កំពតៈ រដ្ឋបាលខេត្តកំពតបានចាប់ផ្តើមពិភាក្សាទៅលើគម្រោងប្លង់គោលនៃការកែលម្អ និងអភិវឌ្ឍន៍ហេដ្ឋារចនាសម្ព័ន្ធសេវាកម្មទេសចរណ៍ឆ្នេរព្រែក កំពង់កណ្ដាលស្ថិតក្នុងឃុំជុំគ្រៀល ក្នុងស្រុកទឹកឈូ ដើម្បីទាក់ទាញភ្ញៀវទេសចរជាតិ និងអន្តរជាតិឱ្យមកលេងកម្សាន្តនៅតំបន់នេះ។
ក្នុងកិច្ចប្រជុំកាលពីព្រឹកមិញនេះ លោក ជាវ តាយ អភិបាលខេត្តកំពតបានជំរុញឱ្យក្រុមមន្ត្រីជំនាញ ខិតខំប្រឹងធ្វើយ៉ាងណាឱ្យដំណើរការនៃការអភិវឌ្ឍតំបន់ឆ្នេរទេសចរណ៍ឆ្នេរព្រែកកំពង់កណ្ដាលនេះបានប្រព្រឹត្តទៅឱ្យបានលឿនឆាប់រហ័សផ្អែកលើសោភណ្ឌភាព លក្ខណៈបច្ចេកទេស និងច្បាប់អាចទទួលយកបាន។
លោក ជាវ តាយ ថ្លែងថា៖ «ក្នុងកិច្ចប្រជុំនេះគឺជាការចូលរួមប្រមូលមតិឯកភាពពីមន្ទីរជំនាញ និងអាជ្ញាធរពាក់ព័ន្ធក្នុងការពិនិត្យពិភាក្សា កែតម្រូវទៅលើភាពជាក់ស្ដែង ប្លង់គោលនៃគម្រោងការកែលម្អ និងអភិវឌ្ឍន៍ហេដ្ឋារចនាសម្ព័ន្ធសេវាកម្មទេសចរណ៍ឆ្នេរព្រែកកំពង់កណ្ដាល ដែលរដ្ឋបាលខេត្តកំពតមានគម្រោងការអភិវឌ្ឍយូរមកហើយ»។
លោកថ្លែងបន្តថា៖ «កិច្ចប្រជុំនេះគឺជាការងារសំខាន់ក្នុងការចូលរួមមតិយោបល់ ដោយធ្វើយ៉ាងណាឱ្យដំណើរការគម្រោងនេះសម្រេចបានឆាប់រហ័ស ដើម្បីដាក់ជូនក្រសួងស្ថាប័នពាក់ព័ន្ធ ថ្នាក់ជាតិ ពិនិត្យ និងសម្រេចជាគោលការណ៍ផ្លូវច្បាប់ក្នុងដំណើរការអភិវឌ្ឍគម្រោងនេះ»។
លោកអភិបាលខេត្តក៏បានស្នើសូមឱ្យជំនាញ និងអាជ្ញាធរពាក់ព័ន្ធធ្វើយ៉ាងណាសហការគ្នាឱ្យបានល្អ ដើម្បីឱ្យគម្រោងការអភិវឌ្ឍតំបន់ឆ្នេរនេះ បានសម្រេចជោគជ័យ សម្រាប់ជាសក្ដានុពល បម្រើសេវាកម្មទេសចរណ៍ ខេត្តកំពតឱ្យបានកាន់តែរីកចម្រើនបន្ថែមទៀត៕