ភ្នំពេញៈ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបញ្ជាក់ថា នៅក្នុងអំឡុងពេលនៃការរីករាលដាលនៃជំងឺកូវីដ ១៩ បទល្មើសគ្រឿងញៀនមានការថយចុះគួរឱ្យកត់សម្គាល់ ដោយសារកងកម្លាំងនគរបាលជាតិដែលមានឆន្ទៈមោះមុតក្នុងការបង្ក្រាបបទល្មើសគ្រឿងញៀននេះ។
លោក ស ខេង នៅក្នុងពិធីប្រគល់រថយន្ត Ford Ranger Pick-Up ចំនួន ៨៧ គ្រឿង ជូនស្នងការដ្ឋាននគរបាលខេត្តចំនួន ២៣ នាថ្ងៃទី ០៦ ខែកក្កដា ឆ្នាំ ២០២១ បានថ្លែងថា ទោះបីប្រទេសកម្ពុជា និងពិភពលោកកំពុងជួបបញ្ហាជំងឺកូវីដ ១៩ ក៏ដោយ ក៏កម្លាំងនគរបាលនៅតែខិតខំប្រឹងប្រែងបន្ដបេសកកម្មប្រយុទ្ធប្រឆាំងបទល្មើសគ្រឿងញៀន។
លោក ស ខេង បន្តថា នៅក្នុងអំឡុងពេលនេះការបង្ក្រាបបទល្មើសគ្រឿងញៀនទទួលបានលទ្ធផលយ៉ាងល្អប្រសើររហូតដល់ ៨០ ភាគរយ ទៅ ៩០ ភាគរយ នៃបទល្មើសសរុបដែលបានកើតឡើង។
លោកបញ្ជាក់ថា៖ «បទល្មើសគ្រឿងញៀនក៏មានការថយចុះបន្ដិចមែន ក៏ប៉ុន្ដែគឺចាត់ទុកថា ជាជោគជ័យមួយយ៉ាងធំផងដែរ ក្នុងពេលកូវីដ ១៩ នេះ ព្រោះថា ទោះបីកូវីដ ១៩ ក៏ដោយ ក៏មានជនឆក់យកឱកាសនេះ ដើម្បីលួចផលិត និងនាំចូលនូវសារធាតុញៀនផងដែរ»។
លោក ស ខេង បន្ថែមថា ចាប់តាំងពីបើកយុទ្ធនាការបង្ក្រាបគ្រឿងញៀនមក រហូតដល់ពេលនេះ ការបង្ក្រាបបានបទល្មើសគ្រឿងញៀនច្រើនរបស់កម្លាំងសមត្ថកិច្ចបញ្ជាក់ឱ្យឃើញពីទឹកចិត្តដ៏មោះមុត ពោលគឺឆន្ទៈមោះមុត ចំពោះការប្ដេជ្ញាចិត្តដ៏ខ្លាំងក្លារបស់កម្លាំងសមត្ថកិច្ចក្នុងពេលប្រយុទ្ធប្រឆាំងគ្រឿងញៀននេះ។
លោកក៏បានធ្វើការកោតសរសើរចំពោះកិច្ចខិតខំប្រឹងប្រែងបំពេញបេសកកម្មរបស់សមត្ថកិច្ច ពាក់ព័ន្ធទាំងអស់ដែលធ្វើឲ្យកិច្ចការងារនេះទទួលបានលទ្ធផលល្អ៕