល ភ្នំពេញ ប៉ុស្តិ៍ ទទួលបាននៅថ្ងៃទី ៦ ខែសីហា នេះបានឱ្យដឹងថា រយៈកាលកន្លងមកនេះ មានបាតុភាពបានកើតឡើងជារឿយៗ ដែលអ្នកជំងឺមានសភាពធ្ងន់ធ្ងរ បានទៅរកកន្លែងព្យាបាលនៅតាមសេវាសាធារណៈមន្ទីរពេទ្យរដ្ឋ និងសេវាសុខាភិបាលឯកជន (គ្លីនិកឯកជន) បែរជាមិនទទួលយកពួកគាត់មកធ្វើការព្យាបាល ដែលធ្វើឱ្យជះឥទ្ធិពលមិនល្អមកលើក្រសួងសុខាភិបាល និងសេចក្ដីថ្លៃថ្នូររបស់គ្រូពេទ្យ។
ចំពោះបញ្ហានេះ ក្រសួងសុខាភិបាលសូមធ្វើការណែនាំ ចំនួន ៥ ចំណុច មានដូចខាងក្រោមនេះ៖
១ ចំពោះមន្ទីរពេទ្យជាតិ និងមជ្ឈមណ្ឌលជាតិ ត្រូវតែប្រកាន់យកគោលការណ៍ទទួលសង្គ្រោះ ព្យាបាលអ្នកជំងឺជាដាច់ខាត ដោយអាចប្រើប្រាស់តេស្ដរហ័សរកអង់ទីហ្សែនកូវីដ១៩ ក្នុងការញែកអ្នកជំងឺកូវីដ ១៩ឡើយ។
ក្នុងករណីដែលធ្វើតេស្តទៅឃើញអវិជ្ជមានកូវីដ ១៩ ត្រូវបញ្ជូនអ្នកជំងឺទៅព្យាបាលតាមផ្នែក និងតាមបច្ចេកទេសព្យាបាលធម្មតា និងក្នុងករណីធ្វើតេស្តទៅឃើញវិជ្ជមានកូវីដ ១៩ ត្រូវបញ្ជូនអ្នកជំងឺទៅបន្ទប់ដាច់ដោយឡែកសម្រាប់ព្យាបាលអ្នកជំងឺកូវីដ ១៩។
មន្ទីរពេទ្យជាតិ មជ្ឈមណ្ឌលជាតិ ត្រូវមានលេខទូរស័ព្ទសម្រាប់ឱ្យអ្នកជំងឺមកពីខាងក្រៅធ្វើការទំនាក់ទំនង(មានក្នុងឧបសម្ព័ន្ធ)។
២ ចំពោះមន្ទីរពេទ្យបង្អែករាជធានី ខេត្ត ស្រុក ខណ្ឌ និងមណ្ឌលសុខភាព ក៏ត្រូវតែប្រកាន់យកគោលការណ៍ទទួលសង្គ្រោះ ព្យាបាលអ្នកជំងឺជាដាច់ខាត ដោយអាចប្រើប្រាស់តេស្តរហ័សរកអង់ទីហ្សែនកូវីដ ១៩ ក្នុងការញែកអ្នកជំងឺកូវីដ១៩។
ក្នុងករណីធ្វើតេស្តទៅឃើញអវិជ្ជមានកូវីដ ១៩ ត្រូវបញ្ជូនអ្នកជំងឺទៅព្យាបាលតាមផ្នែក និងតាមបច្ចេកទេសព្យាបាលធម្មតា និងក្នុងករណីធ្វើតេស្តទៅឃើញវិជ្ជមានកូវីដ ១៩ ត្រូវបញ្ជូនអ្នកជំងឺទៅបន្ទប់ដាច់ដោយឡែកសម្រាប់ព្យាបាលអ្នកជំងឺកូវីដ ១៩។
ប្រសិនបើមន្ទីរពេទ្យបង្អែកណាគ្មានកន្លែងព្យាបាលជំងឺកូវីដ ១៩ ទេ ត្រូវបញ្ជូនអ្នកជំងឺទៅមន្ទីរពេទ្យបង្អែករាជធានី ខេត្ត។
រាល់ការបញ្ជូនត្រូវធ្វើការទំនាក់ទំនងទៅលេខទូរស័ព្ទរបស់មន្ទីរពេទ្យបង្អែករាជ ធានី ខេត្ត ដែលមានជូនភ្ជាប់ក្នុងឧបសម្ព័ន្ធ ដោយប្រាប់ពីមូលហេតុនៃការបញ្ជូន និងស្ថានភាពរបស់អ្នកជំងឺដែលត្រូវបញ្ជូនឱ្យបានដឹងជាមុន។
ក្រសួងសុខាភិបាលបន្តទៀតថា ចំណែកចំណុចទី ៣ ចំពោះមូលដ្ឋានសេវាសុខាភិបាលឯកជន (មន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ភព) ត្រូវតែប្រកាន់យកគោលការណ៍ ទទួលសង្គ្រោះ ព្យាបាលអ្នកជំងឺជាដាច់ខាត ដោយអាចប្រើប្រាស់តេស្តរហ័សរកអង់ទីហ្សែនកូវីដ ១៩ ក្នុងការញែកអ្នកជំងឺកូវីដ ១៩ បើសង្ស័យថា អ្នកជំងឺមានជំងឺកូវីដ ១៩។
ក្នុងករណីធ្វើតេស្តទៅ ឃើញអវិជ្ជមានកូវីដ ១៩ ត្រូវទទួលយកអ្នកជំងឺព្យាបាលធម្មតា ទៅតាមបច្ចេកទេសព្យាបាល និងក្នុងករណីធ្វើតេស្ត ទៅឃើញវិជ្ជមានកូវីដ ១៩ ត្រូវដាក់អ្នកជំងឺក្នុងបន្ទប់ព្យាបាលដាច់ដោយឡែកសម្រាប់ព្យាបាលអ្នកជំងឺកូវីដ ១៩ (ប្រសិនបើមានការអនុញ្ញាតឱ្យព្យាបាលអ្នកជំងឺកូវីដ ១៩ ពីក្រសួងសុខាភិបាល) និងបញ្ជូនទៅមណ្ឌលព្យាបាល អ្នកជំងឺកូវីដ ១៩ ឬមន្ទីរពេទ្យរដ្ឋដែលមានព្យាបាលអ្នកជំងឺកូវីជ ១៩ (ប្រសិនបើពុំមានការអនុញ្ញាតឱ្យព្យាបាលជំងឺកូវីដ ១៩ ពីក្រសួងសុខាភិបាល)។
នៅក្នុងលិខិតលោក ម៉ម ប៊ុនហេង បានព្រមានថា ក្នុងករណីដែលម្ចាស់មូលដ្ឋានសេវាសុខាភិបាលឯកជនណា ដែលមិនអនុវត្ត តាមការណែនាំនេះ ក្រសួងសុខាភិបាលនឹងមានវិធានការបិទមូលដ្ឋានសេវាសុខាភិបាលឯកជននោះ មិនអនុញ្ញាតឱ្យទទួលព្យាបាលអ្នកជំងឺតទៅទៀតឡើយ។
ចំណែកចំណុចទី៤ រាល់ករណីអ្នកជំងឺវិជ្ជមានកូវីដ ១៩ ដែលត្រូវបញ្ជូនទៅមណ្ឌលព្យាបាលកូវីដ ១៩ ត្រូវធ្វើការទំនាក់ទំនងទៅលេខទូរស័ព្ទរបស់មណ្ឌលព្យាបាលកូវីដ ១៩ ដែលមានជូនភ្ជាប់ក្នុងឧបសម្ព័ន្ធ ដោយប្រាប់ពីមូលហេតុនៃការបញ្ជូន និងស្ថានភាពរបស់អ្នកជំងឺដែលត្រូវបញ្ជូនឱ្យបានដឹងជាមុន។
ឯចំណុចទី៥ ដែលជាចំណុចចុងក្រោយ អនុគណៈកម្មការបច្ចេកទេស និងព្យាបាលកូវីដ ១៩ និងនាយកដ្ឋានមន្ទីរពេទ្យ ត្រូវត្រួតពិនិត្យ តាមដានការងារនេះជាប្រចាំ និងធ្វើរបាយការណ៍ជូនថ្នាក់ដឹកនាំ ក្នុងករណីមានបាតុភាពមិនប្រក្រតីកើតឡើង៕
វីដេអូ៖