.jpg)
គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងគ្រប់ខណ្ឌទូទាំង ប្រទេស (គ.វ.ក-១៩) បានជូនដំណឹងដល់ប្រជាពលរដ្ឋខ្មែរ និងជនបរទេសមានអាយុចាប់ពី ១៨ ឆ្នាំឡើងទៅ ដែលនៅសេសសល់មិនទាន់បានចាក់វ៉ាក់សាំងបង្ការជំងឺកូវីដ ១៩។
ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងគ្រប់ខណ្ឌទូទាំង ប្រទេស (គ.វ.ក-១៩) បានជូនដំណឹងដល់ប្រជាពលរដ្ឋខ្មែរ និងជនបរទេសមានអាយុចាប់ពី ១៨ ឆ្នាំឡើងទៅ ដែលនៅសេសសល់មិនទាន់បានចាក់វ៉ាក់សាំងបង្ការជំងឺកូវីដ ១៩ ក្នុងភូមិសាស្ដ្ររាជធានីភ្នំពេញឱ្យទៅចាក់វ៉ាក់សាំងនៅថ្ងៃទី ៩ ខែសីហានេះ។
សេចក្ដីជូនដំណឹងរបស់ គ.វ.ក-១៩ ស្ដីពីការចាក់វ៉ាក់សាំងបង្ការជំងឺកូវីដ ១៩ ជូនដល់អ្នកដែលនៅសេសសល់មិនទាន់បានចាក់វ៉ាក់សាំងកូវីដ ១៩ នៅរាជធានីភ្នំពេញបានឱ្យដឹងថា ការជូនដំណឹងនេះ គឺយោងតាមអនុសាសន៍របស់លោកនាយករដ្ឋមន្ត្រី ហ៊ុន សែន។
តាមសេចក្ដីជូនដំណឹង គ.វ.ក-១៩ នឹងរៀបចំការចាក់វ៉ាក់សាំង បង្ការជំងឺកូវីដ ១៩ ជូនដល់ប្រជាពលរដ្ឋខ្មែរ និងជនបរទេសមានអាយុចាប់ពី ១៨ ឆ្នាំឡើង ដែលនៅសេសសល់មិនទាន់បានចាក់វ៉ាក់សាំងបង្ការជំងឺកូវីដ ១៩ ក្នុងនោះរួមទាំង ស្ត្រីដែលទើបនឹងសម្រាលកូនរួច ប្រជាពលរដ្ឋដែលបានបញ្ចប់ការធ្វើចត្តាឡីស័ក ឬអ្នកដែលបានវិលត្រឡប់ពីក្រៅប្រទេស ដែលបានបញ្ចប់ការធ្វើចត្តាឡីស័កជាដើម។
គ.វ.ក-១៩ បញ្ជាក់ថា អ្នកដែលត្រូវបានផ្ដល់ការចាក់វ៉ាក់សាំងនេះគឺមានអាសយដ្ឋានរស់នៅក្នុងរាជធានីភ្នំពេញ។
គ.វ.ក-១៩ បានអំពាវនាវដល់ប្រជាពលរដ្ឋដែលមិនទាន់បានទទួលការចាក់វ៉ាក់សាំងកូវីដ ១៩ ខាងលើឱ្យរួសរាន់ទៅចាក់វ៉ាក់សាំងបង្ការកូវីដ ១៩ ដោយភ្ជាប់ទៅជាមួយនូវអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែននៅតាមទីតាំង កាលបរិច្ឆេទ និងពេលវេលា ដែលក្រសួងបានកំណត់។
ទីតាំងនឹងពេលវេលាដែល គ.វ.ក-១៩ ឱ្យពលរដ្ឋទៅចាក់វ៉ាក់សាំងនោះ ទី១ ស្ថិតនៅមន្ទីរពេទ្យព្រះអង្គឌួង ទី ២ ស្ថិតនៅមជ្ឈមណ្ឌលជាតិគាំពារមាតា និងទារក។ ដំណើការនៃការចាក់វ៉ាក់សាំងនឹងចាប់ពីថ្ងៃទី ៩ ខែសីហាដល់ថ្ងៃទី ៨ ខែកញ្ញា ឆ្នាំ ២០២១ ចាប់ពីពេលវេលាម៉ោង ៨ ព្រឹកដល់ម៉ោង ១១ ថ្ងៃត្រង់ និងម៉ោង ២ រសៀល ដល់ម៉ោង ៤ ល្ងាច។
គ.វ.ក-១៩ បានបញ្ជាក់ថា ការចាក់វ៉ាក់សាំងបង្ការកូវីដ ១៩ ដូសទី ២ ត្រូវធ្វើឡើងនៅ ២១ ថ្ងៃក្រោយចាក់ដូសទី ១ នៅទីតាំងដែលបានចាក់ដូសទី ១៕
វីដេអូ៖
