.jpg)
គ្រូពេទ្យចាក់វ៉ាក់សាំងជូនយុវតីម្នាក់នៅមណ្ឌលសុខភាពកោះដាច់ ខណ្ឌជ្រោយចង្វារ កាលពីថ្ងៃទី ១ សីហា។ ហុង មិនា
ភ្នំពេញ៖ គិតចាប់ពីថ្ងៃទី ១០ ខែ កុម្ភៈ ដល់ថ្ងៃទី ៦ ខែសីហានេះ កម្ពុជាបានចាក់វ៉ាក់សាំងបង្ការវីរុសកូវីដ ១៩ ដល់ប្រជាពលរដ្ឋសរុបបានជាង ៧,៩ លាននាក់ ក្នុងនោះបានចាក់ដល់កុមារ និងយុវវ័យអាយុចាប់ពី ១២ ដល់ក្រោម ១៨ ឆ្នាំ បានជាង ២២ ម៉ឺននាក់ ខណៈកម្ពុជាកំពុងបន្តយុទ្ធនាការចាក់វ៉ាក់សាំងបង្ការជំងឺកូវីដ ១៩ ដល់ប្រជាពលរដ្ឋគោលដៅនៅទូទាំងប្រទេស។
តាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានឱ្យដឹងថា កំណើនអត្រាចាក់វ៉ាក់សាំងកូវីដ ១៩ នៅកម្ពុជា គិតចាប់ពីថ្ងៃទី ១០ ខែកុម្ភៈ ដល់ថ្ងៃទី ៤ ខែសីហា ឆ្នាំនេះ អ្នកចាក់វ៉ាក់សាំងអាយុចាប់ពី ១៨ ឆ្នាំឡើងទៅ បានចាក់ចំនួនជាង ៧,៧ លាននាក់ ស្មើនឹងជាង ៧៧ ភាគរយ បើធៀបនឹងចំនួនប្រជាជនគោលដៅ ១០ លាននាក់ និងកុមារ និងយុវវ័យអាយុពី ១២ ឆ្នាំ ទៅក្រោម ១៨ ឆ្នាំ ចាក់បានចំនួនជាង ២២ ម៉ឺននាក់ ស្មើនឹង ១១,៥៧ ភាគរយ ធៀបនឹងចំនួនគោលដៅប្រមាណ ២ លាននាក់។
បើសរុបចំនួនអ្នកដែលបានចាក់វ៉ាក់សាំងរួចទាំងអ្នកដែលមានអាយុ ១៨ ឆ្នាំឡើងទៅ រួមនឹងកុមារ និងយុវវ័យអាយុពី ១២ ឆ្នាំទៅក្រោម ១៨ ឆ្នាំ គិតត្រឹមថ្ងៃទី ៦ ខែសីហានេះ បានចំនួនសរុបជាង ៧,៩ លាននាក់នៅទូទាំងប្រទេស។
រាជរដ្ឋាភិបាលកម្ពុជាបានចាប់ផ្ដើមដំណើរការចាក់វ៉ាក់សាំងបង្ការជំងឺកូវីដ ១៩ ដល់ប្រជាពលរដ្ឋគោលដៅ និងអាទិភាព តាមគោលការណ៍ស្ម័គ្រចិត្ដ និងមិនបង់ថ្លៃ កាលពីថ្ងៃទី ១០ ខែ កុម្ភៈ ឆ្នាំ ២០២១ នេះ ខណៈវ៉ាក់សាំងជាជំនួយរបស់ប្រទេសជាមិត្ដ ដៃគូអភិវឌ្ឍន៍ និងវ៉ាក់សាំងជាការបញ្ជាទិញរបស់កម្ពុជាដោយផ្ទាល់ បានមកដល់កម្ពុជាជាបន្តបន្ទាប់។
តាមផែនការកម្ពុជា នឹងចាក់វ៉ាក់សាំងជូនប្រជាពលរដ្ឋអាយុចាប់ពី ១៨ ឆ្នាំឡើងប្រមាណ ១០ លាននាក់ និងចាក់ជូនកុមារ និងយុវវ័យអាយុចាប់ពី ១២ ឆ្នាំ ទៅក្រោម ១៨ ឆ្នាំ ប្រមាណ ២ លាននាក់នៅទូទាំងប្រទេស។
បើតាមការបញ្ជាក់របស់លោកនាយករដ្ឋមន្ដ្រីនៅក្នុងខែសីហានេះ កម្ពុជានឹងទទួលបានវ៉ាក់សាំងបង្ការជំងឺកូវីដ ១៩ ចំនួន ៧,៦ លានដូសបន្ថែមទៀត ដែលនាំឱ្យគិតមកត្រឹមខែសីហានេះ កម្ពុជានឹងទទួលបានវ៉ាក់សាំងសរុបប្រមាណ ២៦,៥ លានដូស។
លោកនាយករដ្ឋមន្ដ្រីបានឱ្យដឹងថា កម្ពុជានឹងមានវ៉ាក់សាំងការពារជំងឺកូវីដ ១៩ សរុបចំនួនជាង ៣៥ លានដូស ដោយក្នុងនោះមានទាំងការបញ្ជាទិញ និងជំនួយពីប្រទេសជាមិត្ត និងជំនួយពីកូវ៉ាក់របស់អង្គការសុខភាពពិភពលោក៕
