.jpg)
គ្រូពេទ្យយកសំណាកអាជីវករលក់ដូរនៅផ្សារបឹងកេងកង កាលពីម្សិលមិញ។ រូបថត អនុគណៈកម្មការស្រាវជ្រាវជំងឺកូវីដ១៩
ភ្នំពេញៈ ក្រសួងសុខាភិបាលកម្ពុជាបានប្រកាសពីការរកឃើញវីរុសកូវីដ ១៩ បំប្លែងថ្មី B.1.617.2 (Delta) ចំនួន ៦៧ ករណីនៅក្នុងរយៈពេល ២ ថ្ងៃ គឺថ្ងៃទី ៤ និងថ្ងៃទី ៥ ខែសីហា ឆ្នាំ ២០២១។
តាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជានៅថ្ងៃទី ៦ ខែ សីហា ឆ្នាំ ២០២១ នេះឱ្យដឹងថា លទ្ធផលនៃការធ្វើវិភាគដោយវិទ្យាស្ថានប៉ាស្ទ័រកម្ពុជាបានរកឃើញករណីឆ្លងវីរុសកូវីដ ១៩ ដែលបំប្លែងថ្មីប្រភេទ B 1,617-2 (Teltu) នៅថ្ងៃទី ៤ ខែសីហា នៅក្នុងប្រទេសកម្ពុជាលើអ្នកដំណើរមកពីបរទេសតាមជើងហោះហើរចំនួន ៣១ នាក់ (ស្រី ១៦ នាក់) និងលើអាជីវករលក់នំបញ្ចុកស្រះនៅក្នុងផ្សារតូចទួលសង្កែរាជធានីភ្នំពេញ ១ នាក់ (ប្រុស)។
ដោយឡែកនៅថ្ងៃទី ៥ ខែសីហា ប្រទេសកម្ពុជា បានរកឃើញលើអ្នកដំណើរមកពីបរទេសតាមជើងហោះហើរចំនួន ០២ នាក់ (ស្រី ០ នាក់) ប្រជាជនអ្នកភូមិនៅក្នុងសហគមន៍ចំនួន ២៤ នាក់ (ស្រី ១០ នាក់) និងពលករមកពីប្រទេសថៃចំនួន ៩ នាក់ (ស្រី ៦ នាក់) ។
បើតាមក្រសួងសុខាភិបាលវីរុសដែលតា (Delta) បាននិងកំពុងបន្តរាតត្បាតវាយលុកចូលក្នុងសហគមន៍កម្ពុជា ជាពិសេសខេត្តឧត្តរមានជ័យ រាជធានីភ្នំពេញ សៀមរាប ព្រះវិហារ កំពង់ចាម និងកំពង់ធំ និងបណ្តាខេត្តមួយចំនួនទៀត ។
គិតចាប់ពីថ្ងៃទី ៣១ ខែមីនា រហូតមកដល់ថ្ងៃទី ៥ ខែសីហា ឆ្នាំ ២០២១ កម្ពុជាបានរកឃើញអ្នកឆ្លងវីរុសកូវីដបំប្លែងថ្មីដែលតាសរុបចំនួន ៣២៧ នាក់ (ស្រី ១៥៧ នាក់)។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានអំពាវនាវ ដោយទទូចដល់សាធារណជននៅទូទាំងប្រទេសកម្ពុជាឱ្យបន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឲ្យសោះ ដោយត្រូវចេះផ្លាស់ប្ដូរទម្លាប់រស់នៅរបស់ខ្លួនឲ្យស្របតាមពាក្យស្លោកដែលថា៖ “រៀនរស់នៅធម្មតាជាមួយវីរុសកូវីដ ១៩ តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ ១៩ សំដៅបង្ការគ្រប់គ្រង និងកាត់ផ្ដាច់នូវខ្សែចម្លងនៃវីរុសកូវីដ ១៩ ជាពិសេសពពួកប្រភេទបំប្លែងថ្មីនេះ ឬក៏ប្រភេទថ្មីផ្សេងទៀត ដែលអាចកើតមានក្នុងព្រះរាជាណាចក្រកម្ពុជាយើងជាយថាហេតុណាមួយ"៕
