ភ្នំពេញៈ លោកនាយករដ្ឋមន្ត្រី ហ៊ុន សែន បានណែនាំឱ្យរៀបចំមណ្ឌលចត្តាឡីស័ក និងមណ្ឌលព្យាបាល នៅតាមបណ្តារាជធានី-ខេត្ត បន្ថែមទៀត ដើម្បីទទួលយកពលករខ្មែរ ដែលវិលត្រឡប់មកពីប្រទេសថៃតាមព្រំដែនគោក បន្ទាប់ពីមានករណីឆ្លងរាលដាលនៃជំងឺកូវីដ ១៩ ក្នុងរយៈពេលចុងក្រោយនេះ និងការរកឃើញក្នុងចំនួនកាន់តែច្រើនឡើងនៃមេរោគកូវីដបំប្លែងថ្មី ប្រភេទដែលតា (Delta) លើពលករខ្មែរដែលវិលត្រឡប់មកពីប្រទេសថៃ។
តាមសារាចរណ៍ណែនាំរបស់លោកនាយករដ្ឋមន្ត្រី ហ៊ុន សែន នៅថ្ងៃទី ៦ ខែសីហា នេះបានបញ្ជាក់ថា កន្លងមករាជរដ្ឋាភិបាលបានដាក់ចេញនូវវិធានការជាបន្តបន្ទាប់ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ សំដៅការពារសុខភាព និងអាយុជីវិតរបស់ប្រជាជន។
បន្ថែមលើវិធានការបង្ការ ទប់ស្កាត់ និងគ្រប់គ្រងការឆ្លងរាលដាលនៃជំងឺនេះ រាជរដ្ឋាភិបាលក៏បានដាក់ចេញ និងកំពុងអនុវត្តយ៉ាងសកម្មនូវយុទ្ធនាការជាតិ ចាក់វ៉ាក់សាំង ដែលត្រូវបានចាត់ទុកជាយុទ្ធសាស្ត្រគន្លឹះ និងជាខ្សែក្រវាត់ការពារ សំខាន់ជាងគេ ដើម្បីបង្កើតឱ្យមានភាពស៊ាំក្នុងសហគមន៍ទប់ទល់នឹងមេរោគកូវីដ ១៩ សំដៅការពារសុខភាព និងអាយុជីវិតរបស់ប្រជាជនក៏ដូចជាដើម្បីឈានឆ្ពោះទៅបើកដំណើរការ ប្រទេសជាតិឡើងវិញលើគ្រប់វិស័យ និងការរស់នៅជាមួយនឹងជំងឺនេះតាមគន្លងប្រក្រតីភាពថ្មី។
ទន្ទឹមនេះ រាជរដ្ឋាភិបាលបាននិងកំពុងយកចិត្តទុកដាក់ខ្ពស់ក្នុងការផ្តល់ការថែទាំ និងព្យាបាលអ្នកជំងឺកូវីដ ១៩ ទាំងអស់ដោយឥតគិតថ្លៃនៅតាមមន្ទីរពេទ្យ និងមណ្ឌលព្យាបាលរបស់រដ្ឋទាំងអស់។
ផ្អែកតាមស្ថានភាពវិវត្តនៃការឆ្លងរាលដាលនៃជំងឺកូវីដ ១៩ ក្នុងរយៈពេលចុងក្រោយនេះ ការរកឃើញក្នុងចំនួនកាន់តែច្រើនឡើងនៃមេរោគកូវីដ ១៩ បំប្លែងថ្មី ប្រភេទដែលតា លើពលករខ្មែរដែលវិលត្រឡប់មកពីប្រទេសថៃ តាមព្រំដែនគោក ព្រមទាំងការធ្លាយចូលក្នុងសហគមន៍ក្នុងពេលថ្មីៗនេះនូវមេរោគ ប្រភេទថ្មីនេះនៅតាមបណ្តាខេត្តជាប់ព្រំដែនថៃ ព្រមទាំងខេត្តសៀមរាប ខេត្តកំពង់ធំ និងរាជធានីភ្នំពេញ គឺជាកង្វល់ដ៏ធំ និងជាការគំរាមកំហែងជាប់ជាប្រចាំដល់ព្រះរាជាណាចក្រកម្ពុជា ដោយសារមេរោគប្រភេទថ្មីនេះមានកម្រិតនៃការឆ្លងរាលដាលលឿន និងកម្រិតគ្រោះថ្នាក់ធ្ងន់ធ្ងរជាងមុន។
ចំពោះមុខស្ថានភាពដែលកំពុងវិវត្តយ៉ាងលឿនគួរឱ្យបារម្ភនេះ និងក្នុងពេលដែលព្រះរាជាណាចក្រកម្ពុជាពុំទាន់សម្រេចបានដោយជោគជ័យក្នុងការបង្កើតឱ្យមានពេញលេញនូវភាពស៊ាំក្នុងសហគមន៍ សម្រាប់ប្រជាជនកម្ពុជានៅទូទាំងប្រទេស ដោយសារយុទ្ធនាការជាតិចាក់វ៉ាក់សាំងពុំទាន់ត្រូវបានបញ្ចប់នៅឡើយ រាជរដ្ឋាភិបាលកម្ពុជាបានសម្រេចដាក់ចេញនូវយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ នៅទូទាំងប្រទេស និងវិធានការបិទខ្ទប់បណ្តាខេត្តជាប់ព្រំដែនកម្ពុជា-ថៃ និងខេត្ត សៀមរាប សម្រាប់រយៈពេល ១៤ ថ្ងៃ គិតចាប់ពីវេលាម៉ោង ២៣:៥៩ នាទី នាថ្ងៃទី ២៩ ខែកក្កដា ឆ្នាំ ២០២១ រហូតដល់ថ្ងៃទី ១២ ខែសីហា ឆ្នាំ ២០២១។
វិធានការទាំងនេះត្រូវបានរំពឹងថា នឹងជួយដល់ការគ្រប់គ្រង និងការពន្យារពេលបានមួយកម្រិតនូវការឆ្លងរាលដាលទ្រង់ទ្រាយធំក្នុងសហគមន៍នៃមេរោគកូវីដ ១៩ ប្រភេទ Delta។
តាមការរំពឹងទុក បន្ទាប់ពីការបិទខ្ទប់បណ្តាខេត្តជាប់ព្រំដែនកម្ពុជា-ថៃ ត្រូវបានបញ្ចប់ ពលករខ្មែរ ដែលនឹងវិលត្រឡប់មកពីប្រទេសថៃវិញនឹងអាចមានការកើនឡើងក្នុងចំនួនដ៏ច្រើនដែលអាចហួសពីសមត្ថភាព ទទួលយករបស់មណ្ឌលចត្តាឡីស័ក និងមណ្ឌលព្យាបាលនៅបណ្តាខេត្តជាប់ព្រំដែនកម្ពុជា-ថៃ និងបណ្ដា ខេត្តជាប់នឹងខេត្តជាប់ព្រំដែនកម្ពុជា-ថៃ ខណៈដែលមេរោគប្រភេទ Delta ក៏ត្រូវបានបន្តរកឃើញជាបន្តបន្ទាប់នៅក្នុងចំនួនកាន់តែច្រើនឡើង នៅក្នុងសហគមន៍ ហើយមេរោគនេះកំពុងតែពង្រីកខ្លួនយ៉ាងលឿនទៅកាន់តំបន់ផ្សេងទៀត ដែលរហូតមកដល់បច្ចុប្បន្ននេះមានរាជធានី-ខេត្តចំនួន ១៧ ដែលមានវត្តមានមេរោគ ប្រភេទ Delta ក្នុងសហគមន៍។
ផ្អែកតាមការវិវត្តថ្មីនៃសភាពការណ៍នេះ និងដើម្បីត្រៀមលក្ខណៈទុកជាមុនក្នុងការគ្រប់គ្រងមេរោគ ប្រភេទ Delta ពិសេសករណីនាំចូលពីប្រទេសជិតខាងជាប់ព្រំដែនកម្ពុជា ព្រមទាំងដើម្បីម្ចាស់ការដោះស្រាយបញ្ហាប្រឈមនានានៅតាមមូលដ្ឋានរាជធានី-ខេត្តនាពេលខាងមុខនេះ ដែលបណ្តាលមកពីការឆ្លងរាលដាលក្នុងសហគមន៍នៃមេរោគប្រភេទ Delta រាជរដ្ឋាភិបាល សូមធ្វើការណែនាំដល់បណ្តារាជធានី-ខេត្ត និងក្រុមការងាររាជរដ្ឋាភិបាល ចុះមូលដ្ឋានរាជធានី-ខេត្តផងដែរ ដើម្បីរៀបចំមណ្ឌលនេះ៕
វីដេអូ៖