.jpg)
ក្រុមគ្រូពេទ្យយកសំណាកអាជីវករផ្សារតាយ៉ាវ ក្នុងស្រុកមង្គលបូរី នៅថ្ងៃទី ៦ ខែសីហា។ រូបថត រដ្ឋបាលខេត្តបន្ទាយមានជ័យ
បន្ទាយមានជ័យៈ រដ្ឋបាលខេត្តបន្ទាយមានជ័យ បន្តរកឃើញអ្នកវិជ្ជមានកូវីដ ១៩ ចំនួន ១៨៥នាក់ បន្ថែមទៀត និងមានអ្នកជាសះស្បើយចំនួន ៣១៨នាក់ ខណៈអាជ្ញាធរស្រុកមង្គលបូរីនៃខេត្តនេះ បានសម្រេចបិទផ្សារតាយ៉ាវ ស្ថិតនៅក្នុង ឃុំប្ញស្សីក្រោក នៅថ្ងៃទី ៦ ខែសីហានេះ បន្ទាប់ពីរកឃើញអាជីវករចំនួន ១៦នាក់ វិជ្ជមានជំងឺកូវីដ ១៩។
តាមសេចក្តីប្រកាសព័ត៌មានរដ្ឋបាលខេត្តបន្ទាយមានជ័យនៅថ្ងៃទី ៦ ខែសីហា បានឱ្យដឹងថា មានករណីជាសះស្បើយអ្នកជំងឺកូវីដ ១៩ ចំនួន ៣១៨ នាក់ និងនៅថ្ងៃទី ៥ ខែ សីហា ឆ្នាំ២០២១ បានរកឃើញអ្នកវិជ្ជមានជំងឺកូវីដ ១៩ ដែលជាករណីឆ្លងនៅក្នុងព្រឹត្តិការណ៍សហគមន៍ ២០ កុម្ភៈ ២០២១ និងពលករវិលត្រលប់ពីប្រទេសថៃ លើបុរសស្ត្រីជនជាតិខ្មែរ ចំនួន ១៨៥ នាក់។
ជាមួយគ្នានេះ អាជ្ញាធរស្រុកមង្គលបូរី ខេត្តបន្ទាយមានជ័យ បានសម្រេចបិទផ្សារតាយ៉ាវ ស្ថិតនៅក្នុង ឃុំប្ញស្សីក្រោក នៅថ្ងៃទី ០៦ ខែសីហា បន្ទាប់ពីមន្ត្រីសុខាភិបាល និងអាជ្ញាធរបានចុះទៅយកសំណាកធ្វើតេស្តរហ័សរកឃើញអាជីវករចំនួន ១៦ នាក់ វិជ្ជមានជំងឺកូវីដ ១៩។
អភិបាលស្រុកមង្គលបូរី លោក រ័ត្ន ដាស៊ីណង់ ប្រាប់អ្នកសារព័ត៌មានថា ក្រុមមន្ត្រីសុខាភិបាលបានធ្វើការយកសំណាកដោយធ្វើតេស្តរហ័ស លើអាជីវករលក់ដូរនៅផ្សារនេះចំនួន ៣២៦ នាក់ ដោយបានរកឃើញវិជ្ជមានជំងឺកូវីដ ១៩ ចំនួន ១៦ នាក់។
លោកអភិបាលស្រុករូបនេះបញ្ជាក់ថា៖ «នៅពេលនេះមន្ត្រីសុខាភិបាលកំពុងតែស្វែងរកអ្នកដែលជាប់ពាក់ព័ន្ធបន្ថែមទៀត ដើម្បីយកសំណាករកមេរោគកូវីដ ១៩ នេះឱ្យបានទាន់ពេលវេលា ដើម្បីទប់ស្កាត់កុំឱ្យជំងឺដ៏កាចសាហាវនេះ ឆ្លងរាលដាលចូលទៅតំបន់ផ្សេងៗទៀត»។
បើតាមលោក រ័ត្ន ដាស៊ីណង់ ក្នុងចំណោមអ្នកឆ្លងជំងឺកូវីដ ១៩ នៅផ្សារតាយ៉ាវនេះ គឺភាគច្រើនជាអាជីវករលក់ដូរចម្រុះនៅក្នុងផ្សារ ព្រមទាំងបានចម្លងទៅឪពុកម្តាយ ព្រមទាំងទារកម្នាក់ អាយុ ៧ ខែផងដែរ៕
