ភ្នំពេញៈ រដ្ឋបាលខណ្ឌពោធិ៍សែនជ័យទុកពេលឱ្យប្រជាពលរដ្ឋ និងអាជីវករដែលលក់ដូរសម្ភារ ឬទំនិញផ្សេងៗលើចំណីផ្លូវបេតុង និងប្រឡាយមេ ស្ថិតនៅភូមិត្រពាំងថ្លឹង ១ ភូមិត្រពាំងថ្លឹង ២ ភូមិត្រពាំងថ្លឹង ៣ និងភូមិត្រពាំងថ្លឹង ៤ សង្កាត់ចោមចៅទី ១ ខណ្ឌពោធិ៍សែនជ័យ ជាពិសេសនៅជាប់សួនឧស្សាហកម្មកាណាឌីយ៉ារយៈពេល ៥ ថ្ងៃ ឱ្យរុះរើចេញ។
តាមសេចក្តីជូនដំណឹងរបស់លោក ហែម ដារិទ្ធិ អភិបាលខណ្ឌពោធិ៍សែនជ័យ កាលពីថ្ងៃទី ៤ ខែសីហា បានឱ្យដឹងថា រដ្ឋបាលខណ្ឌពោធិ៍សែនជ័យបានសង្កេតឃើញ មានបងប្អូនប្រជាពលរដ្ឋ និងអាជីវករមួយចំនួនបានធ្វើការលក់ដូរ និងសាងសង់តូបលក់ដូររំលោភលើចំណីផ្លូវសាធារណៈ និងផ្លូវសាធារណៈ ដែលបណ្តាលឱ្យប៉ះពាល់ដល់ការធ្វើចរាចរណ៍ សណ្តាប់ធ្នាប់ សោភ័ណភាព និងសុវត្ថិភាពសាធារណៈ។
លោកបានសរសេរថា៖ «ដូច្នេះស្នើលោក/លោកស្រី បងប្អូនប្រជាពលរដ្ឋ និងអាជីវករទាំងអស់ដែលលក់ដូរ និងសាងសង់តូបលក់ដូររំលោភលើដីចំណីផ្លូវសាធារណៈ និងផ្លូវសាធារណៈខាងលើត្រូវរុះរើចេញឱ្យអស់ក្នុងរយៈពេល ០៥ ថ្ងៃ ដោយគិតចាប់ពីថ្ងៃចុះហត្ថលេខានេះតទៅ»។
ក្នុងករណីប្រជាពលរដ្ឋ និងអាជីវករមិនអនុវត្តតាមខ្លឹមសារសេចក្តីជូនដំណឹងនេះទេ រដ្ឋបាលខណ្ឌនឹងមានវិធានការចុះរុះរើដោយមិនទទួលខុសត្រូវរាល់ការបាត់បង់ ខូចខាតទ្រព្យសម្បត្តិ និងសម្ភារផ្សេងៗ ដែលមាននៅលើទីតាំងនោះឡើយ។
ចំពោះរាល់ការចំណាយក្នុងការអនុវត្តការងាររុះរើនេះជាបន្ទុករបស់លោក/លោកស្រី ដែលជាម្ចាស់ទីតាំងត្រូវទទួលខុសត្រូវទាំងស្រុង។ ក្នុងករណីមានការរារាំង រឹងរូស អាជ្ញាធរ នឹងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី។
រដ្ឋបាលខណ្ឌពោធិ៍សែនជ័យសង្ឃឹមជឿជាក់លើប្រជាពលរដ្ឋ និងអាជីវករទាំងអស់នឹងអនុវត្តតាមខ្លឹមសារសេចក្ដីជូនដំណឹងនេះជាពុំខានឡើយ៕
វីដេអូ៖