ភ្នំពេញៈ ក្រោយបញ្ចប់ការពិភាក្សាសួរដេញដោលអស់រយៈពេល ១៩ លើកលើវិសោធនកម្មច្បាប់ស្តីពីចរាចរណ៍ផ្លូវគោក ក្រុមការងារជំនាញក្រសួងសាធារណការ និងដឹកជញ្ជូន និងភាគីពាក់ព័ន្ធ គ្រោងស្នើសុំគោលការណ៍ឯកភាពធ្វើជាច្បាប់ចរាចរណ៍ផ្លូវគោកថ្មី។ នេះបើតាមក្រសួងសាធារណការ។
ការឯកភាពគ្នានេះ ក្រោយពីភាគីពាក់ព័ន្ធបានជួបប្រជុំគ្នាតាមអនឡាញ និងដោយផ្ទាល់រយៈពេល ២ ថ្ងៃនៅថ្ងៃទី ៣ ដល់ថ្ងៃទី ៤ ខែសីហា។ កិច្ចប្រជុំនេះបានដឹកនាំដោយលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងមានការចូលរួមពីលោក គឹម សន្តិភាព រដ្ឋលេខាធិការក្រសួងយុត្តិធម៌ លោក អ៊ុក គឹមលេខ រដ្ឋលេខាធិការក្រសួងមហាផ្ទៃ លោក ហ៊ឹម យ៉ាន អគ្គស្នងការរងនៃអគ្គស្នងការដ្ឋាននគរបាលជាតិរួមនឹងមន្ត្រីជំនាញពីអង្គភាពក្រោមឱវាទក្រសួង និងភាគីពាក់ព័ន្ធមួយចំនួនទៀត។
លោក ស៊ុន ចាន់ថុល បានស្នើឱ្យអង្គប្រជុំទាំងមូលចូលរួមផ្តល់ធាតុចូល និងមតិយោបល់ឱ្យបានផុលផុស ដើម្បីបំពេញបន្ថែមទៅលើចំណុចខ្វះខាតនៃសេចក្តីព្រាងវិសោធនកម្មច្បាប់ស្តីពីចរាចរណ៍ផ្លូវគោក ដើម្បីពន្លឿនការរៀបចំសេចក្តីព្រាងវិសោធនកម្មច្បាប់នេះឱ្យបានឆាប់រហ័សតាមដែលអាចធ្វើទៅបានដើម្បីដាក់ឆ្លងកិច្ចប្រជុំអន្តរក្រសួងនាពេលខាងមុខ។
លោកបានថ្លែងថា៖ «អង្គប្រជុំពិភាក្សានេះបានពិភាក្សាលើការប្រមូលធាតុចូល ក៏ដូចជាកែសម្រួលអត្ថន័យ ពាក្យពេចន៍ ឃ្លាប្រយោគអក្ខរាវិរុទ្ធនៃសេចក្តីព្រាងវិសោធនកម្មច្បាប់ចរាចរណ៍ផ្លូវគោកឱ្យមានលក្ខណៈគ្រប់ជ្រុងជ្រោយ»។ លោកថា ច្បាប់នេះគឺសំដៅឱ្យអ្នកប្រើប្រាស់ផ្លូវថ្នល់ទាំងអស់ គោរពច្បាប់ចរាចរណ៍ឱ្យបានម៉ឺងម៉ាត់ និងឈានទៅកាត់បន្ថយគ្រោះថ្នាក់ចរាចរណ៍ផ្លូវគោកឱ្យមកនៅកម្រិតទាបបំផុត។
បើតាមក្រសួងសាធារណការ វិសោធនកម្មច្បាប់ស្តីពីចរាចរណ៍ផ្លូវគោកនេះបានឆ្លងកាត់ការសិក្សា និងប្រជុំពិភាក្សាយ៉ាងផុលផុសពីសំណាក់ក្រុមការងារជំនាញសរុបចំនួន ១៧ លើកគិតចាប់ពីខែឧសភា ឆ្នាំ ២០២០ រហូតដល់ថ្ងៃទី ២៦ ខែមករា ឆ្នាំ ២០២១ និងកិច្ចប្រជុំពិភាក្សាចំនួន ២ លើកបន្ថែមទៀត ដែលបានបញ្ចប់នៅថ្ងៃទី ៤ ខែសីហាឆ្នាំ ២០២១។
ក្រសួងឱ្យដឹងថា នៅក្នុងកិច្ចប្រជុំនេះ អង្គប្រជុំបានពិភាក្សាលើវាក្យសព្ទមាត្រាកែសម្រួលថ្មី និងមាត្រាបន្ថែមថ្មីនៃសេចក្តីព្រាងវិសោធនកម្មច្បាប់ស្តីពីចរាចរណ៍ផ្លូវគោក និងបានឯកភាពបញ្ចូលការកំណត់ល្បឿនបើកបរ នៅលើផ្លូវល្បឿនលឿនចូលទៅក្នុងអនុក្រឹត្យស្តីពីការកំណត់ល្បឿនមុនដំណើរការផ្លូវល្បឿនលឿន។
ក្រសួងបញ្ជាក់ថា៖ «ដោយយល់ឃើញថា វិសោធនកម្មច្បាប់នេះ បានធ្វើឡើងជាច្រើនលើកច្រើនសា និងមានមាត្រាចំនួន ៤៨ ក្នុងចំណោម ៩២ មាត្រា ត្រូវបានធ្វើវិសោធនកម្ម។ អង្គប្រជុំបានឯកភាពរៀបចំចងក្រងខ្លឹមសារ កែសម្រួលពាក្យពេចន៍ ឃ្លា ប្រយោគនៃវិសោធនកម្មច្បាប់នេះឱ្យបានច្បាស់លាស់ ដើម្បីគោរពស្នើសុំគោលការណ៍ឯកភាពធ្វើជាច្បាប់ថ្មីពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក»។
លោក ស៊ុន ចាន់ថុល ថ្លែងថា រយៈពេលកន្លងមកការរឹតបន្តឹងច្បាប់ស្តីពីចរាចរណ៍ផ្លូវគោក និងការបង្កើនប្រាក់ពិន័យរបស់រាជរដ្ឋាភិបាលទៅលើបទល្មើសចរាចរណ៍ផ្លូវគោកមិនមានបំណងរកប្រាក់ចំណេញទេ។ ប៉ុន្តែរាជរដ្ឋាភិបាលចង់ឃើញអ្នកប្រើប្រាស់ផ្លូវទាំងឡាយទទួលបានសុខសុវត្ថិភាព គ្មានគ្រោះថ្នាក់ របួស និងស្លាប់ ដោយហេតុថា គ្រោះថ្នាក់ចរាចរណ៍បានបន្សល់ទុកនូវពិការភាព ស្ត្រីមេម៉ាយ ពោះម៉ាយ និងកុមារកំព្រា ដែលធ្វើឱ្យងាយធ្លាក់ក្នុងភាពក្រីក្រ។
លោកបន្តថា ក្រសួងសាធារណការ សហការជាមួយក្រសួងមហាផ្ទៃ បាននិងកំពុងអភិវឌ្ឍកម្មវិធីដកពិន្ទុបណ្ណបើកបរ និងពិន័យបទល្មើសចរាចរណ៍ផ្លូវគោក (App) និងដំណើរការរៀបចំ ប្រកាសអន្តរក្រសួងស្ដីពីនីតិវិធីនៃការដក និងបំពេញពិន្ទុឡើងវិញសម្រាប់បណ្ណបើកបរ។
លោក គឹម បញ្ញា នាយកប្រចាំប្រទេសកម្ពុជា អង្គការបង្ការរបួសអាស៊ី (AIP Foundation) គាំទ្រចំពោះការធ្វើវិសោធនកម្មច្បាប់ស្ដីពីចរាចរណ៍ផ្លូវគោកនេះ។ ប៉ុន្ដែលោកបានជំរុញ និងលើកទឹកចិត្ដឱ្យបន្តពង្រឹងការអនុវត្ដលើច្បាប់ដែលកំពុងតែមានស្រាប់ឱ្យបានម៉ឺងម៉ាត់ ជាប់លាប់ និងមានតម្លាភាព ដើម្បីធានាបាននូវការសង្គ្រោះអាយុជីវិតពលរដ្ឋពីគ្រោះថ្នាក់ចរាចរណ៍។
លោកថ្លែងថា៖ «បច្ចុប្បន្នខាងអង្គការយើង នៅមិនទាន់បានចូលរួមក្នុងការធ្វើកំណែទម្រង់ច្បាប់នេះទេ។ ដូច្នេះបើសិនជាអាចខ្ញុំគិតថាស្ថាប័នរដ្ឋាភិបាលគួរតែមានការពិគ្រោះយោបល់ជាមួយអង្គការដៃគូដែលធ្វើការងារលើផ្នែកចរាចរណ៍នេះ ដើម្បីផ្ដល់ធាតុចូល»។
លោក គឹម បញ្ញា បានឱ្យដឹងថា អង្គការធ្វើការងារផ្នែកចរាចរណ៍ផ្លូវគោកមានចំណុចច្រើនដែលចង់ផ្ដល់ធាតុចូល និងធ្វើការកែតម្រូវច្បាប់ចរាចរណ៍ផ្លូវគោកនេះ។ ដូចជាទី១ ការធ្វើដំណើរតាមម៉ូតូកង់ ៣ ប្រភេទថ្មី ដែលផ្ទុកចំនួនមនុស្សច្រើន គួរត្រូវកំណត់លក្ខខណ្ឌច្បាប់ឱ្យបានច្បាស់លាស់ក្នុងការអនុវត្ដច្បាប់ចរាចរណ៍ជាប្រភេទម៉ូតូ ឬឡានដើម្បីអាចឱ្យអ្នករួមដំណើរពាក់មួកសុវត្ថិភាព ឬត្រូវពាក់ខ្សែក្រវាត់។ ទី២ ការកំណត់ល្បឿន អតិបរិមា ៣០ គីឡូម៉ែត្រក្នុង ១ ម៉ោងសម្រាប់យានយន្តគ្រប់ប្រភេទនៅតំបន់ជុំវិញសាលារៀន។ ទី៣ ការតម្រូវឱ្យអ្នកបើកបរម៉ូតូ ប្រភេទកម្លាំងល្បឿន ១២៥ ស៊ីស៊ី (CC) ចុះក្រោមត្រូវតែទទួលបានការបណ្ដុះបណ្ដាលអំពីបច្ចេកទេស និងច្បាប់ ព្រោះគ្រោះថ្នាក់ចរាចរណ៍ចំពោះអ្នកបើកបរម៉ូតូនៅតែមានកម្រិតខ្ពស់៕
វីដេអូ៖