.jpg)
ជនរងគ្រោះត្រូវភ្លើងឆេះ ដែលសមត្ថកិច្ចដាក់ការសង្ស័យថា ជាអំពើឃាតកម្ម។ រូបថត នគរបាល
ព្រះសីហនុៈអាជ្ញាធរក្រុងកោះរ៉ុង ខេត្តព្រះសីហនុ ដាក់ការសង្ស័យករណីគ្រោះអគ្គិភ័យ ដែលបង្កឲ្យមនុស្សយ៉ាងតិច៤នាក់រងរបួសធ្ងន់ និងស្រាល កាលពីម៉ោង២:៣០នាទីទៀបភ្លឺ ថ្ងៃទី៨ សីហា ថា ជាករណីប៉ុនប៉ងឃាតកម្ម ខណៈមានបណ្តឹង របស់ជនរងគ្រោះ ដែលជាប្រពន្ធ ប្តឹងជនសង្ស័យជាប្តីចុងក្នុងករណីអគ្គិភ័យនេះ។
លោក នួន ប៊ុនថុល អភិបាលក្រុងកោះរ៉ុង បានប្រាប់ភ្នំពេញប៉ុស្តិ៍ថា ជនរងគ្រោះ៣នាក់ ក្នុង ចំណោមគ្នា៤នាក់ ដែលក្នុងនោះមានទាំងកុមារា អាយុ៧ឆ្នាំម្នាក់ផងដែរ បានរងរបួសធ្ងន់ ដោយឆេះរលាកពេញទាំងខ្លួន។
ពួកគេ ត្រូវបានកម្លាំងសមត្ថកិច្ចនគរបាលក្រុងកោះរ៉ុងសហការជាមួយកម្លាំងអន្តរាគមន៍សង្គ្រោះរបស់ក្រុមហ៊ុន GTVC របស់លោក ឧកញ៉ា ទៀ វិចិត្រ បញ្ជូនទៅកាន់មន្ទីរពេទ្យខេត្តព្រះសីហនុ ដើម្បីពិនិត្យព្យាបាល។
លោក ប៊ុនថុល ថ្លែងថា៖«យោងតាមការពិនិត្យអង្កេតនៅកន្លែងកើតហេតុ និងវត្ថុតាងដែលមន្ត្រីជំនាញយើងបានរកឃើញ ករណីគ្រោះអគ្គិភ័យនេះ គឺ មិនមែនជាឧប្បទ្ទវហេតុ ដែលកើតឡើងដោយចៃដន្យ ឬ ដោយភាពធ្វេសប្រហែសនោះទេ ប៉ុន្តែ វាអាចជាអំពើប៉ុនប៉ងឃាតកម្ម»។
បើតាមលោក ប៊ុន ថុល គ្រោះអគ្គភ័យនោះ មិនបង្កឲ្យឆេះផ្ទះ ដែលធ្វើពីឈើប្រក់ស័ង្កសីឡើយ គឺ ឆេះតែពូក ខ្នើយ និងភួយ មុងប៉ុណ្ណោះ។ នៅទីតាំងកើតហេតុ សមត្ថកិច្ចបានរកឃើញមានដបសាំងចំណុះ១លីត្រ នៅពីលើគំនរពូកខ្នើយ ដែលឆេះនោះផងដែរ។ នៅពេលនេះ សមត្ថកិច្ចកំពុងបន្តស្រាវជ្រាវលើករណីនេះ ដើម្បីស្វែងរកការពិត។
ទោះយ៉ាងណា អ្នកស្រី គីម កួន អាយុ៤៥ឆ្នាំ មានទីលំនៅភូមិព្រែកស្វាយ សង្កាត់-ក្រុងកោះរ៉ុង ដែលបានរងរបួសដោយឆេះរលាកខ្នងមួយចំហៀង បានប្រាប់ភ្នំពេញប៉ុស្តិ៍ថា ករណីគ្រោះអគ្គិភ័យនោះ គឺជាអំពើរបស់ប្ដីចុងទី៣របស់គាត់ ឈ្មោះ កែវ ឆ្លូញ អាយុ៥១ឆ្នាំ ដែលបានធ្វើមកលើគាត់ ក្នុងចេតនាប៉ុនប៉ងដុតសម្លាប់គាត់ និងកូនៗព្រមទាំងចៅរបស់គាត់។
អ្នកស្រីគឹម កួន ដែលនៅពេលនេះ កំពុងសម្រាកព្យាបាលនៅមន្ទីរពេទ្យចំការចេក ខេត្តព្រះសីហនុ បានបញ្ជាក់ថា៖«ខ្ញុំបានទ្រាំឈឺចាប់គ្រប់បែបយ៉ាង ទោះជាត្រូវគាត់ [កែវ ឆ្លូញ] វាយដំ ច្រំធាក់យ៉ាងណាក៏ដោយ ព្រោះចង់ឲ្យគាត់កែខ្លួន។ ប៉ុន្តែគាត់មិនត្រឹមតែមិនកែខ្លួន ថែមទាំងយកសាំងមកចាក់ស្រោចដុតប៉ងសម្លាប់ពួកខ្ញុំជាប្រពន្ធនិងកូនចៅទាំងយប់ថែមទៀត»។
ជាមួយគ្នានេះ អ្នកស្រីបានអំពាវនាវ សុំឲ្យអាជ្ញាធរ ចាត់វិធានការតាមផ្លូវច្បាប់ ដើម្បីស្វែងរកយុត្តិធម៌សម្រាប់គាត់ និងកូនចៅរបស់គាត់។
ជុំវិញករណីនេះ លោក ហេង គីមអាន អធិការក្រុងកោះរ៉ុង ប្រាប់ភ្នំពេញប៉ុស្តិ៍ថា ក្រោយកើតហេតុ កម្លាំងនគរបាលជំនាញបានឃាត់ខ្លួនលោក កែវ ឆ្លូញ ដែលមានរបួសស្រាល គឺរលាកជើងបន្តិចបន្តួច មកសួរនាំ។ ប៉ុន្តែរហូតមកទល់ពេលនេះ គាត់មិនបានសារភាពនោះទេ បើទោះជា ប្រពន្ធកូនរបស់គាត់ បានដាក់ការសង្ស័យ និង ចោទប្រកាន់មកលើគាត់ក៏ដោយ។
លោកគីមអាន ថ្លែងថា៖«នៅពេលនេះ ក្រុមសមត្ថកិច្ចយើង នៅមិនទាន់អាចសន្និដ្ឋានបានទេថា វាបង្កឡើងពីមូលហេតុអ្វីឲ្យពិតប្រាកដ ហើយក៏មិនទាន់សម្រេចចោទប្រកាន់ ទៅលើជនសង្ស័យណាម្នាក់បានដែរ ល្គឹកណាយើងនៅមិនទាន់ប្រមូលបានភ័ស្ដុតាងគ្រប់ជ្រុងជ្រោយ»។
ចំណែកលោក ណេង ឡេង អាយុ៣៨ឆ្នាំ ជាឪពុកកុមារារងគ្រោះ ឈ្មោះ ឡេង សុម៉ាណាឌី អាយុ៧ឆ្នាំ បានប្រាប់ភ្នំពេញប៉ុស្តិ៍ថា គាត់នឹងដាក់ពាក្យប្ដឹងប្រឆាំងឪពុកក្មេករបស់គាត់ គឺ លោក កែវ ឆ្លូញ ទៅតុលាការ ដើម្បីឲ្យជួយស្វែងរកយុត្តិធម៌សម្រាប់កូនប្រុសរបស់គាត់ ដែលត្រូវបានគេដុតប៉ុនប៉ងសម្លាប់។
លោកថា៖«ករណីនេះ ខ្ញុំជឿថា គ្មាននរណាក្រៅពីឪពុកក្មេករបស់ខ្ញុំនោះទេ។ ខ្ញុំនឹងដាក់ពាក្យប្ដឹងគាត់ទៅតុលាការ ដោយចោទប្រកាន់គាត់ពីបទប៉ុនប៉ងឃាតកម្ម មកលើ កូនប្រុសខ្ញុំ ម្ដាយក្មេក និង ប្អូនថ្លៃរបស់ខ្ញុំ តែមិនបានសម្រេច»។
លោក ឡេង បានឲ្យដឹងដែរថា មកទល់ពេលនេះ កូនប្រុសរបស់គាត់ បានដឹងខ្លួនឡើងវិញហើយ ប៉ុន្តែស្នាមរបួសរបស់កូនគាត់ ធ្ងន់ធ្ងរខ្លាំងណាស់ គឺត្រូវឆេះរលេះរលួយស្បែក ស្ទើរតែទាំងអស់។
ចំណែកប្អូនថ្លៃប្រុសរបស់គាត់ គឺ លោក ឃុយ ប្រកាន អាយុ២១ឆ្នាំ ក៏មានស្ថានភាពធ្ងន់ធ្ងរ ដូចកូនប្រុសរបស់គាត់ផងដែរ៕
