.jpg)
អ្នកចូលរួមសិក្ខាសាលាតាមប្រព័ន្ធអនឡាញស្តីពីសេចក្តីព្រាងនៃគោលការណ៍អគារបៃតង។ រូប ក្រសួងបរិស្ថាន
ភ្នំពេញៈ ក្រសួងបរិស្ថានកំពុងពិភាក្សាពីសេចក្តីព្រាងដំបូងនៃគោលការណ៍ណែនាំ និងវិញ្ញាបនបត្រកម្ម អគារបៃតងនៅប្រទេសកម្ពុជាដោយយកលំនាំបញ្ចូលគ្នា រវាងប្រព័ន្ធអគារបៃតងនៃប្រទេសអាល្លឺម៉ង់ និងសាធារណរដ្ឋកូរ៉េ ដោយអគារបៃតងបានផ្តល់ប្រយោជន៍ជាច្រើនចំពោះបរិស្ថាន សេដ្ឋកិច្ច និងសង្គមរបស់កម្ពុជា។
លោក ទិន ពន្លក រដ្ឋលេខាធិការក្រសួងបរិស្ថាន កាលពីថ្ងៃទី ៣ ខែសីហា បានដឹកនាំកិច្ចប្រជុំតាមអនឡាញដោយមានការចូលរួមពីលោក វ៉ាន់ មុនីនាថ អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាព និងតំណាងមកពីក្រសួង ស្ថាប័នពាក់ព័ន្ធ ដៃគូអភិវឌ្ឍន៍ អង្គការ សង្គមស៊ីវិល វិស័យឯកជន និងគ្រឹះស្ថានសិក្សាមួយចំនួនទៀត ដើម្បីពិភាក្សា ប្រមូលមតិ និងបង្ហាញសេចក្ដីព្រាងដំបូងនៃគោលការណ៍ណែនាំ និងវិញ្ញាបនបត្រកម្មអគារបៃតងនៅកម្ពុជា។
បើតាមក្រសួងបរិស្ថាន សិក្ខាសាលានេះក៏បានលើកយកលក្ខណវិនិច្ឆ័យ និងសូចនាករលម្អិតក្នុងការពិភាក្សានៅថ្ងៃទី ៤-៥ ខែសីហានេះលើគោលបំណងទី ១ បង្ហាញ និងពិភាក្សាពីសេចក្តីព្រាងដំបូងនៃគោលការណ៍ណែនាំ និងវិញ្ញាបនបត្រកម្មអគារបៃតង។
ទី ២ ប្រមូលមតិយោបល់ និងគំនិត ស្តីពីការរៀបចំស្ថាប័នសម្រាប់ប្រតិបត្តិការ និងគ្រប់គ្រងប្រព័ន្ធគោលការណ៍ណែនាំ និងវិញ្ញាបនបត្រកម្មអគារបៃតង Cam GCGB(Cambodia''s Guidelines and Certification for Green Buildings) និងទី ៣ ពិភាក្សាពីកាលានុវត្តភាព និងបញ្ហាប្រឈមនៃការអនុវត្ត Cam GCGB នាពេលអនាគត និងកំណត់អនុសាសន៍សមស្រប។
លោក ទិន ពន្លក ថ្លែងក្នុងកិច្ចប្រជុំនេះថា រាជរដ្ឋាភិបាលកម្ពុជាបានប្តេជ្ញាចិត្តក្នុងការអភិវឌ្ឍសេដ្ឋកិច្ចប្រកបដោយចីរភាពបរិស្ថាន ក្នុងនោះក៏បានផ្តោតសំខាន់លើទស្សនវិស័យ និងគោលការណ៍នៃការអភិវឌ្ឍបៃតងនៅក្នុងចក្ខុវិស័យ និងទិសដៅនៃដំណើរការអភិវឌ្ឍសេដ្ឋកិច្ចរបស់ខ្លួន។
លោកថ្លែងថា៖ «អគារបៃតងបានផ្តល់ប្រយោជន៍ជាច្រើនដល់បរិស្ថាន សេដ្ឋកិច្ច និងសង្គម រួមមានកិច្ចគាំពារបរិស្ថានការអភិរក្សជីវចម្រុះ។ ការប្រតិបត្តិមេត្រីភាពបរិស្ថាន ប្រសិទ្ធភាពធនធានចាប់តាំងពីដំណាក់កាលរចនាអគារ រហូតដល់អគារក្លាយជាសំណង់ ព្រមទាំងការសន្សំសំចៃថ្លៃប្រតិបត្តិការក៏ដូចជាការលើកកម្ពស់ផាសុកភាព គុណភាពជីវិតដល់អ្នកប្រើប្រាស់អគារជាដើម»។
លោក វ៉ាន់ មុនីនាថ លើកឡើងថា អគារភាគច្រើនទាំងអគារដែលកំពុងប្រើប្រាស់ និងអគារកំពុងសាងសង់ថ្មី គឺមានការពិចារណាតិចតួចអំពីគោលគំនិតអគារបៃតង ដែលប្រើប្រាស់នូវធនធានសាងសង់ច្រើន។ ប្រើប្រាស់ថាមពល ទឹក និងបញ្ចេញសំណល់ច្រើន ដែលប៉ះពាល់ដល់បរិស្ថាន ហើយអគារទាំងនោះនឹងនៅតែប្រើប្រាស់ និងដាក់ឱ្យប្រើប្រាស់ជាបន្តបន្ទាប់ទៀត។
លោកបញ្ជាក់ថា គោលគំនិតអគារបៃតង ផ្ដោតលើការប្រើប្រាស់ថាមពលប្រកបដោយប្រសិទ្ធភាព ការកាត់បន្ថយការបំភាយឧស្ម័នផ្ទះកញ្ចក់ និងការបំពុលបរិយាកាស តាមរយៈការប្រើប្រាស់ទឹកតិច។ ប្រសិទ្ធភាពនៃការប្រើប្រាស់ដី ការប្រើប្រាស់សម្ភារសំណង់ដែលមិនប៉ះពាល់ដល់បរិស្ថាន។ ការកាត់បន្ថយសំណល់ ការកាត់បន្ថយផលប៉ះពាល់លើសហគមន៍ក្នុងពេលសាងសង់ និងពេលប្រើប្រាស់អគារ។ នេះគឺជាទស្សនទានថ្មីសម្រាប់បរិបទប្រទេសកម្ពុជា ស្របពេលដែលការរីកចម្រើននៃសំណង់កំពុងតែរីកដុះដាលយ៉ាងខ្លាំង។
លោកថ្លែងថា៖ «ការបញ្ចូលគំនិតអគារបៃតងទៅក្នុងការរចនាអគារសំណង់ និងប្រតិបត្តិការ ពិតជាមានសារៈសំខាន់ណាស់ ព្រោះប្រទេសកម្ពុជា មិនទាន់មានគោលការណ៍ណែនាំការប្រតិបត្តិអគារបៃតង និងការទទួលស្គាល់សម្រាប់ការសាងសង់ ឬកែសម្រួលផ្ទះ និងអគារដែលកំពុងប្រើប្រាស់នៅឡើយ»។
តាមរយៈកិច្ចប្រជុំរយៈពេល ១ ថ្ងៃកាលពីម្សិលមិញអង្គសិក្ខាសាលា បានបង្ហាញលទ្ធផលសំខាន់ៗមួយចំនួន រួមមានទី ១ បានពិនិត្យជារួមលើទិដ្ឋភាពនៃការរៀបចំលក្ខណវិនិច្ឆ័យ និងការវាយតម្លៃសេចក្តីព្រាងគោលការណ៍ណែនាំ និងវិញ្ញាបនបត្រអគារបៃតងរបស់កម្ពុជា ដែលបានយកលំនាំបញ្ចូលគ្នារវាងប្រព័ន្ធអគារបៃតងអាល្លឺម៉ង់ (DGNB)និងប្រព័ន្ធរបស់សាធារណរដ្ឋកូរ៉េ (G-SEED)។
ក្នុងនោះអង្គសិក្ខាសាលាបានទទួលសំណួរ និងមតិយោបល់កែលម្អជុំវិញបច្ចេកទេសនៃការរៀបចំការជ្រើសរើសលក្ខណវិនិច្ឆ័យដែលសមស្របសម្រាប់បរិបទកម្ពុជាទាំងអគារសាងសង់ (ថ្មី) និងអគារកំពុងប្រើប្រាស់ជាដើម។
ទី ២ បានពិនិត្យលើគោលគំនិតក្នុងការរៀបចំស្ថាប័នគ្រប់គ្រង និងដំណើរការគោលការណ៍ណែនាំ និងវិញ្ញាបនបត្រអគារបៃតងនៅកម្ពុជា ដោយបានជ្រើសរើសយកជម្រើសចំនួន ២ ក្នុងនោះ ជម្រើសដែលមាន គឺ រដ្ឋាភិបាលជាអ្នកដឹកនាំ និងគ្រប់គ្រង និងជម្រើសទី ២ គឺវិស័យឯកជន ឬអង្គការជាអ្នកប្រតិបត្តិគោលការណ៍ណែនាំ៕
